રાજકોટમાં તા.૨૫ થી ૨૮ દરમિયાન ‘૧૦મો રાજકોટ મશીન ટૂલ્સ શો’ યોજાશે
USA, જર્મની, જાપાન, ચીન સહિતના ૧૬થી વધુ દેશોની ૩૫૦થી વધુ નામાંકિત કંપનીઓ લેશે ભાગ
‘મેક ઇન ઇન્ડિયા’ની નેમ સાથે અત્યાધુનિક ટેકનોલોજી અને મશીનરીઝનું અનોખું આકર્ષણ
અગ્ર ગુજરાત, રાજકોટ
વિશ્વ આખું જ્યારે ‘મેક ઇન ઇન્ડિયા’ અને ‘મેડ ઇન ઇન્ડિયા’ના રંગે રંગાયેલું છે અને દુનિયાના દરેક દેશ ભારત તરફ એક અનોખી આશાની નજરથી જોઈ રહ્યો છે, તેવા સુવર્ણ સમયમાં રાજકોટ ખાતે ઔદ્યોગિક જગત માટે ગર્વસમાન એવા ૧૦મા ‘રાજકોટ મશીન ટૂલ્સ શો – ૨૦૨૬’નું આયોજન કરવામાં આવ્યું છે. મશીન ટૂલ્સ મેન્યુફેક્ચરર્સ એસોસિએશન – રાજકોટ અને K & D કમ્યુનિકેશન લિમિટેડ, અમદાવાદના સંયુક્ત ઉપક્રમે આગામી તારીખ ૨૫ થી ૨૮ નવેમ્બર, ૨૦૨૬ દરમિયાન રાજકોટના NSIC ગ્રાઉન્ડ ખાતે આ પ્રદર્શન યોજાનાર છે.
છેલ્લા ઘણા વર્ષોથી ‘રાજકોટ મશીન ટૂલ્સ શો’ જન-માનસમાં અનોખું સ્થાન ધરાવે છે અને તેને સતત અપ્રતિમ પ્રતિસાદ મળતો રહ્યો છે. આ પ્રદર્શનમાં મેટલ કટીંગ, ફોર્મિંગ, ઓટોમેશન, ફોર્જીંગ અને ફાઉન્ડ્રી જેવા અનેક અત્યાધુનિક વિભાગોનું પ્રદર્શન મુલાકાતીઓ માટે મુખ્ય આકર્ષણનું કેન્દ્ર બનશે.
આ પ્રદર્શન કુલ ૧,૦૦,૦૦૦ ચોરસ મીટરના વિશાળ એરિયામાં યોજાનાર છે. જેમાં ભારત ઉપરાંત યુ.એસ.એ., જર્મની, નેધરલેન્ડ, સ્વિટ્ઝરલેન્ડ, સાઉથ આફ્રિકા, યુ.કે., તુર્કી, સ્પેન, તાઇવાન, ચાઇના, જાપાન, કોરિયા, ઇટાલી, યુ.એ.ઇ., થાઇલેન્ડ અને સિંગાપોર જેવા દેશોની ૩૫૦ થી વધુ અગ્રણી કંપનીઓ ભાગ લઈ રહી છે. આ ભવ્ય પ્રદર્શનની મુલાકાતે અંદાજે ૫૦,૦૦૦ થી વધુ મુલાકાતીઓ આવે તેવી અપેક્ષા છે.
મશીન ટૂલ્સ મેન્યુફેક્ચરર્સ એસોસિએશન – રાજકોટ (જે મશીન ટૂલ્સ ઉત્પાદક કંપનીઓના વિકાસ માટે સતત કાર્યરત છે) અને K & D કમ્યુનિકેશન લિમિટેડના સહયોગથી વર્ષ ૨૦૦૬થી આ શોની શરુઆત થઈ હતી. સમયની સાથે આ પ્રદર્શને ઔદ્યોગિક ક્ષેત્રે આર્ષસ્થાન જમાવ્યું છે. ઉલ્લેખનીય છે કે આ એક્ઝીબીશન ગુજરાતનું બીજા નંબરનું, ભારતનું ત્રીજા નંબરનું મોટું અને ઓપન ગ્રાઉન્ડમાં સૌથી મોટું એક્ઝીબીશન છે.
આ સમગ્ર આયોજનને સફળ બનાવવા માટે મશીન ટૂલ્સ મેન્યુફેક્ચરર્સ એસોસિએશન – રાજકોટના હોદ્દેદારો યોગીનભાઈ છનીયારા (પ્રમુખ), હરેશભાઈ પટેલ (ઉપ-પ્રમુખ), તેજસભાઈ દુદકીયા (સેક્રેટરી), દેવલભાઈ ઘોરેચા (જો. સેક્રેટરી), કનકસિંહ ગોહિલ (ખજાનચી) તથા એસોસિએશનના ડાયરેક્ટરો સચીનભાઈ નગેવાડીયા, બ્રીજેશભાઈ સાપરીયા, કરણભાઈ પરમાર, અશ્વિનભાઈ કવા, કેતનભાઈ ગજેરા, બીપીનભાઈ સિધ્ધપુરા, ઘનશ્યામભાઈ પરમાર, હરેશભાઈ ડોડીયા, રવીભાઈ મારૂ, વિમલભાઈ કંટારીયા અને K & D કમ્યુનિકેશન લિમિટેડ – અમદાવાદના કમલેશભાઈ ગોહિલ, અમીતભાઈ મિસ્ત્રી તથા તેમની સમગ્ર ટીમ ભારે જહેમત ઉઠાવી રહી છે.


