- દુકાનદારો ભાડું નહી ચૂકવે તો નિયમ મુજબ કાર્યવાહી હાથ ધરવામાં આવશે
- બાકી ભાડાંની રકમનો આંક એક કરોડને પાર થઈ ગયો
- ભાડાની રકમનો આંક અત્યારસુધીમાં એક કરોડ ઉપરાંત પર પહોંચી ગયો છે
ગાંધીનગર મહાપાલિકા દ્વારા મીના બજારમાં દુકાનોનું ભાડું નહિ ભરનાર બાકીદારોને નોટિસો ફટકારવામાં આવી છે. બાકી ભાડાની રકમનો આંક અત્યારસુધીમાં એક કરોડ ઉપરાંત પર પહોંચી ગયો છે. મ્યુનિ તંત્રએ 129 દુકાનદારોને ભાડા વસુલી માટે નોટિસો ફટકારી ઉઘરાણી કાઢી છે. દુકાનદારોને મ્યુનિ તંત્ર દ્વારા હાથોહાથ નોટિસની બજવણી કરવામાં આવી હતી.કોર્પોરેશનની એસ્ટેટ શાખા દુકાનોના બાકી ભાડાને લઈને હરકતમાં આવી છે. મીના બજારમાં આવેલી દુકાનોના ભાડા નિયમિત નહી ભરવામાં આવતા હોવાની બાબત સામે આવતાં મ્યુનિ કમિશનરની સૂચનાથી બાકીદારોની યાદી તૈયાર કરવામાં આવી હતી. અંદાજે 129 દુકાનદારો એવા નીકળ્યા જેમણે ભાડાં નથી ભર્યા. ભાડાની બાકી નીકળતી રકમનો આંક રૂ. 1,04,87,073 સુધી પહોંચી જવા પામ્યો છે. જેને લઈને તંત્રના પણ ભંવા ચડી ગયા છે. મીના બજાર વિસ્તારની જ 129 દુકાનોના ભાડુઆતોને નોટિસ ફટકારવામાં આવી છે. નોટિસમાં ભાડું સમયસર ભરી જવા તાકીદ કરવામાં આવી છે. ત્યારપછી જપ્તી વોરંટ કાઢવાની ચીમકી આપવામાં આવી છે. રૂ. 1.04 કરોડની વસુલાત માટે નોટિસ ઈશ્યુ કરવામાં આવતાં દુકાનદારોમાં ગણગણાટ શરૂ થયો છે. મીના બજાર એક નાનો કોમર્સિયલ એરિયા છે. જ્યાં વર્ષો પહેલા માર્ગ-મકાન વિભાગ દ્વારા દુકાનો ભાડેથી આપવામાં આવી હતી. સૌથી મહત્વની બાબતમાં દુકાનોનું ભાડું પણ કોઈ ખાસ નથી. આમછતાં દુકાનદારો દ્વારા ભાડું ભરવામાં આવતું નથી. જેના કારણે કોર્પોરેશનની ભાડાંની લેણી નીકળતી રકમનો આંક ફરી એકવાર એક કરોડને પાર થઈ ગયો છે. આ દુકાનદારો નિયમિત ભાડું નહિ ચૂકવે તો તેમની સામે નિયમ મુજબની કાર્યવાહી કરવામાં આવશે.
