- પોલીસે ભરત માળી નામના આરોપીની ધરપકડ કરી છે
- ધપરકડ થયેલ આરોપીના કોર્ટે 3 દિવસના રિમાન્ડ મંજૂર કર્યા
- આરોપી ભરત માળીની રિમાન્ડમાં વધુ નામ ખુલે તેવી શક્યતા
અમીરગઢ મામલતદારના બનાવટી સહી સિક્કા બનાવી 50થી વધુ લોકોને જમીનના હુકમો આપી દેવાના કિસ્સામાં બીજા આરોપીની પોલીસે અટકાયત કરી છે. અગાઉ અમીરગઢ પોલીસે કિરણ રણાવાસીયા નામના આરોપીની અટકાયત કરી ત્રણ દિવસના રિમાન્ડ માગ્યા છે.
ભરત માળીના ત્રણ દિવસના રિમાન્ડ મંજૂર
આરોપીના ત્રણ દિવસના રિમાન્ડમાં વધુ એક આરોપી ભરત માળી નામના ઈસમનું નામ ખુલતાં આરોપીની અટકાયત કરી છે. લાભાર્થી પાસે રહેલ જમીનનો હુકમના કાગળો આપી ભરત માળી ઉઘરાવતો હતો, આ રૂપિયામાંથી અડધા કિરણને આપી અડધા પોતાની જ પાસે રાખતો હતો. અમીરગઢ પોલીસે ભરત માળીના સાત દિવસના રિમાન્ડ માગ્યા હતાં, જેમાં કોર્ટે ત્રણ દિવસના રિમાન્ડ આપ્યા હતાં. ભરત માળીના રિમાન્ડ દરમિયાન વધુ અન્ય નામ ખુલે તેવી પોલીસને આશા છે.
અઢી-અઢી લાખ લઈને 1.25 કરોડનું કૌભાંડ આચર્યુ
દરેક લાભાર્થી પાસે અઢી-અઢી લાખ લઈ 1.25 કરોડનું કૌભાંડ આચર્યાનું ખુલતાં અજાણ્યા શખ્સો સામે ગુનો નોંધાયો હતો. અરજદાર જમીન બાબતની અરજીનું પંચનામુ કરવા કચેરી આવતાં કૌભાંડ બહાર આવ્યુ હતું. ખોટી સરકારી કચેરી, ખોટું ટોલનાકું અને નકલી અધિકારી બાદ હવે મામલતદારના ખોટા સિક્કા બનાવી જમીનના ડુપ્લીકેટ હુકમ બનાવવાનું કૌભાંડ બહાર આવતાં ખળભળાટ મચી ગયો હતો.
મામલતદાર કચેરીના બનાવટી સિક્કા બનાવી મામલતદારની નકલી સહી કરી
અમીરગઢની મામલતદાર કચેરીના બનાવટી સિક્કા બનાવી મામલતદારની નકલી સહી કરી, તાલુકાના ઉમરકોટ ગામની જમીનના ડુપ્લીકેટ હુકમો બનાવી 50થી વધુ લાભાર્થીઓને ફાળવી દીધા હોવાનો સનસનીખેટ ખુલાસો થયો હતો. કેટલાક અજાણ્યા ભેજાબાજોએ પ્રત્યેક લાભાર્થી પાસેથી અઢી-અઢી લાખ રૂપિયા લઈ સવા કરોડથી વધુનું કૌભાંડ આચર્યું હતું. એક લાભાર્થીએ મામલતદાર કચેરીમાં જઈને હુકમ થયેલ જમીનનું પંચનામુ કરવા આવવાનું કહેતા ભેજાબાજોની કરતૂતનો ભાંડો ફૂટ્યો હતો. જેથી અજાણ્યા શખ્સો વિરુદ્ધ ગુનો નોંધવામાં આવ્યો હતો.
