ઈવેન્ટમાં વિજેતા બનનાર રેસલરને અંદાજે 6થી 7 લાખ રૂપિયાનો બેલ્ટ આપવામાં આવશે
આગામી 25મી ફેબ્રુઆરીએ શહેરના SG હાઈવે પરના RM ફાર્મમાં WWE જેવી રેસલિંગ ઈવેન્ટ યોજાશે. જેમાં દેશભરના 25 જેટલા રેસલરો એક બીજા સામે ટકરાશે. આ ઈવેન્ટ સાંજે 6થી 10 વાગ્યા સુધી ચાલશે. એક સાથે 10 હજારથી વધુ લોકો જોઈ શકે તેવા પ્રકારનું આયોજન કરવામાં આવ્યું છે. ફાઈટ જોવા માટે પ્રેક્ષકે 299થી લઈને 4999 સુધી રૂપિયા ખર્ચવા પડશે. ઈવેન્ટમાં વિજેતા બનનાર રેસલરને અંદાજે 6થી 7 લાખ રૂપિયાનો બેલ્ટ આપવામાં આવશે.
દુનિયાની નંબર વન રેસલિંગ ઈવેન્ટ એટલે WWE. આ ઈવેન્ટમાં દુનિયાભરના રેસલરો ભાગ લે છે. અને આ ઈવેન્ટ મોટાભાગે અમેરિકા, યુરોપ અને એશિયાના અમૂક જ દેશોમાં યોજાતી હોય છે. પરંતુ હવે આવી જ એક WWE જેવી ઈવેન્ટનું આયોજન અમદાવાદમાં કરવામાં આવ્યું છે. ટીવી પર WWE લગભગ તમામે જોઈ જ હશે. આ ગેમમાં એક પ્રકારની કુસ્તી છે. જેમાં બે બળિયા એક બીજાને પછાડી પછાડી માર મારે છે. આ ગેમ્સ ખુબ જ લોકપ્રિય છે. ત્યારે આ પ્રકાર ગેમનું આયોજન અમદાવાદમાં કરવામાં આવી રહ્યું છે, પાટણના બે રેસલર ભાઈઓ દ્વારા અમદાવાદમાં પ્રથમ વખત આ રેસલર ગેમનું આયોજન કરવામાં આવ્યું છે.
