- સિંઘુ બોર્ડર, ટિકરી બોર્ડર અને ગાઝીપુર બોર્ડર પર મોટી સંખ્યામાં પોલીસ દળો તૈનાત
- આ સરહદો પર સિમેન્ટ અને લોખંડનું બેરિકેડિંગ પણ કરવામાં આવ્યું છે
- આ ઉપરાંત ખેડૂતોને રોકવા માટે કાંટાળા તાર અને કન્ટેનર પણ મુકવામાં આવ્યા છે
પંજાબ અને હરિયાણાના ખેડૂતો તેમની માંગણીઓ સાથે દિલ્હી સુધી કૂચ કરવાની તૈયારી કરી રહ્યા છે. પંજાબ અને હરિયાણાની શંભુ બોર્ડર પર ખેડૂતોની ‘દિલ્હી ચલો’ કૂચ રોકી દેવામાં આવી છે. મંગળવારે પોલીસ દ્વારા ખેડૂતોને રોકવા અને વિખેરવા માટે ટીયર ગેસ છોડવામાં આવ્યો હતો. સિંઘુ બોર્ડર, ટિકરી બોર્ડર અને ગાઝીપુર બોર્ડર પર મોટી સંખ્યામાં પોલીસ દળો તૈનાત છે. આ સરહદો પર સિમેન્ટ અને લોખંડનું બેરિકેડિંગ પણ કરવામાં આવ્યું છે. આ ઉપરાંત ખેડૂતોને રોકવા માટે કાંટાળા તાર અને કન્ટેનર પણ મુકવામાં આવ્યા છે. ખેડૂતોએ મંગળવારે સાંજે ફરી કહ્યું કે તેઓ સવારે ફરી દિલ્હીમાં પ્રવેશવાનો પ્રયાસ કરશે. આ સાથે જ વિપક્ષી પાર્ટીઓએ ખેડૂતો પર પોલીસ કાર્યવાહીને લઈને સરકાર પર નિશાન સાધ્યું છે.
વિરોધ કરી રહેલા ખેડૂતોએ બેરિકેડ તોડવાનો પ્રયાસ કર્યો
શંભુ બોર્ડર પર વિરોધ કરી રહેલા ખેડૂતોએ બેરિકેડ તોડવાનો પ્રયાસ કર્યો અને હરિયાણા પોલીસ કર્મચારીઓ પર પથ્થરમારો પણ કર્યો, જેના જવાબમાં પોલીસે પાણીની તોપ અને ટીયર ગેસનો ઉપયોગ કરીને પરિસ્થિતિને કાબૂમાં લીધી. હરિયાણા પોલીસના પ્રવક્તાએ કહ્યું કે, પ્રદર્શનની આડમાં અશાંતિ ફેલાવવાની પરવાનગી આપવામાં આવશે નહીં. ખેડૂતોએ દિલ્હી જવું હોય તો બસ કે ટ્રેન કે પગપાળા જવું જોઈએ, અમે તેમને ટ્રેક્ટરથી દિલ્હી નહીં જવા દઈએ.
ખેડૂતોના આંદોલનનું નેતૃત્વ કોણ કરશે?
પંજાબ અને હરિયાણાના ખેડૂતો દિલ્હી તરફ કૂચ કરવાનો પ્રયાસ કરી રહ્યા છે. જો કે, આ વખતે કયું ખેડૂત સંગઠન આંદોલનનું નેતૃત્વ કરી રહ્યું છે, આ એક મોટો પ્રશ્ન છે કારણ કે રાકેશ ટિકૈતના ભારતીય કિસાન યુનિયન, સંયુક્ત કિસાન મોરચાએ અત્યાર સુધી આ આંદોલનથી અંતર જાળવી રાખ્યું છે.
