- પોલીસે રૂ.69 લાખ ઉપરાંતનો મુદ્દામાલ જપ્ત કરી તપાસ આદરી
- પોલીસની ટીમ નાઇટ પેટ્રોલિગમાં હતી ત્યારે તેમને માહિતી મળી હતી
- ફેવિકોલના બોક્સની આડમાં વિદેશી દારૂનો જથ્થો સંતાડેલ છે
આણંદના મોગર પાસેથી કન્ટેનરમાં ફેવિકોલના બોક્સની આડમાં લઇ જવાતો વિદેશી દારૂનો જથ્થો ઝડપાયો. પોલીસે ટ્રેક, મોબાઇલ ફેન સહિત રૂ. 69 લાખ ઉપરાંતનો મુદ્દામાલ જપ્ત કરીને કાર્યવાહી હાથ ધરી છે.
મળતી માહિતી મુજબ આણંદ એલસીબી પોલીસની ટીમ નાઇટ પેટ્રોલિગમાં હતી ત્યારે તેમને માહિતી મળી હતી કે, એક ટાટા કંપનીનું બંધ બોડીનું કન્ટેનર ટ્રક નંબર MH-04, JK-6477માં ફેવિકોલના બોક્સની આડમાં વિદેશી દારૂનો જથ્થો સંતાડેલ છે અને તે ટ્રક મોગર ગામની નજીક ઉભેલ છે. જેથી આણંદ એલસીબીની ટીમે બાતમીવાળી જગ્યાએ જઇને તપાસ કરતાં ત્યાં એક બંધ બોડીનું કન્ટેનર ટ્રક મળી આવ્યું હતું. જેથી સરકારી વાહન જોતાં જ બે ઇસમો ભાગ્યા હતા. જેમાં એકનો પીછો કરીને ઝડપી પાડીને તેનું નામઠામ પૂછતાં હારીશ જમાલુદ્દીન રૂસ્તમ લુહાર (રહે. સુડાકા, તા. જી. નુહુ, હરિયાણા)નો હોવાનું જણાવ્યું હતું. જેથી કન્ટેનર ટ્રકમાં તપાસ કરતાં પાછળના ભાગે પુંઠાના બોક્સ ગોઠવેલ હતા. તે જોતાં ફેવિકોલ લખેલ જે પુંઠાના બોક્સમાં ફેવિકોલની ડોલ ભરેલી હતી. જે બોક્સ ઉઠાવીને જોતાં કન્ટેનરના વચ્ચેના ભાગમાં ભારતીય બનાવટની વિદેશી દારૂની પેટીઓનાં બોક્સ સંતાડેલ હતા. જેથી પકડાયેલ ઇસમ પાસેથી દારૂની હેરાફેરીનું લાઇસન્સ માંગતાં તેની પાસે નહીં હોવાનું જણાવેલ. જેથી પોલીસે વાસદ પોલીસ સ્ટેશને કન્ટેનર ટ્રક લઇ જઇને અંદરથી વિદેશી દારૂનો નીચે ઉતારીને તપાસ કરતાં વિદેશી દારૂની 133 પેટીઓ બોટલ નંગ 4,188 મળી આવી હતી. જેની કિંમત રૂ. 6,55,980 જેટલી થવા જાય છે. જેમાં કન્ટેનર ટ્રકની કિંમત રૂ. 15 લાખ અને બે મોબાઇલ ફેન રૂ. 10 હજાર તેમજ ફેવિકોલના બોક્સ કુલ 1,649 કિંમત રૂ. 48,28,951 મળીને કુલ રૂ. 69,94,931નો મુદ્દામાલ કબજે કરી વાસદ પોલીસ મથકે બે શખ્સો સામે ગુનો નોંધાવી કાર્યવાહી હાથ ધરી હતી. જેમાં જુનેદ જબ્બારખાન અઠગરીયા (રહે. સુડાકા, તા.જી. નુહુ, હરિયાણા) અંધારાનો લાભ લઇને ફ્રાર થઇ ગયો હતો તેને ઝડપી પાડવા માટે ચક્રો ગતિમાન કર્યા છે.
