- ઉચ્ચક ટ્રાન્સફર ફી, ગેરકાયદે બાંધકામની ફી તથા વિલંબિત દસ્તાવેજો માટે ઉચ્ચક રકમ નક્કી કરાઈ
- મુખ્યમંત્રી ભૂપેન્દ્ર પટેલે ઉચ્ચ કક્ષાની બેઠક યોજી મહત્ત્વના નિર્ણયો લીધા
- સચિવ આર.જી. ગોહિલ સાથે ઉચ્ચ કક્ષાની બેઠક યોજી ત્રણ મહત્ત્વના નિર્ણય લીધા
મુખ્યમંત્રી ભૂપેન્દ્ર પટેલે ગુજરાત હાઉસિંગ બોર્ડના તથા સ્લમ ક્લિયરન્સ સેલના આવાસો સંબંધિત પ્રશ્નો માટે બોર્ડના કમિશનર સંદિપ વસાવા, શહેરી વિકાસ વિભાગના અગ્રસચિવ અશ્વિનીકુમાર, સીએમઓના એસીએસ પંકજ જોશી તથા હાઉસિંગ બાબતોના સચિવ આર.જી. ગોહિલ સાથે ઉચ્ચ કક્ષાની બેઠક યોજી ત્રણ મહત્ત્વના નિર્ણય લીધા છે, જેમાં હાઉસિંગ બોર્ડના મકાનોમાં પ્રત્યેક પાવર ઑફ એટર્નીના આધારે ટ્રાન્સફર ફી વસૂલાતી હતી, તેને બદલે વન ટાઈમ ઉચ્ચક ટ્રાન્સફર ફી નક્કી કરવામાં આવી છે, અગાઉ ગેરકાયદે બાંધકામની વપરાશ ફી જંત્રીના દરે વસૂલવામાં આવતી હતી, તેને બદલે 25 મીટરથી ઓછા અને 25 મીટરથી વધુ ગેરકાયદે બાંધકામ માટે ફી નિયત કરવામાં આવી છે તેમજ બોર્ડના મકાનોમાં હપતા પૂરાં થયા પછી દસ્તાવેજ કરવામાં વિલંબના પ્રતિ વર્ષ દીઠ રૂ. 1 હજાર ચાર્જ વસૂલવામાં આવતો હતો, તેને બદલે હવે વિલંબિત દસ્તાવેજો માટે વનટાઇમ ઉચ્ચક ફી નક્કી કરી દેવામાં આવી છે. ગુજરાત હાઉસિંગ બોર્ડના જૂના અને જર્જરિત મકાનોની કોલોનીઓના રિવડેલપમેન્ટ આડે આ બધી અડચણો દૂર થવાથી હવે ગુજરાત હાઉસિંગ બોર્ડની જૂની કોલોનીઓનું ઝડપથી રિડેવલપમેન્ટ થઈ શકશે, એમ જણાવાયું છે.
