વેરાવળ કેસ પછી એટીએસએ અલગ ગુનો નોંધી કાર્યવાહી આરંભી
વેરાવળના ડ્રગ્સ પ્રકરણમાં વોન્ટેડ ઇસા હુસેન આફ્રિકા નાસી ગયો હોવાનું કહેવાય છે. 3૫૦ કરોડના ડ્રગ્સ મામલામાં પોલીસની તપાસ બાદ આ શખ્સ વિદેશ નાસી ગયો હોવાનું એટીએસના ધ્યાનમાં આવતા હવે તેમની સામે રેડ કોર્નર નોટીસ કાઢવામાં આવી છે. જેથી વિશ્વના કોઇપણ દેશમાં તેની સ્થાનિક પોલીસ તંત્ર દ્વારા ધરપકડ થઇ શકશે અને ભવિષ્યમાં આ શખ્સની ભારતને સોંપણી કરવામાં આવશે.
થોડા સમય પહેલા વેરાવળમાંથી 3૫૦ કરોડનું ડ્રગ્સ પકડાયાના કેસમાં જોડીયાનો ઇસા હુસેન રાવ મુખ્ય સુત્રધાર તરીકે ઉપસી આવ્યો છે. કમનસીબેએ છે ક આફ્રિકન કન્ટ્રીમાંથી ભારતમાં ડ્રગ્સ ઘુસાડવાનું ષડયંત્ર ચલાવતી સિન્ડીકેટનું સંચાલન કરતાં ઇસા હુસેન રાવ સામે અગાઉ ગુનાઓમાં ત્વરીત કાર્યવાહી થઇ ન્હોતી. વર્ષ ૨૦૨૧માં મોરબી અને દ્વારકામાંથી ડ્રગ્સ પકડાવાના કેસમાં ઇસા રાવનું નામ ખુલ્યું હતું તેમ છતાં આંખ આડા કાન કરવામાં આવ્યા હોય તેવી ચોંકાવનારી વિગતો એજન્સીની ઊંડાણભરી તપાસમાં ખુલી રહી છે. પખવાડીયા પહેલા વેરાવળમાં ડ્રગ્સનો જથ્થો જોગાનુજોગ જ પકડાયા પછી એટીએસએ સઘન તપાસ કરી ઇસા હુસેન રાવ અને પરીવાર સામે આઠ કિલો ડ્રગ્સ ઘુસાડીને વેચી નાખવાનો ગુનો નોંધ્યો છે. આફ્રિકન કન્ટ્રીમાં રહેલા રહેલા ઇસા હુસેન રાવ સામે રેડ કોર્નર નોટીસ ઇશ્યુ કરવાની કવાયત શરૂ કરાઇ છે. સાથે જ ઇસાના પરિવાર ઉપર કાયદાકીય સકંજો પણ કસાઇ રહ્યો છે.
વેરાવળથી માછીમારી માટે અરબી સાગરમાં મધદરીયે જતી બોટના ટંડેલને ફોડી લઇને ડ્રગ્સ ગુજરાતના દરિયા કાંઠે ઘુસાડવાના ષડયંત્રમાં જોડીયાનો ઇસા હુસેન રાવ મુખ્ય સુત્રધાર તરીકે ઉપસી આવ્યો છે. વેરાવળથી 3૫૦ કરોડનું ડ્રગ્સ પકડાયા પછી સપાટી પર આવેલી સૌથી ગંભીર બાબત એ છે કે ડ્રગ્સનો આ જથ્થો દાઉદ ગેંગના ઇશારે ભારતમાં ઘુસાડવામાં આવતો હતો. દાઉદ ગેંગની છત્રછાંયામાં ભારતમાં ડ્રગ્સ ઘુસાડવાના ષડયંત્રમાં એક મહોરૂ એવો જોડીયાનો ઇસા હુસેન રાવ વર્ષ ૨૦૨૧થી ડ્રગ્સ સ્મગલિંગમાં સક્રિય છે. આંચકો લાગે તેવી બાબત એ છે કે વર્ષ ૨૦૨૧મં મોરબી અને દ્વારકામાં ગુજરાત એટીએસએ પકડેલા ડ્રગ્સના કેસમાં ઇસા હુસેનનું નામ ખુલી ચુકયું હતું. આમ છતાં આ આરોપીને ત્વરાથી પકડી પાડવામાં આંખ આડા કાન કરાયા હતા. આ પછી વર્ષ ૨૦૨3માં વેચી દેવાયેલા ૮ કીલો હેરોઇન અંગે હવે ગુજરાત એટીએસમાં ગુનો નોંધાયો છે. સવાલ એ છે કે દાઉદ ગેંગના ઇશારે કામ કરતા ઇસાના ડ્રગ્સ સ્મગલિંગના ચાર કારસ્તાન ત્રણ વર્ષમાં પ્રકાશમાં આવ્યા છે. તો ઇસા અને તેની ટોળકી અથવા તો ઇસા જેવા અન્ય તત્વોની મદદથી દાઉદ ટોળકીએ ભારતમાં ડ્રગ્સનો કેટલો જથ્થો ઘૂસાડી દીધો હશે.
નવેમ્બર-૨૦૨૧માં મોરબીના એક મકાનમાંથી ૬૦૦ કરોડનું હેરોઇન પકડાયું હતું. ગુજરાતના દરીયાકાંઠાથી ઘુસાડાયેલા ડ્રગ્સના આ જથ્થાના કેસમાં ત્રણ આરોપી પકડાયા હતા. આ કેસની વધુ તપાસમાં વધુ ૭૭૬ કરોડનું ડ્રગ્સ અને અને ૧૪ લોકો પકડાયા હતા. આ બંને કેસમાં ડ્રગ્સના સ્મગલિંગ અને લેન્ડીંગ કરાવવાના સુત્રધાર તરીકે જોડીયાના ઇસા હુસેન રાવનું નામ ખુલી ચુકયું હતું. ભારતમાં ડ્રગ્સ ઘુસાડતી દાઉદ ગેંગની સક્રિય સિન્ડીકેટ જે વર્ષ ૨૦૨૧માં આ પર્દાફાશ થતાં નાસી છુટેલા ઇસા હુસેન રાવને પહેલા કરાંચી અને હવે આફ્રિકાના કોઇ દેશમાં આશ્રય અપાવવા નોંધપાત્ર ભૂમિકા ભજવી હોવાની વિગતો ભારતીય તપાસ એજન્સીઓને મળી છે.
