- નવા મતદારોને ચૂંટણી કાર્ડ મળી રહે તેને લઈ ઝડપી કામગીરી
- નવા ચૂંટણી કાર્ડ તૈયાર થઈ જતા પોસ્ટ દ્વારા મોકલાઈ રહ્યાં છે ઘરે
- નાગરિકોને મતદાન પ્રત્યે જાગૃતિ આવે તે અંતંર્ગત કાર્યવાહી શરુ
વર્ષ 2024 લોકસભાની ચૂંટણીને હવે માત્ર ગણતરીના દિવસો જ બાકી છે, ત્યારે જામનગર જિલ્લામાં ચૂંટણી અંગેની કાર્યવાહી વહીવટી તંત્ર દ્વારા શરુ કરવામાં આવી છે.જામનગર જિલ્લામાં વહીવટી તંત્ર દ્વારા નવા ઉમેરાયેલા ચૂંટણી કાર્ડ ઘરે-ઘરે પહોંચી જાય અને મતદાન પ્રત્યે જાગૃતિ આવે તે અંતંર્ગત કાર્યવાહી કરાઈ રહી છે.
નવા મતદારોના ચૂંટણીકાર્ડ
લોકસભાની ચૂંટણી ગમે ત્યારે જાહેર કરાય તેવી સ્થિતિ વચ્ચે જામનગર જિલ્લા વહીવટી તંત્રમાં ચૂંટણી સબંધિત કામગીરીનો ધમધમાટ દિવસ-રાત ચાલુ થઈ ચૂક્યો છે. સવારે કચેરીમાં આવેલા કર્મચારીઓ રાત્રે ઘરે જાય છે. એજન્સી દ્વારા બનાવવામાં આવેલા હજારો નવા મતદારોને ચૂંટણી કાર્ડ રીટર્નિંગ અધિકારીની કચેરી મતદારોને ચૂંટણીકાર્ડ મોકલવાની કામગીરી હાલ ચાલુ છે. ફેબ્રુઆરી માસના અંત સુધીમાં 55,644 મતદારોને તેમના નવા ચૂંટણીકાર્ડ કાર્ડ મોકલાઈ ગયા છે.
બીએલઓને પણ સોંપાઈ કામગીરી
બીજી તરફ મદદનીશ ચૂંટણી અધિકારીની કચેરી દ્વારા જામનગર જિલ્લામાં નવા ઉમેરાયેલા અને સુધારો કરાયેલા સાથેના ચૂંટણી કાર્ડ મતદારોને મોકલવાની કામગીરી કરવામાં આવી છે. તંત્ર દ્વારા જે તે વિધાનસભા ક્ષેત્રના રીટર્નીંગ અધિકારીઓ એટલે કે, પ્રાંત અધિકારીની કચેરીને તેના મત વિસ્તારના અથવા તાલુકાના નવા ચૂંટણી કાર્ડ મોકલી આપવામાં આવે છે. જે બાય પોસ્ટ જે તે મતદારે દર્શાવેલા સરનામા પર મોકલવામાં આવે છે. સરનામું ન મળે કે અન્ય કોઈ કારણસર પોસ્ટ પાછી જાય તો જે તે કચેરી દ્વારા કાર્ડ બીએલઓને સોંપીને તેના વિસ્તારમાં ફરીથી રૂબરૂ પહોંચાડવાની કામગીરી પણ કરવામાં આવી રહી છે.
નવા મતદારો નોંધાયાં
ફેબ્રુઆરી માસના અંત સુધીમાં હાલ જામનગર જિલ્લામાં કુલ 12 લાખ 14,516 મતદારો નોંધાયેલા છે. જેમાંથી ૨ લાખ ૭૩,૮૧૧ મતદારો ૧૮ થી ૨૯ વર્ષની વચ્ચેની ઉંમરના છે. જિલ્લામાં આવેલી પાંચ વિધાનસભા બેઠકોના વિસ્તારોના મતદાન મથકો અને મતદારોની વાત કરીએ તો 76-કાલાવડ વિધાનસભા ક્ષેત્રમાં 280 બુથ અને 2,31,070 મતદારો, 77-જામગનર ગ્રામ્યમાં 270 મતદાન મથકો અને 2,57,087 મતદારો, 78-જામનગર (ઉત્તર) બેઠક વિસ્તારમાં 226 મતદાન મથકો અને 2,70,219 મતદારો, 79-જામનગર (દક્ષિણ) બેઠક વિસ્તારમાં 197 મતદાન મથકો અને 2,28,867 મતદારો,80-જામજોધપુર બેઠકના વિસ્તારમાં 268 મતદાન મથકો અને 2,27,012મતદારો નોંધાયેલા છે.
