- ન્યૂયોર્કની એક કોર્ટે ડોનાલ્ડ ટ્રમ્પને દંડ ફટકારી આદેશનું પાલન કરવા જણાવ્યું
- પૂર્વ અમેરિકી રાષ્ટ્રપતિ ડોનાલ્ડ ટ્રમ્પની સમસ્યામાં સતત વધારો
- આદેશનું પાલન નહિ થાય તો ટ્રમ્પને જેલની હવા ખાવનો વારો આવી શકે છે
ડોનાલ્ડ ટ્રમ્પની મુશ્કેલીઓ સતત વધી રહી છે. મંગળવારે તેમના હશ મની (કેસ છુપાવવા માટે આપવામાં આવેલી લાંચ) કેસની સુનાવણી કરતા ન્યાયાધીશે ભૂતપૂર્વ યુએસ પ્રમુખને ગેગ ઓર્ડર (વિચારણા હેઠળના કેસમાં નિવેદનો આપવા પર પ્રતિબંધ)ના ઉલ્લંઘન માટે દોષિત ઠેરવ્યા અને તેમના પર 9000 ડોલર (7.50 લાખ)નો દંડ ફટકાર્યો હતો. આ ઉપરાંત ચેતવણી આપી હતી કે જો તે આવું પુનરાવર્તન કરશે તો તેને જેલમાં જવું પડશે. કોર્ટે ડોનાલ્ડ ટ્રમ્પને સાક્ષીઓ, ન્યાયાધીશો અને હશ મની કેસ સાથે સંબંધિત અન્ય બાબતો વિશે જાહેર નિવેદનો કરવા પર પ્રતિબંધ મૂક્યો હતો.
સર્વેમાં દાવા થયા
ટ્રમ્પ પર 10 વખત ગેગ ઓર્ડરનું ઉલ્લંઘન કરવાનો આરોપ લાગ્યો હતો. જો કે, ન્યાયાધીશ જુઆન એમ. મર્ચને તેને નવ વખત કોર્ટના આદેશોનું ઉલ્લંઘન કરવા બદલ દોષી ઠેરવ્યો હતો. ડોનાલ્ડ ટ્રમ્પ વિચારણા હેઠળના મામલામાં નિવેદનો આપતા હતા અને કહેતા હતા કે તેઓ તેમના ભાષણના સ્વતંત્ર અધિકારનો ઉપયોગ કરી રહ્યા છે. તમને જણાવી દઈએ કે અમેરિકામાં આ વર્ષના અંતમાં રાષ્ટ્રપતિની ચૂંટણી યોજાવા જઈ રહી છે, જેના માટે ડોનાલ્ડ ટ્રમ્પ પણ પોતાનો દાવો રજૂ કરી રહ્યા છે. અમેરિકન એજન્સીઓના તાજેતરના સર્વેમાં વર્તમાન પ્રમુખ જો બાઈડેન અને ટ્રમ્પ વચ્ચે સીધી સ્પર્ધા જોવા મળી છે.
ચૂંટણીમાં સમસ્યા થઈ શકે છે
નેશનલ એન્ક્વાયરર મેગેઝિન પબ્લિશર ડેવિડ પેકરે તાજેતરમાં ભૂતપૂર્વ યુએસ પ્રમુખ ટ્રમ્પ વિરુદ્ધ જુબાની આપી હતી. પેકરે કોર્ટને જણાવ્યું હતું કે તેણે 2016 ની રાષ્ટ્રપતિની ચૂંટણીમાં ડોનાલ્ડ ટ્રમ્પને મદદ કરવા માટે તેના ટેબ્લોઇડનો ઉપયોગ કરવા માટે એક ગોપનીય કરાર કર્યો હતો. હશ મની કેસમાં ડેવિડ પેકર પ્રથમ સાક્ષી છે. પેકરના જણાવ્યા અનુસાર, તેમણે 2015માં ટ્રમ્પને કહ્યું હતું કે નેશનલ એન્ક્વાયરર તેમના વિશે સકારાત્મક કવરેજ આપશે.
ટ્રમ્પે નિર્દોષ હોવાનો દાવો કર્યો
ડોનાલ્ડ ટ્રમ્પે કોર્ટમાં નિર્દોષ હોવાનો દાવો કર્યો છે અને સ્ટોર્મી ડેનિયલ્સ, જેનું સાચું નામ સ્ટેફની ક્લિફોર્ડ છે તેની સાથે કોઈ જાતીય સંબંધ હોવાનો ઇનકાર કર્યો છે. ભૂતપૂર્વ અમેરિકન રાષ્ટ્રપતિ વિરુદ્ધ આ પ્રકારનો આ પહેલો કેસ છે. આ ફોજદારી કેસ ટ્રમ્પ સામે પેન્ડિંગ ચાર કેસમાંથી એક છે, પરંતુ આ એકમાત્ર એવો કેસ હોઈ શકે છે જેનો નિર્ણય ચૂંટણી પહેલા આવે. જો ટ્રમ્પને આ કેસમાં દોષિત ઠેરવવામાં આવે છે તો આગામી રાષ્ટ્રપતિની ચૂંટણીમાં તેમની ઉમેદવારી જોખમમાં આવી શકે છે.
