- થામ ગામે ડમ્પિંગ સાઈટ દુર નહી થતાં બે દિવસથી સ્થાનિક લોકોએ કચરો નાખતા અટકાવ્યા હતા
- સાયખાના લોકોના વિરોધના કારણે સાયખા ખાતેની ડમ્પીંગ સાઈટ શરૂ થઈ શકી નથી.
- તમામ ગામોના રહીશો દ્વારા પણ કચરો ભરીને પસાર થતા વાહનો કે જે ઓવરલોડ હોય છે
થામ ગામની સીમની આજુબાજુના ગામોમાં રહેતા લોકો ફેફસાં સંબંધિત રોગોથી પીડાતાં વિરોધ કર્યો હતો. ભરૂચ પાલિકાની ડમ્પીંગ સાઈટ વરસોથી વિવાદમાં સંપડાઈ છે. તંત્ર દ્વારા સાયખા ગામ ખાતે ડમ્પીંગ સાઈટ માટે જમીનની ફાળવણી કરી હોવા છતાં કોઈ અગમ્ય કારણોસર અને સ્થાનિક સાયખાના લોકોના વિરોધના કારણે સાયખા ખાતેની ડમ્પીંગ સાઈટ શરૂ થઈ શકી નથી.
ભરૂચ પાલિકા આજે અહીંયા તો કાલે બીજે એવી રીતે કચરો ઠાલવવાની રિતિનિતિ અજમાવી હતી. છેલ્લે થામ ગામની સીમમાં ખેતર ભાડે લઈ તેનો ડમ્પીંગ સાઈટ તરીકે ઉપયોગ કરી કચરો ઠાલવવામાં આવતો હતો. તેમાં પણ મળતી માહિતી મુજબ સમી સાંજથી રાત્રિના સમય દરમ્યાન કચરાને સળગાવી દેવામાં આવતો હતો. પરિણામે આજુબાજુના 8 કરતા વધુ ગામોના લોકોના આરોગ્ય પર તેની અસર પડવાની શરૂઆત થઈ ચુકી હતી.
આ અંગે વધુ વિગતે જોતા ભરૂચ નગરનો કચરો થામ ગામની સીમમાં ઠાલવવામાં આવતા અને તેમાં આગ લગાડતા કાળો ડિબાંગ ધૂમાડો કે જેમાં કાર્બન ડાયોકસાઈડનું પ્રમાણ સૌથી વધુ હોય છે. તેથી આજુબાજુના ગામોમાં ફેફસાં સંબંધીત રોગોથી પીડાતા દર્દીઓની સંખ્યા વધતા ડમ્પીંગ સાઈટ માટે વિરોધની શરૂઆત થઈ હતી. સ્થાનિક નેતાઓ સાથે અબ્દુલ કામઠીએ આ બાબતે વિરોધ કર્યો હતો. જેના પગલે રેલી અને આવેદનપત્રો પાઠવતા નગરપાલિકા દ્વારા ત્રણ મહિનાની મુદ્દત માંગવામાં આવી હતી.
આ ત્રણ મહિના દરમીયાન થામ ગામની સાઈટ પરથી ડમ્પીંગ સાઈટ દુર કરવા અંગેનું ભરૂચ નગરપાલિકાના ચીફ ઓફીસરે લેખિતમાં આપ્યુ હતુ. પરંતુ 7 મહિના વીતી ગયા છતાં આ વચનનું પાલન નહી થતા થામ ગામની ડમ્પીંગ સાઈટ પર કચરો ન ઠલવાય તે અંગે લોકોએ વિરોધ કરતા એ ડમ્પીંગ સાઈટ બંધ કરવાની ફરજ ભરૂચ નગરપાલિકાને પડી હતી.
તમામ સમસ્યાઓનો ઉકેલ આવશે તેવું પણ લોલીપોપ અપાયું
ભરૂચ નગરપાલિકા તંત્ર દ્વારા કહેવામાં આવ્યું હતું કે, ડમ્પીંગ સાઈટ સહિતના કચરા અંગેની તમામ સમસ્યાઓનો અંત લાવવાની લોલીપોપ પણ આપવામાં આવ્યુ હતુ. તે વખતે કહેવાતુ હતુ કે, ડોર ટુ ડોર કચરો ઉઘરાવવાની અનિયમિતતાની ફરિયાદ તેમજ અન્ય ફરિયાદો અને કચરા નિકાલની વ્યવસ્થા એટલે કે ડમ્પીંગ સાઈટ આ તમામની વ્યવસ્થા એક જ એજન્સી કરે તેવુ આયોજન કરવામાં આવ્યુ છે અને આ આયોજનનો અમલ ખુબ થોડા દિવસોમાં શરૂ થઈ જશે. આ બાબતને પણ મહિનાઓ વીતી ગયા છતાં આ નવુ આયોજન હજુ લાગુ પડાયુ નથી.
રાજય અને રાષ્ટ્રીય ધોરીમાર્ગ પર ડમ્પિંગ સાઈટની સમસ્યા
જંબુસર બાયપાસ ચોકડીના રાજય ધોરીમાર્ગ સાથે જ હાલમાં શરૂ થયેલ દિલ્હી તરફના રાષ્ટ્રીય ધોરીમાર્ગથી માંડીને તમામ માર્ગો પર આ સમસ્યાઓના પગલે ઘણા પ્રદુષણની બાબતો ઉભી થઈ છે, ત્યારે રસ્તા પરના તમામ ગામોના રહીશો દ્વારા પણ કચરો ભરીને પસાર થતા વાહનો કે જે ઓવરલોડ હોય છે અને તે વાહનો કચરો વેરતા વેરતા જાય છે તેની સામે લેખિતમા વિરોધ કરવામાં આવ્યો હતો તેમજ આવેદન પાઠવવામાં આવ્યુ હતુ.
