દેશમાં વિવિધ બાબતોને લઇને વિવાદ હંમેશા જોવા મળે છે. ત્યારે ક્રિકેટર આર અશ્વિન હવે એક વિવાદમાં આવ્યા છે. મહત્વનું છે કે ઓસ્ટ્રેલિયા પ્રવાસ દરમિયાન જ સ્ટાર સ્પિનર રવિચંદ્રન અશ્વિને આંતરરાષ્ટ્રીય ક્રિકેટને અલવિદા કહી દીધું હતું. અશ્વિનના આ નિર્ણયથી ચાહકો ચોંકી ગયા. ગાબા ટેસ્ટ પછી અશ્વિન ઓસ્ટ્રેલિયાથી ઘરે પરત ફર્યા છે પરંતુ તેઓએ એવુ નિવેદન આપી દીધુ કે નવો વિવાદ છેડાયો છે.
એવુ તો શું બોલ્યા આર. અશ્વિન ?
ચેન્નાઈમાં એક એન્જિનિયરિંગ કોલેજના કાર્યક્રમમાં આર અશ્વિન વિદ્યાર્થીઓને સંબોધિત કરી રહ્યા હતા. જે દરનિયાન આર અશ્વિને કહ્યું કે હિન્દી ભારતની રાષ્ટ્રભાષા નથી. અશ્વિનના આ નિવેદનથી ફરી એકવાર ભાષા પર ચર્ચા શરૂ થઈ ગઈ છે. તેઓ જ્યારે સ્ટેજ પર બોલવા આવ્યા ત્યારે કહ્યું કે જે લોકો અંગ્રેજીમાં સાંભળવા ઇચ્છે છે તેઓ ચીયર કરે. ત્યારે ઓડિયન્સમાંથી કોઇ રિસપોન્સ ન મળ્યો. જ્યારે એમ કહ્યું કે તમિલમાં સાભળવા માગો છો , ત્યારે ઓડિયન્સમાંથી સારો પ્રતિસાદ મળ્યો. તેમણે એમ કહ્યું કે હિંદીમાં સાભળવા ઇચ્છો છો , તો કોઇ ખાસ લોકોનો અવાજ ન આવ્યો. ત્યારે આર અશ્વિન બોલ્યા કે હિન્દી આપણી રાષ્ટ્રભાષા નથી.’ હિન્દી સત્તાવાર ભાષા છે. આમ બોલતા જ કાર્યક્રમમાં લોકો ઉત્સાહિત થઇ ગયા હતા. આ વીડિયો સોશિયલ મીડિયામાં વાયરલ થયો છે.
સોશિયલ મીડિયામાં ચર્ચાઓ તેજ
આર. અશ્વિનના આ નિવેદનથી સોશિયલ મીડિયા પર ચર્ચા શરૂ થઈ ગઈ છે. કેટલાક લોકોએ દલીલ કરી હતી કે અશ્વિને આવા મુદ્દાઓ પર ટિપ્પણી કરવાનું ટાળવું જોઈએ. તો અન્ય એક
યુઝરે ટિપ્પણી કરી હતી કે અશ્વિન પહેલા પણ ઇન્ટરવ્યુમાં કહી ચૂક્યો છે કે જ્યારે તમે તમિલનાડુની બહાર જાઓ છો અને હિન્દી ન આવડતું હોય ત્યારે જીવન કેટલું મુશ્કેલ લાગે છે. શું આપણે આ શીખી ન શકીએ. જે ભારતના મોટાભાગના લોકો જાણે છે ?
રાજકારણ તેજ
આર. અશ્વિનના નિવેદનને ડીમકે નેતા ટીકેએસ એલંગોવને કહ્યું, ‘જ્યારે ઘણા રાજ્યોમાં અલગ અલગ ભાષાઓ બોલાય છે ત્યારે હિન્દી કેવી રીતે સત્તાવાર ભાષા બની શકે?’ જોકે, ભારતીય જનતા પાર્ટી (ભાજપ) એ અપીલ કરી છે કે ભાષા પર ચર્ચા ફરી શરૂ ન થવી જોઈએ. ભાજપના નેતા ઉમા આનંદને કહ્યું કે ડીએમકે આની પ્રશંસા કરે તો નવાઈ નહીં લાગે.’ હું તેમને પૂછવા માંગુ છું કે અશ્વિન રાષ્ટ્રીય ક્રિકેટર છે કે તમિલનાડુનો ક્રિકેટર છે.
ઉલ્લેખનીય છે કે 1930-40ના દાયકામાં તમિલનાડુમાં શાળાઓમાં હિન્દીને ફરજિયાત ભાષા તરીકે લાગુ કરવા સામે ઘણો વિરોધ થયો હતો. દ્રવિડ ચળવળનો ઉદ્દેશ્ય તમિલ ભાષાને પ્રોત્સાહન આપવાનો અને તમિલ બોલનારાઓના અધિકારોનો દાવો કરવાનો હતો. આ ચળવળે હિન્દી ભાષાના વિરોધમાં મુખ્ય ભૂમિકા ભજવી હતી. ડીએમકે, એઆઈએડીએમકે જેવા દ્રવિડિયન રાજકીય પક્ષો લાંબા સમયથી હિન્દીને બદલે તમિલ ભાષાના ઉપયોગની હિમાયત કરી રહ્યા છે. તેમની દલીલ છે કે હિન્દીને પ્રોત્સાહન આપવાથી તમિલ જેવી પ્રાદેશિક ભાષાઓની સ્થાનિક ઓળખ હાંસિયામાં ધકેલાઈ જશે.
હિન્દી રાષ્ટ્રીય ભાષા છે કે સત્તાવાર ભાષા?
તમને જણાવી દઈએ કે હિન્દીને 14 સપ્ટેમ્બર 1949 ના રોજ હિન્દીને સત્તાવાર ભાષાનો દરજ્જો મળ્યો હતો. આ પછી 1953 થી, સત્તાવાર ભાષા પ્રમોશન સમિતિએ દર વર્ષે 14 સપ્ટેમ્બરના રોજ હિન્દી દિવસનું આયોજન કરવાનું શરૂ કર્યું. તેની વિવિધતાને કારણે, ભારતમાં રાષ્ટ્રીય ભાષા નથી, પરંતુ સરકારી કચેરીઓમાં કામકાજ માટે ભાષાકીય આધાર બનાવવા માટે હિન્દીને સત્તાવાર ભાષાનો દરજ્જો આપવામાં આવ્યો હતો. બંધારણના ભાગ 17 માં પણ આ સંબંધિત મહત્વપૂર્ણ જોગવાઈઓ કરવામાં આવી છે. ભારતના બંધારણના ભાગ XVII ના અનુચ્છેદ 343(1) માં જણાવાયું છે કે દેશની સત્તાવાર ભાષા હિંદી અને દેવનાગરી લિપિ હશે.
