વર્ષના પ્રથમ ગ્રાન્ડસ્લેમ ઓસ્ટ્રેલિયન ઓપન ટેનિસ ટૂર્નામેન્ટનો પ્રારંભ થઇ ચૂક્યો છે. પ્રથમ દિવસે વરસાદના કારણે કેટલાક મુકાબલા રદ કરવામાં આવ્યા હતા પરંતુ સોમવારે મોટા ભાગના સ્ટાર ખેલાડીઓ ટેનિસ કોર્ટ ઉપર ઉતર્યા હતા.
પોલેન્ડની ઇગા સ્વિયાતેક, અમેરિકાની કોકો ગોફ તથા ફ્રાન્સના યાનિક સિનર સહિત ક્રમાંકિત ખેલાડીઓએ અપેક્ષા મુજબ બીજા રાઉન્ડમાં પ્રવેશ કર્યો હતો. સોમવારે કેટલાક ભૂતપૂર્વ ચેમ્પિયન ખેલાડીઓનો અભિયાનનો પ્રથમ રાઉન્ડમાં જ અંત આવી ગયો હતો. અમેરિકાની ત્રીજી ક્રમાંકિત કોકો ગોફે પોતાના જ દેશની સોફિયા કેનિનને સીધા સેટમાં 6-3, 6-3થી હરાવી હતી. ગોફે નવેમ્બરમાં ડબ્લ્યૂટીએ ફાઇનલ્સ ટ્રોફી જીતી હતી. 16મી ક્રમાંકિત જેલેના ઓસ્ટાપેન્કોનું અભિયાન પ્રથમ રાઉન્ડમાં જ પૂરું થયું હતું. તેને અનસિડેડ બેનકિચે 6-3, 7-6થી હરાવી હતી. સાતમી ક્રમાંકિત જેસિકા પેગુલાએ જોઇન્ટને 6-3, 6-0થી હરાવી હતી.
મેન્સ સિંગલ્સમાં અમેરિકાના એલેક્સ મિચેલસેને 2023ના ઓસ્ટ્રેલિયન ઓપન રનર્સ-અપ 26 વર્ષના સ્ટેફાનોસ સિત્સિપાસને પ્રથમ રાઉન્ડમાં 7-5, 6-2, 2-6, 6 -4થી હરાવીને બીજા દિવસનો મેજર અપસેટ સર્જ્યો હતો. મિચેલસને કારકિર્દીમાં આ બિગેસ્ટ વિજય પણ હાંસલ કર્યો હતો. 42મું વર્લ્ડ રેન્કિંગ ધરાવતો મિચેલસન ગયા વર્ષે ઓસ્ટ્રેલિયન ઓપનમાં ડેબ્યૂ કર્યા બાદ ત્રીજા રાઉન્ડ સુધી પહોંચ્યો હતો પરંતુ ફ્રેન્ચ ઓપન તથા વિમ્બલ્ડનના પ્રથમ રાઉન્ડમાં જ હારી ગયો હતો. 17મા ક્રમાંકિત ફ્રાન્સિસ્કો ટિયાફોઇએ રિંડરનેકને 7-6, 6-3, 4-6,6-7, 6-3થી, ટોચના ક્રમાંકિત જાનિક સિનરે એન જેરીને સીધા સેટમાં 7-6, 7-6, 6-1થી હરાવીને બીજા રાઉન્ડમાં પ્રવેશ કર્યો હતો.
કિર્સિગોસના અભિયાનનો અંત, કોચિંગ સ્ટાફ ઉપર ગુસ્સે ભરાયો
ઓસ્ટ્રેલિયાના સ્થાનિક ખેલાડી નિક કિર્ગિયોસ મેન્સ સિંગલ્સના પ્રથમ રાઉન્ડમાં હારી ગયો હતો. લગભગ 18 મહિનાના લાંબા સમય બાદ કોર્ટ ઉપર પરત ફરેલા કિર્ગિયોસે હાર્યા બાદ પોતાના કોચિંગ સ્ટાફ ઉપર ગુસ્સો ઉતાર્યો હતો. જોન ચેઇન એરિના ખાતે રમાયેલી આ મેચમાં બ્રિટનના જેકોબ ફેર્નલીએ 2022ના વિમ્બલ્ડન ફાઇનાલિસ્ટ કિર્ગિયોસને 7-6 (7-3), 6-3, 7-6 (7-2)થી પરાજય આપ્યો હતો. આ મુકાબલો બે કલાક 19 મિનિટ સુધી રમાયો હતો. બ્રિટિશ ખેલાડી જેકોબે ગયા વર્ષે ચાર ચેલેન્જર લેવલની ટૂર્નામેન્ટ જીતી હતી અને તેણે એટીપી ટૂર લેવલે આ માત્ર ત્રીજો વિજય મેળવ્યો છે. મેન્સ સિંગલ્સમાં યાશિહિતો નિશિઓકાએ અઝીઝ ડોયુગેઝને ચાર સેટની મેચમાં 3-6, 6-4, 7-6 (7-3), 6-3થી, થાનાસી કોકિનાકિસે રોમન શાફુઉલિન સામે પ્રથમ સેટ હાર્યા બાદ 3-6, 6-3, 6-3, 7-6 (7-5)થી વિજય મેળવ્યો હતો.
નોવાક જોકોવિચે ગ્રાન્ડસ્લેમના ઈતિહાસમાં 378મો વિજય મેળવ્યો
મેન્સ સિંગલ્સમાં વિક્રમી 25મું મેજર ટાઇટલ જીતવાના પ્રયાસમાં રહેલા સર્બિયાના નોવાક જોકોવિચે ભારતીય મૂળના અમેરિકન ખેલાડી બાસાવારેડ્ડીને 4-6, 6-3, 6-4, 6-2થી હરાવીને કારકિર્દીમાં 378મો ગ્રાન્ડસ્લેમ વિજય હાંસલ કર્યો હતો.જોકોવિચ સતત 18મા વર્ષે મેલબોર્ન પાર્ક ખાતેના આ ગ્રાન્ડસ્લેમના બીજા રાઉન્ડમાં પણ પ્રવેશ્યો છે. ફ્રાન્સિસ્કો પાસારોએ ગ્રિગોર ડિમિટ્રોવે વોકઓવર આપતા 7-5, 2-1ના સ્કોર સાથે બીજા રાઉન્ડમાં પ્રવેશ કર્યો હતો.
અમેરિકાના ટોમી પોલે ક્રિસ્ટોફર ઓકોનોલને પાંચ સેટ સુધી રમાયેલા પ્રથમ રાઉન્ડના મુકાબલામાં 6-2, 3-6, 6-1, 6-7 (5-7), 7-5થી અને અલ્કારાઝે એલેકઝાન્ડર શેવચેન્કોને 6-1, 7-5, 6-1થી હરાવ્યો હતો.
ઈગા સ્વિયાતેક સતત 20મા ગ્રાન્ડસ્લેમના બીજા રાઉન્ડમાં
સિંગલ્સમાં પાંચ મેજર ટ્રોફી જીતી ચૂકેલી પોલેન્ડની ઇગા સ્વિયાતેકે સિનિયાકોવાને કોઇ પણ મુશ્કેલી વિના સતત સેટમાં 6-3, 6-3થી હરાવવાની સાથે 2020થી રમેલા તમામ 20 ગ્રાન્ડસ્લેમમાં સતત બીજા રાઉન્ડમાં પ્રવેશ કર્યો છે. 28મી ક્રમાંકિત ઇલેના સ્વિટોલિનાએ સોરેયૂ ક્રિસ્ટીને 6-4, 6-4થી હરાવી હતી. વિક્ટોરિયા અઝારેન્કો અપસેટનો શિકાર બની હતી. તેને બિનક્રમાંકિત ઇટાલીની બ્રોન્જેટ્ટીએ 6-2, 7-6થી પરાજય આપ્યો હતો.
