ઈંગ્લેન્ડ અને ભારત વચ્ચે ટૂંક સમયમાં T20 અને ODI મેચોની સિરીઝ રમાશે. જેના માટે ઈંગ્લેન્ડની ટીમ ભારતની મુલાકાતે જવાની છે. પરંતુ તે પહેલાં, ઈંગ્લેન્ડની ટીમનું ટેન્શન વધી ગયું હોય તેવું લાગે છે. ઈંગ્લેન્ડના એક ખેલાડીને ભારત પ્રવાસ માટે વિઝા મળ્યા નથી, હવે આ ખેલાડી માટે ભારત પહોંચવું થોડું મુશ્કેલ માનવામાં આવી રહ્યું છે.
સાકિબ મહમૂદને ન મળ્યા વિઝા
ભારત સામેની 5 T20 અને 3 ODI મેચની સિરીઝ માટે સાકિબ મહમૂદને પણ ઈંગ્લેન્ડની ટીમમાં સામેલ કરવામાં આવ્યો છે. સાકિબને હજુ સુધી ભારત પ્રવાસ માટે વિઝા મળ્યા નથી. સાકિબ મહમૂદ પાકિસ્તાની મૂળનો છે. હવે શંકા છે કે આ ખેલાડી ભારત સામે રમી શકશે કે નહીં?
મીડિયા રિપોર્ટ મુજબ સાકિબ મહમૂદને હજુ સુધી ભારત પ્રવાસ માટે વિઝા મળ્યા નથી. જમણા હાથના આ ઝડપી બોલર યુએઈ જવા રવાના થવાના હતા, જ્યાં તે દિગ્ગજ જેમ્સ એન્ડરસનની દેખરેખ હેઠળ યોજાનાર શિબિરમાં સાથી ઝડપી બોલરો જોફ્રા આર્ચર, ગુસ એટકિન્સન, બ્રાયડન કાર્સ અને માર્ક વુડ સાથે જોડાશે. યુનાઈટેડ કિંગડમની ઠંડી પરિસ્થિતિમાં બોલિંગ કરી શકતા ન હોવાથી, પરિસ્થિતિને અનુરૂપ બનવા માટે શિબિરનું આયોજન કરવામાં આવ્યું હતું.
27 વર્ષના ખેલાડી સિરીઝમાં ન રમવા પર શંકા
રિપોર્ટમાં એમ પણ કહેવામાં આવ્યું છે કે ઈંગ્લેન્ડ અને વેલ્સ ક્રિકેટ બોર્ડ (ECB) એ સાકિબ મહમૂદનો વિઝા મેળવવામાં નિષ્ફળ જવાથી તેની ફ્લાઈટ રદ કરી દીધી છે. 27 વર્ષીય ખેલાડી સિરીઝમાં ભાગ લેવા માટે ભારતની યાત્રા કરી શકશે કે કેમ તે સ્પષ્ટ નથી. ECB એ હજુ સુધી આ બાબતે કોઈ સત્તાવાર નિવેદન આપ્યું નથી.
અન્ય ખેલાડીઓ સાથે આ પહેલા પણ બની છે આવી ઘટના
આ પહેલી વાર નથી જ્યારે પાકિસ્તાની મૂળના ઈંગ્લેન્ડના ક્રિકેટરને આવી સમસ્યાઓનો સામનો કરવો પડ્યો હોય. 2024માં ભારત અને ઈંગ્લેન્ડ વચ્ચે રમાયેલી 5 મેચની ટેસ્ટ સિરીઝ દરમિયાન, શોએબ બશીરને પણ વિઝા મળવામાં વિલંબ થયો હતો, જેના કારણે તેને સિરીઝની એક મેચ ગુમાવવી પડી હતી.
