રણજી ટ્રોફી 2025 ની એક મેચ મુંબઈ અને જમ્મુ અને કાશ્મીર વચ્ચે રમાઈ હતી. શનિવારે આ મેચમાં જમ્મુ અને કાશ્મીરે મુંબઈને હરાવ્યું હતું. ટીમ ઈન્ડિયાના કેપ્ટન રોહિત શર્મા મુંબઈ તરફથી રમી રહ્યા હતા. આ મેચમાં તે કંઈ ખાસ કરી શક્યો નહીં. પરંતુ મેચ દરમિયાન રોહિતની સુરક્ષામાં મોટી ખામી રહી ગઈ.
એક માણસ મેદાનમાં ઘૂસી ગયો અને રોહિત પાસે પહોંચ્યો. પરંતુ તે પછી તરત જ તેને બહાર કરી દેવામાં આવ્યો. જમ્મુ અને કાશ્મીરની ટીમ બેટિંગ કરી રહી હતી. આ સમય દરમિયાન, રોહિત મુંબઈ માટે ફિલ્ડિંગ કરી રહ્યો હતો. જમ્મુ અને કાશ્મીરની ઈનિંગ દરમિયાન, એક ફેન મેદાનમાં ઘૂસી ગયો અને રોહિત પાસે દોડી ગયો.
આ જોઈને ત્યાં ઉભેલા સુરક્ષા કર્મચારીઓ તરત જ એક્ટિવ થઈ ગયા અને ફેન પાસે પહોંચી ગયા. ફેને રોહિત સાથે હાથ મિલાવ્યા અને ત્યારબાદ તેને બહાર કરી દેવામાં આવ્યો. આ પહેલી વાર નથી જ્યારે કોઈ ફેન મેદાનમાં પ્રવેશ્યો હોય. આવું પહેલા પણ ઘણી વખત બન્યું છે.
જમ્મુ અને કાશ્મીરની જોરદાર જીત
જમ્મુ અને કાશ્મીરે મુંબઈ સામે ઐતિહાસિક જીત નોંધાવી. જમ્મુ અને કાશ્મીરે ડિફેન્ડિંગ ચેમ્પિયન મુંબઈને 5 વિકેટે હરાવ્યું. મુંબઈએ પહેલી ઈનિંગમાં 120 રન અને બીજી ઈનિંગમાં 290 રન બનાવ્યા હતા. ટીમ માટે શાર્દુલ ઠાકુરે પહેલી ઈનિંગમાં અડધી સદી અને બીજી ઈનિંગમાં સદી ફટકારી હતી. પણ આ સિવાય કોઈ ખાસ કંઈ કરી શક્યું નહીં. જવાબમાં, જમ્મુ અને કાશ્મીરે પ્રથમ ઈનિંગમાં 206 રન અને બીજી ઈનિંગમાં 207 રન બનાવીને મેચ જીતી લીધી.
આવું રહ્યું છે રોહિતનું પ્રદર્શન
જમ્મુ અને કાશ્મીર સામે રમાયેલી મેચમાં હિટમેને 3 અને 28 રન બનાવ્યા હતા. આ સિવાય તેને ઓસ્ટ્રેલિયા સામે રમાયેલી છેલ્લી 5 ઈનિંગ્સમાં 3, 9, 10, 3 અને 6 રન બનાવ્યા હતા. જ્યારે ન્યુઝીલેન્ડ સામે હિટમેનના બેટે 6 ઈનિંગ્સમાં 18, 11, 0, 8, 2 અને 52 રન બનાવ્યા હતા. છેલ્લી 13 ઇનિંગ્સમાં રોહિતના બેટમાંથી એક પણ સદી નીકળી નથી.
