અમેરિકાના પ્રમુખ બનતાની સાથે જ ડોનાલ્ડ ટ્રમ્પ એક પછી એક આકરાં અને કડવા નિર્ણયો લઈ રહ્યા છે. તેમણે અમેરિકામાં વર્ષોથી વસતા ગેરકાયદે ઇમિગ્રન્ટસને તેમનાં દેશમાં પાછા મોકલવાનું અભિયાન શરૂ કર્યું છે. ચીન અને યુરોપના કેટલાક દેશો પર ટેરિફ લાદવાની ધમકી આપી છે.
કોલંબિયાના યુએસ.માં વસતા ગેરકાયદે ઇમિગ્રન્ટસને ફરી તેમનાં દેશમાં પાછા મોકલવામાં આવ્યા છે. કોલંબિયાની સરકારે આ વસાહતીઓને સ્વીકારવા ઇનકાર કર્યો તો તરત જ ટ્ર્મ્પે કોલંબિયા પર 25 ટકા ટેરિફ લાદવાની જાહેરાત કરી દીધી. મેક્સિકોની બોર્ડર પર દીવાલ બાંધવાનું કામ ફરી શરૂ કરવા આદેશ આપ્યા છે. પોતાના તાબામાં રહેવા નહીં માંગતા બાંગ્લાદેશને આપવામાં આવતી સહાય બંધ કરી દીધી છે. ફક્ત બાંગ્લાદેશ જ નહીં પાકિસ્તાન જેવા વિકાસશીલ દેશોને આપવામાં આવતી નાણાકીય સહાય બંધ કરવામાં આવી છે. આને લીધે એશિયા અને યુરોપના દેશો માટે સંકટ સર્જાયું છે. ભારત તેમજ આફ્રિકાના દેશોને આની અસર થઈ શકે છે. એવું લાગે છે કે જ્યાં સુધી જે તે દેશને આર્થિક સહાયની વાતને સંબંધ છે ત્યાં સુધી ટ્રમ્પ જે તે દેશ સાથે સ્થિતિની સમીક્ષા કરીને વ્યક્તિગત નિર્ણયો લઈ શકે છે. જે દેશ માટે સહાય કરવાનું જરૂરી લાગશે તેને સહાય કરશે અને અન્ય દેશોની સહાય તદ્દન બંધ કરી શકે છે. અત્યાર સુધી ભારત અને ભારતના પીએમ મોદી જે કરતા આવ્યા છે તે નીતિ હવે ટ્રમ્પ અપનાવવા જઈ રહ્યા છે. ટ્રમ્પ અમેરિકા ફર્સ્ટ અને રાષ્ટ્રહિત પહેલાંની નીતિ પર આગળ ચાલવા માંગે છે. તેઓ વિદેશી સહાયની બાબતમાં અત્યાર સુધી જે લાલિયાવાડી ચાલી આવતી હતી તે બંધ કરવા માંગે છે. પાકિસ્તાને અત્યાર સુધી અમેરિકા પાસેથી શસ્ત્રો અને નાણાકીય સહાય લઈને તેનો ઉપયોગ ભારત સામે લડવામાં અને આતંકવાદને વકરાવવા માટે જ કર્યો છે. બાંગ્લાદેશ અને પાકિસ્તાનને અમેરિકાની સહાય બંધ થઈ જતા હવે તેની બોલતી બંધ થઈ ગઈ છે. બંને દેશો સામે મોટું સંકટ ઘેરાયું છે. અમેરિકાના પૈસે અત્યાર સુધી કરવામાં આવતા તાગડધિન્ના અચાનક બંધ થઈ ગયા છે. ટ્રમ્પ સત્તા પર આવ્યા પછી અમેરિકાના રાષ્ટ્રીય હિતનો આખો દ્રષ્ટિકોણ બદલાઈ ગયો છે. 2023માં અમેરિકાએ વિશ્વના કેટલાક દેશોને 72 અબજ ડૉલરની સહાય કરી હતી. તેની આ સહાય શરતી હતી. જેમાં અમેરિકાના હિતો સમાયેલા હતા. ટ્રમ્પે પૈસાના જોરે કેટલાક દેશોને ઓબલાઇજ કરવાનું બંધ કરી દીધું છે. હવે તેઓ બ્લેન્ક બાજી રમવા માંગે છે. જેમાં એક ઘા ને બે કટકા જેવી વાત દેખાઈ રહી છે. ભારત સરકારે છેલ્લા કેટલાક વખતથી શરતી સહાય સ્વીકારવાનું બંધ કરી દીધું છે એટલે ભારતને ટ્રમ્પના નિર્ણયની બહુ અસર પડે તેવી સંભાવના ઓછી છે.
