સરકારની તિજોરી ટેક્સની આવકથી છલકાઈ
10 ઓગસ્ટ સુધીમાં આવક 8.11 લાખ કરોડે પહોંચી
ડાયરેક્ટ ટેક્સ વસૂલાતમાં 23 ટકાનો ઉછાળો : ગ્રોસ કલેકશન રૂ.9.55 લાખ કરોડે પહોંચ્યું
રૂ.1.43 લાખ કરોડના રિફંડ છતાં કર આવકમાં મજબૂત વૃદ્ધિ : STTની આવકમાં 51 ટકાનો જંગી વધારો
અગ્ર ગુજરાત, નવી દિલ્હી
દેશની અર્થવ્યવસ્થામાં કરવેરાની વસૂલાતના મોરચે સરકારને મોટી રાહત મળી છે. ચાલુ નાણાકીય વર્ષમાં 10 ઓગસ્ટ સુધીમાં નેટ ડાયરેક્ટ ટેક્સ કલેકશન રૂ.8.11 લાખ કરોડને પાર પહોંચી ગયું છે. ગયા વર્ષના સમાન સમયગાળાની સરખામણીએ તેમાં 23.09 ટકાની વૃદ્ધિ નોંધાઈ છે. આ આંકડા દર્શાવે છે કે આવકવેરા વસૂલાતમાં તેજી સાથે કરદાતાઓનું પાલન પણ સુધરી રહ્યું છે.
સેન્ટ્રલ બોર્ડ ઓફ ડાયરેક્ટ ટેક્સીસ (CBDT)ના આંકડા મુજબ 10 ઓગસ્ટ સુધીમાં કુલ ડાયરેક્ટ ટેક્સ કલેકશન રૂ.9.55 લાખ કરોડ થયું છે. ગયા વર્ષે આ સમયગાળામાં ગ્રોસ કલેકશન આશરે રૂ.7.97 લાખ કરોડ હતું. એટલે કે એક વર્ષમાં કુલ વસૂલાતમાં લગભગ 19.75 ટકાનો વધારો થયો છે.
ખાસ વાત એ છે કે સરકાર દ્વારા આ સમયગાળા દરમિયાન કરદાતાઓને રૂ.1.43 લાખ કરોડના રિફંડ પણ આપવામાં આવ્યા છે. તેમ છતાં નેટ ટેક્સ કલેકશન રૂ.8.11 લાખ કરોડ સુધી પહોંચ્યું છે. રિફંડની રકમ ગયા વર્ષની સરખામણીએ 3.79 ટકા વધુ છે.
ડાયરેક્ટ ટેક્સની આવકમાં કોર્પોરેટ સેક્ટરનો ફાળો પણ મજબૂત રહ્યો છે. નેટ કોર્પોરેટ ટેક્સ કલેકશન રૂ.2.70 લાખ કરોડ થયું છે, જે ગયા વર્ષે રૂ.2.26 લાખ કરોડ હતું. બીજી તરફ નોન-કોર્પોરેટ ટેક્સની નેટ વસૂલાત રૂ.5.07 લાખ કરોડે પહોંચી છે, જ્યારે ગયા વર્ષે આ આંકડો રૂ.4.11 લાખ કરોડ હતો. આ કેટેગરીમાં વ્યક્તિગત કરદાતાઓ સહિત અનેક શ્રેણીઓનો સમાવેશ થાય છે.
શેરબજારની વધતી પ્રવૃત્તિની અસર સરકારની આવક પર પણ સ્પષ્ટ દેખાઈ રહી છે. સિક્યોરિટીઝ ટ્રાન્ઝેક્શન ટેક્સ એટલે કે STTમાંથી નેટ વસૂલાત રૂ.33,823.74 કરોડ થઈ છે. ગયા વર્ષે આ જ સમયગાળામાં રૂ.22,354.31 કરોડની આવક થઈ હતી. એટલે કે STTની વસૂલાતમાં લગભગ 51 ટકાનો જંગી વધારો નોંધાયો છે.
ગ્રોસ કોર્પોરેટ ટેક્સ કલેકશન પણ રૂ.3.32 લાખ કરોડથી વધીને રૂ.3.80 લાખ કરોડ થયું છે. નોન-કોર્પોરેટ ટેક્સની કુલ વસૂલાત રૂ.4.43 લાખ કરોડથી વધીને રૂ.5.41 લાખ કરોડ થઈ છે. આ આંકડા દર્શાવે છે કે સરકારની આવકમાં કંપનીઓ ઉપરાંત વ્યક્તિગત કરદાતાઓ અને અન્ય કાનૂની સંસ્થાઓનો ફાળો પણ વધી રહ્યો છે.
ડાયરેક્ટ ટેક્સમાં આવી રહેલી સતત તેજી સરકારની નાણાકીય સ્થિતિ માટે મહત્વપૂર્ણ માનવામાં આવે છે. વધુ કર આવકના કારણે સરકારને માળખાગત સુવિધા, વિકાસલક્ષી યોજનાઓ, સંરક્ષણ તથા સામાજિક કલ્યાણ પાછળ ખર્ચ કરવાની વધુ નાણાકીય ક્ષમતા મળી શકે છે. સાથે જ રાજકોષીય ખાધને નિયંત્રણમાં રાખવામાં પણ આ વધતી આવક મદદરૂપ બની શકે છે.
એકંદરે, ઓગસ્ટના પ્રારંભ સુધીના આ આંકડા સરકાર માટે ‘બલ્લે બલ્લે’ કરાવનારા છે. કોર્પોરેટ કમાણી, વ્યક્તિગત આવકવેરો અને શેરબજારના વ્યવહારોમાંથી વધેલી આવકના સંયુક્ત પરિણામે સરકારી તિજોરીમાં નાણાંનો પ્રવાહ મજબૂત બન્યો છે.
નેટ ડાયરેક્ટ ટેક્સ : રૂ.8.11 લાખ કરોડ
10 ઓગસ્ટ સુધીમાં નેટ ડાયરેક્ટ ટેક્સ કલેકશન રૂ.8.11 લાખ કરોડ થયું છે. વાર્ષિક ધોરણે તેમાં 23.09 ટકાનો વધારો નોંધાયો છે.
ગ્રોસ ડાયરેક્ટ ટેક્સ : રૂ.9.55 લાખ કરોડ
રિફંડ પહેલાં સરકારની કુલ ડાયરેક્ટ ટેક્સ વસૂલાત રૂ.9.55 લાખ કરોડે પહોંચી છે. ગયા વર્ષની સરખામણીએ તેમાં 19.75 ટકાનો ઉછાળો છે.
ટેક્સ રિફંડ : રૂ.1.43 લાખ કરોડ
સરકારે કરદાતાઓને અત્યાર સુધીમાં રૂ.1.43 લાખ કરોડના રિફંડ જારી કર્યા છે. રિફંડની રકમમાં પણ 3.79 ટકાનો વધારો થયો છે.
કોર્પોરેટ ટેક્સ : રૂ.2.70 લાખ કરોડ
નેટ કોર્પોરેટ ટેક્સ વસૂલાત રૂ.2.70 લાખ કરોડ થઈ છે. ગયા વર્ષે આ આંકડો રૂ.2.26 લાખ કરોડ હતો.
નોન-કોર્પોરેટ ટેક્સ : રૂ.5.07 લાખ કરોડ
વ્યક્તિગત કરદાતાઓ સહિત નોન-કોર્પોરેટ કેટેગરીમાંથી નેટ રૂ.5.07 લાખ કરોડની વસૂલાત થઈ છે.
STTમાં 51%નો ઉછાળો
શેરબજારના વ્યવહારો પરથી વસૂલાતા STTની નેટ આવક રૂ.33,823.74 કરોડ થઈ છે. ગયા વર્ષે રૂ.22,354.31 કરોડની સામે આ વખતે લગભગ 51 ટકા વધારો થયો છે.
