ઉપલેટામાં ભાજપ મહિલા મોરચાના કારોબારી સભ્ય સહિત સાત મહિલાઓ જુગાર રમતા ઝડપાઈ
રોકડ સહિત રૂ.૧૬ હજારનો મુદામાલ પોલીસે જપ્ત કર્યો
અગ્ર ગુજરાત,
ઉપલેટા શહેરમાં શહીદ અર્જુન રોડ પર આવેલા ખોડલધામ ચોકની બાજુમાં એક રહેણાંક મકાનમાં ચાલતા જુગારધામ પર પોલીસે બાતમીના આધારે સફળ દરોડો પાડ્યો હતો. આ દરોડા દરમિયાન ગંજીપત્તાના પાના વડે તીનપત્તીનો જુગાર રમતી કુલ સાત મહિલાઓને પોલીસે ઝડપી પાડી કાયદેસરની કાર્યવાહી હાથ ધરી છે.
પોલીસ ફરિયાદ અનુસાર, ઉપલેટા પોલીસ સ્ટેશનના હેડ કોન્સ્ટેબલ અને સ્ટાફ પેટ્રોલિંગમાં હતા તે દરમિયાન ખાનગી બાતમી મળી હતી કે ઉપલેટામાં રહેતા ગીતાબેન કમલેશભાઈ પરમાર પોતાના રહેણાંક મકાનમાં બહારથી મહિલાઓને બોલાવી, પોતાના અંગત આર્થિક ફાયદા માટે દરેક રમત દીઠ નાલ ઉઘરાવી જુગારનો અખાડો ચલાવે છે. ધોરાજી વિભાગના મદદનીશ પોલીસ અધિક્ષક પાસેથી જુગારધારા કલમ-૬ મુજબનું વોરંટ મેળવીને પંચોની હાજરીમાં આ મકાનમાં રેડ કરવામાં આવી હતી.
પોલીસની આ કાર્યવાહીમાં મકાન માલિક ગીતાબેન કમલેશભાઈ પરમાર (ઉ.વ. ૪૩) ઉપરાંત જુગાર રમવા આવેલા રશ્મીતાબેન વિજયભાઈ ઘુંજારીયા, નીલાબેન રાજેશભાઈ ભાલોડીયા, ગીતાબેન હેમલભાઈ ધામેચા, વર્ષાબેન કિશોરભાઈ મારડીયા, શિલ્પાબેન જેંતીભાઈ વાછાણી અને રાણીબેન જગમાલભાઈ બારૈયા રંગેહાથ ઝડપાઈ ગયા હતા. પ્રાપ્ત વિગતો અનુસાર, ઝડપાયેલા મહિલાઓ પૈકી રાણીબેન બારૈયા રાજકોટ જિલ્લા ભાજપ મહિલા મોરચાના કારોબારી સભ્ય તરીકે હોદ્દો ધરાવે છે તેવું જાણવા મળી રહ્યું છે.
પોલીસે ઘટનાસ્થળેથી ગંજીપત્તાના ૫૨ પાના અને રોકડા રૂ. ૧૬,૬૩૦ નો મુદ્દામાલ તેમજ પુરાવા અર્થે મકાનનું લાઈટબીલ કબજે કર્યું છે. ઉપલેટા પોલીસે તમામ સાત મહિલાઓની ધોરણસર અટકાયત કરી તેમની વિરુદ્ધ જુગાર અટકાયતી અધિનિયમની કલમ ૪ અને ૫ હેઠળ ગુનો નોંધી આગળની કાયદેસરની તપાસ હાથ ધરી છે જેમાં જુગારની આ રેડમાં જિલ્લા ભાજપના મહિલા આગેવાનનું નામ ખુલતા અને તેમની સામે ફરિયાદ નોંધાતા અંગે રાજકીય ગરમા ગરમી પણ શરૂ થઈ છે.
