ચેમ્પિયન્સ ટ્રોફી 2025 ના પહેલા રાઉન્ડમાંથી બહાર થવાના દર્દમાંથી પાકિસ્તાન ક્રિકેટ ટીમ હજુ બહાર થઈ નથી કે તેને વધુ એક મોટો ઝટકો પડી શકે છે. પાકિસ્તાનના સ્ટાર બેટરે પાકિસ્તાની ટીમની ચિંતા વધારી છે.
પાકિસ્તાનના સ્ટાર બેટરે ફખર ઝમાને સોશિયલ મીડિયા પર એક પોસ્ટ શેર કરી છે, જેના પછી ચર્ચાઓ શરૂ થઈ ગઈ છે કે તે નિવૃત્તિ લેવાનો છે. તમને જણાવી દઈએ કે, ફખર ઝમાન 2025 ચેમ્પિયન્સ ટ્રોફી ટીમનો ભાગ હતો, પરંતુ પહેલી મેચમાં ઈજાને કારણે તે ટુર્નામેન્ટમાંથી બહાર થઈ ગયો હતો.
ફખર ઝમાને શેર કરી પોસ્ટ
પાકિસ્તાનના ઓપનર ફખર ઝમાન ચેમ્પિયન્સ ટ્રોફીમાંથી બહાર થઈ ગયો હતો પરંતુ મીડિયા રિપોર્ટ મુજબ તે નિવૃત્તિ લેવાનું વિચારી રહ્યો છે. મીડિયા રિપોર્ટ મુજબ 34 વર્ષીય ફખરે હવે નિવૃત્તિ લેવાનું મન બનાવી લીધું છે. પરંતુ ફખરે હજુ સુધી આ વાતની સત્તાવાર પુષ્ટિ કરી નથી, પરંતુ તેને સોશિયલ મીડિયા પર કંઈક એવું લખ્યું છે જેનાથી તેની નિવૃત્તિના સમાચારને વેગ મળ્યો છે.
ફખર ઝમાને કહી આ વાત
પાકિસ્તાનના સ્ટાર ક્રિકેટર ફખર ઝમાને ઈન્સ્ટાગ્રામ પર પોસ્ટ કરીને લખ્યું કે, સૌથી મોટા મંચ પર પાકિસ્તાનનું પ્રતિનિધિત્વ કરવું એ આ દેશના દરેક ક્રિકેટર માટે એક સ્વપ્ન જેવું છે અને તે એક સન્માનની વાત છે. મને ગર્વ છે કે મને ઘણી વખત પાકિસ્તાનનું પ્રતિનિધિત્વ કરવાનો લહાવો મળ્યો છે. કમનસીબે હું હવે ICC ચેમ્પિયન્સ ટ્રોફી 2025માંથી બહાર થઈ ગયો છું, પરંતુ ચોક્કસ અલ્લાહ દરેક માટે શ્રેષ્ઠ યોજના ધરાવે છે. હું આ તક માટે ખૂબ આભારી છું. હવે હું ઘરે બેસીને લીલા કપડાં પહેરીને મારી ટીમને સપોર્ટ કરીશ. આ તો ફક્ત શરૂઆત છે, આ આંચકા કરતાં કમબેક વધુ મજબૂત હશે.
ફખર ઝમાન શા માટે નિવૃત્તિ લેવા માંગે છે?
ફખર ઝમાન 34 વર્ષની ઉંમરે અચાનક કેમ નિવૃત્તિ લેવા માંગે છે? આ સવાલ દરેક ક્રિકેટ ફેન્સના મનમાં આવતો હશે. હકીકતમાં, તેમના નિર્ણય પાછળનું મુખ્ય કારણ તેમની ફિટનેસ સંબંધિત સમસ્યા હોવાનું માનવામાં આવે છે. ફખર ઝમાન હાઈપરથાઈરોઈડિઝમથી પીડાઈ રહ્યો છે, જેના કારણે તેને ICC ચેમ્પિયન્સ ટ્રોફી 2025 પણ ગુમાવવી પડી હતી. રિપોર્ટમાં એ પણ ખુલાસો થયો છે કે તે સિલેક્ટર્સના નિર્ણયોથી નારાજ હતો, ખાસ કરીને વિદેશી લીગમાં રમવા માટે એનઓસીથી. ફખર ઝમાન તેના પરિવાર સાથે વિદેશ જવાનું વિચારી રહ્યો છે.
ફખર ઝમાનનો રેકોર્ડ
2017 ચેમ્પિયન્સ ટ્રોફીના હીરો ફખર ઝમાનના આંકડા વિશે વાત કરીએ તો, તેને પોતાના દેશ માટે કુલ 86 ODI મેચ રમી છે, જેમાં તેને 46.22 ની એવરેજથી 3890 રન બનાવ્યા છે. આ સમયગાળા દરમિયાન, તેના બેટમાંથી 11 સદીઓ આવી, જેમાં એક બેવડી સદીનો સમાવેશ થાય છે. તેને 92 T20I મેચોમાં 132.95 ના સ્ટ્રાઈક રેટથી 1848 રન બનાવ્યા છે. ફખર ઝમાન પાકિસ્તાન માટે 3 ટેસ્ટ મેચ પણ રમ્યા હતા, જેમાં તેને 359 રન બનાવ્યા છે.
