કેનેડામાં ભારત વિરુદ્ધ કાવતરાં કોઈ નવી વાત નથી. ખાલિસ્તાની પ્રવૃત્તિઓથી લઈને રાજદ્વારી તણાવ સુધી, છેલ્લા કેટલાક વર્ષોમાં બંને દેશો વચ્ચેના સંબંધોમાં કડવાશ સ્પષ્ટપણે દેખાઈ રહી છે. પરંતુ આ જ કેનેડામાં ભારતીય મૂળના પાંચ નેતાઓએ ચૂંટણી જીતીને એક નવો ઇતિહાસ રચ્યો છે. ઓન્ટારિયો વિધાનસભાની ચૂંટણીમાં અનેક અગ્રણી મંત્રીઓ સહિત પાંચ ઈન્ડો-કેનેડિયન ઉમેદવારોએ જીત મેળવી. આ ચૂંટણી પ્રોગ્રેસિવ કન્ઝર્વેટિવ પાર્ટી માટે મહત્વપૂર્ણ હતી. જેણે સતત ત્રીજી વખત સત્તા મેળવી છે.
ટ્રમ્પની નીતિઓને કારણે વહેલી ચૂંટણીઓ
કેનેડામાં ભારત વિરોધી ભાવના વધી રહી છે. ત્યારે ભારતીય-કેનેડિયનોએ ચૂંટણી જીતી છે. ઓન્ટારિયો વિધાનસભા ચૂંટણીમાં પાંચ ઇન્ડો-કેનેડિયન ઉમેદવારો જીત્યા, જેમાં ઘણા અગ્રણી મંત્રીઓનો પણ સમાવેશ થાય છે. આ ચૂંટણી પ્રોગ્રેસિવ કન્ઝર્વેટિવ પાર્ટી માટે મહત્વપૂર્ણ હતી, જેણે સતત ત્રીજી વખત સત્તા મેળવી છે. ઑન્ટારિયો વિધાનસભાનો કાર્યકાળ 2026 સુધી હતો, પરંતુ પ્રીમિયર ડગ ફોર્ડે આશ્ચર્યજનક ચૂંટણી બોલાવી. તેમણે યુએસ રાષ્ટ્રપતિ ડોનાલ્ડ ટ્રમ્પના ટેરિફની ધમકીનો ઉલ્લેખ કરીને મજબૂત જનાદેશ માંગ્યો. જોકે, અહેવાલો સૂચવે છે કે ફોર્ડ રાજકીય લાભ મેળવવા માટે પહેલાથી જ વહેલી ચૂંટણીઓ યોજવાની યોજના બનાવી રહ્યો હતો. આ ચૂંટણીમાં, વિપક્ષે ફોર્ડ પર નિશાન સાધ્યું અને કહ્યું કે તેમણે પ્રચાર દરમિયાન વોશિંગ્ટનની બે સત્તાવાર મુલાકાતો કરીને ચૂંટણી શિષ્ટાચારનું ઉલ્લંઘન કર્યું. પરંતુ આ ટીકાઓ છતાં, તેમની પાર્ટીએ લગભગ 80 બેઠકો જીતીને બહુમતી મેળવી. જોકે, 2022માં 83 બેઠકોની સરખામણીમાં આ આંકડો થોડો ઓછો હતો.
કયા ભારતીય મૂળના નેતાઓ જીત્યા?
આ ચૂંટણીમાં જીત મેળવનારા પાંચ ભારતીય-કેનેડિયનો ગ્રેટર ટોરોન્ટો વિસ્તારમાંથી આવે છે. ટ્રાન્સપોર્ટ મંત્રી પ્રભમીત સરકારિયા, બ્રેમ્પટન સાઉથથી 53% મતો સાથે જીત્યા. તો હાઉસિંગના સહયોગી મંત્રી નીના ટાંગરી, મિસિસૌગા-સ્ટ્રીટ્સવિલેથી સતત ત્રીજા કાર્યકાળ માટે 48% મત સાથે ચૂંટાયા. તો આ તરફ, હરદીપ ગ્રેવાલ બ્રેમ્પટન ઈસ્ટથી જીત્યા, વર્ષ 2022માં પહેલી વાર ધારાસભ્ય બન્યા. તો અમરજોત સંધુ ત્રીજી વખત બ્રેમ્પટન વેસ્ટથી જીતીને વિધાનસભા પહોંચ્યા છે. તો બીજી તરફ, દીપક આનંદ મિસિસૌગા-માલ્ટનથી ફરીથી ચૂંટણી જીતવામાં સફળ રહ્યા છે.
