ધનતેરસ પર ગ્રાહકોને રાહત
સોનામાં રૂ.૧૯૯૪ અને ચાંદીમાં રૂ.3૪૪૦નો ભાવમાં થયો ઘટાડો
ગોલ્ડ રૂ.૧.૪૨ લાખને સિલ્વર રૂ.૧.૮3 લાખે પહોંચ્યુ : બજારમાં ખરીદીનો માહોલ
અગ્ર ગુજરાત, મુંબઇ
ધનતેરસ એટલે સોના-ચાંદીની ખરીદી માટેનો ખાસ દિવસ. ભારતીય પરંપરામાં આ દિવસે કિંમતી ધાતુઓ ખરીદવાનું વિશેષ મહત્ત્વ હોવાથી જ્વેલરી બજારમાં ગ્રાહકોની નજર સોના અને ચાંદીના ભાવ પર રહે છે. આ વખતે ધનતેરસના દિવસે જ ખરીદદારો માટે રાહતના સમાચાર સામે આવ્યા છે. છેલ્લા કેટલાક દિવસોથી સતત તેજી તરફ આગળ વધી રહેલા સોના અને ચાંદીના ભાવમાં અચાનક મોટો ઘટાડો નોંધાયો છે. મલ્ટી કોમોડિટી એક્સચેન્જ (MCX) પર ચાંદી પ્રતિ કિલોગ્રામ ₹3,440 અને સોનું પ્રતિ 10 ગ્રામ ₹1,994 સુધી ગગડતાં બજારમાં ચર્ચા શરૂ થઈ છે.
MCX પર ચાંદીના વાયદામાં શુક્રવારે જોરદાર વેચવાલી જોવા મળી હતી. ગુરુવારનું અગાઉનું ક્લોઝિંગ ₹1,87,140 પ્રતિ કિલોગ્રામ રહ્યું હતું. શુક્રવારે બજાર ખુલતાં ચાંદી ₹1,85,499ના સ્તરે પહોંચી હતી. જોકે, ત્યારબાદ વેચવાલીનું દબાણ વધતાં ચાંદીનો ભાવ ઘટીને ₹1,83,700ની નીચલી સપાટીએ પહોંચ્યો હતો. આમ, અગાઉના બંધ ભાવની સરખામણીએ ચાંદીમાં ₹3,440નો ઘટાડો નોંધાયો હતો.
ચાંદીની સાથે સોનાના ભાવમાં પણ નોંધપાત્ર ઘટાડો જોવા મળ્યો હતો. MCX પર સોનાનું અગાઉનું ક્લોઝિંગ ₹1,44,095 પ્રતિ 10 ગ્રામ હતું. શુક્રવારે બજાર ખુલતાં ભાવ ₹1,42,161 પર પહોંચ્યો હતો. કારોબાર દરમિયાન સોનાએ ₹1,42,601ની ઊંચી સપાટી બનાવી હતી, પરંતુ ત્યારબાદ વેચવાલી વધતાં ભાવ ઘટીને ₹1,42,101ની નીચલી સપાટીએ પહોંચ્યો હતો. આ રીતે અગાઉના બંધ ભાવની સરખામણીએ સોનામાં ₹1,994નો ઘટાડો નોંધાયો હતો.
આંતરરાષ્ટ્રીય બજારમાં પણ સોના-ચાંદીની ચમક ઘટી
સ્થાનિક બજારની સાથે આંતરરાષ્ટ્રીય બજારમાં પણ કિંમતી ધાતુઓ પર દબાણ જોવા મળ્યું હતું. કોમેક્સ બજારમાં સોનાના ભાવમાં 1.31%નો ઘટાડો નોંધાઈ પ્રતિ ઔંસ $4,059.90 આસપાસ કારોબાર થયો હતો. બીજી તરફ ચાંદીમાં 1.41%નો ઘટાડો થતાં ભાવ પ્રતિ ઔંસ $51.640 સુધી પહોંચ્યો હતો. ડોલરની સ્થિતિ, વૈશ્વિક બજારના સંકેતો અને અગાઉની તેજી બાદ રોકાણકારો દ્વારા કરવામાં આવેલી નફારૂપી વેચવાલી કિંમતી ધાતુઓના ભાવમાં ઘટાડા પાછળનાં સંભવિત કારણો છે.
