આજે મહિલા પ્રીમિયર લીગ (WPL) માં મુંબઈ ઈન્ડિયન્સનો મુકાબલો યુપી વોરિયર્સ સાથે થયો. આ મેચમાં મુંબઈ ઈન્ડિયન્સે યુપી વોરિયર્સને 6 વિકેટે હરાવ્યું. આ મેચમાં મુંબઈ ઈન્ડિયન્સને જીતવા માટે 151 રનનો લક્ષ્યાંક મળ્યો હતો, જે મુંબઈએ 4 વિકેટ ગુમાવીને પ્રાપ્ત કર્યો હતો.
હેલી મેથ્યુઝે મેચનો રસ્તો બદલ્યો
151 રનના લક્ષ્યાંકનો પીછો કરવા ઉતરેલી મુંબઈ ઈન્ડિયન્સની શરૂઆત સારી રહી ન હતી. ટીમની પહેલી વિકેટ માત્ર 24 રનમાં પડી ગઈ. અમેલિયા કેર 13 બોલમાં 10 રન બનાવીને આઉટ થઈ ગઈ. તેને હેનરીએ આઉટ કરી. તેના આઉટ થયા પછી, નેટ સિવર-બ્રન્ટ અને હેલી મેથ્યુઝે ઈનિંગ્સની કમાન સંભાળી. બંનેએ 92 રનની ભાગીદારી કરી.
આ દરમિયાન, નેટ સિવર-બ્રન્ટ 23 બોલમાં 37 રન બનાવીને આઉટ થઈ. તેણે પોતાની ઈનિંગ દરમિયાન 7 ચોગ્ગા ફટકાર્યા. બીજી તરફ, હેલી મેથ્યુઝે 46 બોલમાં 68 રન બનાવીને મુંબઈ ઈન્ડિયન્સની જીત સુનિશ્ચિત કરી. તેણે 46 બોલમાં 68 રનની ઈનિંગ રમી. પોતાની ઈનિંગ દરમિયાન તેણે 8 ચોગ્ગા અને 2 છગ્ગા ફટકાર્યા.
જ્યોર્જિયા વોલે ફટકારી અડધી સદી
પ્રથમ બેટિંગ કરતા, યુપી વોરિયર્સે મુંબઈ ઈન્ડિયન્સ સામે નવ વિકેટે 150 રન બનાવ્યા. ટીમ માટે ઓપનર જ્યોર્જિયા વોલે શાનદાર ફિફ્ટી ફટકારી. તેણે 33 બોલમાં 12 ચોગ્ગાની મદદથી 55 રન બનાવ્યા. યુપી વોરિયર્સ માટે, ઓપનર ગ્રેસ હેરિસે 28 રન સાથે મહત્વપૂર્ણ યોગદાન આપ્યું અને કેપ્ટન દીપ્તિ શર્માએ અણનમ 27 રન બનાવ્યા.
મુંબઈ ઈન્ડિયન્સ તરફથી અમેલિયા કેરે 5 વિકેટ લીધી. તેના સિવાય હેલી મેથ્યુઝે બે વિકેટ લીધી જ્યારે નેટ સિવર બ્રન્ટ અને પરુણિકા સિસોદિયાએ એક-એક વિકેટ લીધી.
મુંબઈ ઈન્ડિયન્સ પ્લેઓફની નજીક
મુંબઈ ઈન્ડિયન્સના 6 મેચમાં 4 જીત બાદ હવે 8 પોઈન્ટ છે અને ટીમ પોઈન્ટ ટેબલમાં બીજા સ્થાને આવી ગઈ છે. અત્યાર સુધી, ફક્ત દિલ્હી કેપિટલ્સ જ પ્લેઓફ માટે ક્વોલિફાય થઈ શક્યું છે અને તેઓ હાલમાં 10 પોઈન્ટ સાથે ટોપ પર છે. આ પછી, મુંબઈ પાસે હજુ પણ 2 મેચ બાકી છે, જેમાંથી કોઈપણ એક મેચ જીતીને, મુંબઈ ઈન્ડિયન્સ પણ પ્લેઓફમાં સ્થાન મેળવશે. જો આવું થાય, તો મુંબઈ ઈન્ડિયન્સ માટે આ સતત ત્રીજી વખત પ્લેઓફમાં પહોંચશે.
