વિમેન્સ પ્રીમિયર લીગ 2025માં, 6 માર્ચે મુંબઈ ઈન્ડિયન્સ અને યુપી વોરિયર્સ વચ્ચે મેચ રમાઈ હતી. આ મેચ જીતીને મુંબઈ ઈન્ડિયન્સે ટોપ-2માં સ્થાન મેળવી લીધું છે, પરંતુ મેચ બાદ મુંબઈ ઈન્ડિયન્સની કેપ્ટન હરમનપ્રીત કૌર સામે કાર્યવાહી કરવામાં આવી છે. વાસ્તવમાં મેચ દરમિયાન હરમનપ્રીત યુપી વોરિયર્સના ખેલાડી સાથે દલીલ કરતી જોવા મળી હતી. જેનો વીડિયો પણ સોશિયલ મીડિયા પર ખૂબ વાયરલ થઈ રહ્યો છે.
અમ્પાયર સાથે જોરદાર દલીલ કરી હતી
મેચ દરમિયાન હરમનપ્રીત કૌરની યુપી વોરિયર્સની સોફી એક્લેટન સાથે દલીલ થઈ હતી. આ દરમિયાન હરમનપ્રીત પણ સોફી તરફ ઈશારો કરતી જોવા મળી હતી. આ પછી અમ્પાયરે હસ્તક્ષેપ કર્યો. આ પછી હરમનપ્રીત ગુસ્સે થઈ ગઈ અને તેણે અમ્પાયર સાથે દલીલ કરી. અમ્પાયર સાથે દલીલ કરવા અને તેની વાત ન સાંભળવા બદલ મુંબઈ ઈન્ડિયન્સના કેપ્ટન વિરુદ્ધ કાર્યવાહી કરવામાં આવી છે.
હરમનપ્રીતે કલમ 2.8 હેઠળ પોતાનો ગુનો કબૂલ કર્યો છે. અમ્પાયરના નિર્ણય સામે વાંધો હોવાને કારણે લેવલ વનના ગુનાના કિસ્સામાં, મેચ રેફરીનો નિર્ણય અંતિમ છે. હવે હરમનપ્રીત કૌર પર મેચ ફીના 10 ટકા દંડ ફટકારવામાં આવ્યો છે.
મુંબઈએ મેચ જીતી લીધી હતી
આ મેચમાં યુપી વોરિયર્સે પ્રથમ બેટિંગ કરતા 20 ઓવરમાં 9 વિકેટ ગુમાવીને 150 રન બનાવ્યા હતા. ત્યાર બાદ આ લક્ષ્યાંક મુંબઈ ઈન્ડિયન્સે 18.3 ઓવરમાં 4 વિકેટ ગુમાવીને હાંસલ કરી લીધો હતો. મુંબઈ માટે આ મેચમાં હિલી મેથ્યુસે 46 બોલમાં 68 રનની ઈનિંગ રમી હતી. આ જીત બાદ મુંબઈ ઈન્ડિયન્સની ટીમ હવે પોઈન્ટ ટેબલમાં બીજા સ્થાને પહોંચી ગઈ છે. મુંબઈએ પ્લેઓફ તરફ મજબૂત પગલું ભર્યું છે.
