ડોનાલ્ડ ટ્રમ્પ યુક્રેન યુદ્ધવિરામ વાટાઘાટોને અંતિમ સ્વરૂપ આપવામાં વ્યસ્ત છે. પહેલા એવું લાગતું હતું કે અમેરિકા યુક્રેનના હિતોને ધ્યાનમાં રાખીને આ સમજૂતી સાથે આગળ વધશે, પરંતુ ટ્રમ્પના છેલ્લા કેટલાક પગલાથી એવું લાગે છે કે તેઓ પુતિન સામે સંપૂર્ણપણે ઝૂકી ગયા છે. રશિયાની માંગ પર ટ્રમ્પે રશિયા સાથે વાત કરવા માટે પોતાના સલાહકારને બદલી નાખ્યો છે. ટ્રમ્પે જનરલ કીથ કેલોગને રશિયા માટે વાટાઘાટકાર પદેથી હટાવ્યા, હવે તેઓ યુક્રેન સાથે જ વાત કરશે.
જેદ્દાહની વાતોથી દૂર રહ્યા હતા
ટ્રમ્પે તેમના ટ્રુથ સોશિયલ પ્લેટફોર્મ પર જણાવ્યું હતું કે કેલોગ રાષ્ટ્રપતિ ઝેલેન્સ્કી અને યુક્રેનિયન નેતૃત્વ સાથે સીધી વાત કરશે, તેમણે ઉમેર્યું કે તેઓ તેમને સારી રીતે જાણે છે, અને તેઓ ખૂબ સારા કાર્યકારી સંબંધો ધરાવે છે. ક્રેમલિનને જનરલ કીથ કેલોગ સામે વાંધો હતો અને રશિયન નેતૃત્વ તેમની સાથે સીધી વાત કરવા માંગતા ન હતા. અગાઉ ટ્રમ્પે કેલોગને રશિયા અને યુક્રેન સાથે વાતચીત કરવા માટે વિશેષ દૂત તરીકે નિયુક્ત કર્યા હતા. યુક્રેન યુદ્ધના ઉકેલ માટે કીથ કેલોગને વિશેષ દૂત નિયુક્ત કરવામાં આવ્યા હતા, પરંતુ તેઓ સાઉદી અરેબિયામાં યુએસ અને રશિયન અધિકારીઓ વચ્ચેની બેઠકથી દૂર રહ્યા હતા. રાષ્ટ્રપતિ વ્લાદિમીર પુતિનને લાગ્યું કે અમેરિકન વિશેષ દૂત કેલોગ યુક્રેન તરફી છે.
યુક્રેન અને અમેરિકા વચ્ચે બગડતી પરિસ્થિતિ
અમેરિકાના આ પગલાથી ફરી એકવાર ખુલાસો થયો છે કે યુક્રેન સાથે તેના સંબંધોમાં અંતર આવી ગયું છે. ટ્રમ્પ અને ઝેલેન્સકી વચ્ચેના સંબંધો ગયા મહિને ખરાબ થયા જ્યારે યુએસ પ્રમુખે યુક્રેનિયન નેતાને “સરમુખત્યાર” કહ્યા અને પ્રશ્ન કર્યો કે શું તે ખરેખર શાંતિ ઇચ્છે છે. 80 વર્ષીય કેલોગે કિવમાં ઝેલેન્સકી સાથે મુલાકાત કર્યા પછી સોશિયલ મીડિયા પરની એક પોસ્ટમાં ઝેલેન્સકીને યુક્રેનના “સંઘર્ષશીલ અને હિંમતવાન નેતા” તરીકે વર્ણવ્યા અને કહ્યું કે બંને વચ્ચે “વ્યાપક અને સકારાત્મક ચર્ચા” થઈ છે.
