રાજસ્થાન રોયલ્સ અને ચેન્નાઈ સુપર કિંગ્સ વચ્ચેની મેચ પહેલા મહેન્દ્ર ધોનીને એક ખાસ મોમેન્ટો આપીને સન્માનિત કરવામાં આવ્યા છે. આ સન્માન તેમને ઈન્ડિયન પ્રીમિયર લીગમાં 18 સીઝન પૂર્ણ કરવા પર આપવામાં આવ્યું હતું. તમને જણાવી દઈએ કે એમએસ ધોની આઈપીએલની પહેલી સિઝનથી ચેન્નાઈ સુપર કિંગ્સ તરફથી રમી રહ્યા છે. જ્યારે ટીમ પર 2 વર્ષનો પ્રતિબંધ મૂકવામાં આવ્યો હતો, ત્યારે તે પૂણે તરફથી રમ્યા હતા. તે પછી તે ફરીથી CSKમાં પરત ફર્યા.
BCCI સેક્રેટરી મોમેન્ટો આપીને કર્યુ સન્માન
બીસીસીઆઈના સેક્રેટરી શ્રી દેવજીત સૈકિયા દ્વારા એમએસ ધોનીને મોમેન્ટોથી સન્માનિત કરવામાં આવ્યા હતા. ધોનીએ પોતાની કેપ્ટનશીપમાં ચેન્નાઈ સુપર કિંગ્સને 5 વખત ચેમ્પિયન બનાવ્યું છે, હાલમાં તે કેપ્ટન નથી પણ ટીમ માટે રમી રહ્યો છે. IPL સીઝન 18ની પહેલી મેચમાં વિરાટ કોહલીને પણ આવો જ એક મોમેન્ટો આપીને સન્માનિત કરવામાં આવ્યા હતા.
ધોનીએ CSKને 5 વખત ચેમ્પિયન બનાવ્યું
એમએસ ધોનીને 2008માં મેજર ધ્યાનચંદ ખેલ રત્ન પુરસ્કારથી સન્માનિત કરવામાં આવ્યા હતા. તેમને 2009માં પદ્મશ્રી અને 2018માં પદ્મ ભૂષણથી સન્માનિત કરવામાં આવ્યા હતા. આ ઉપરાંત, તેમણે ઘણા પુરસ્કારો પણ જીત્યા છે. એમએસ ધોનીની કેપ્ટનશીપ હેઠળ ભારતે 2007માં રમાયેલા T20 વર્લ્ડ કપની પ્રથમ સિઝન જીતી હતી. આ પછી તેમની કેપ્ટનશીપ હેઠળ, ટીમ ઈન્ડિયાએ 2011માં ODI વર્લ્ડ કપ અને 2013માં ICC ચેમ્પિયન્સ ટ્રોફી જીતી હતી. એમએસ ધોનીએ તેમની કેપ્ટનશીપ હેઠળ ચેન્નાઈ સુપર કિંગ્સને 5 વખત (2010, 2011, 2018, 2021 અને 2023) ચેમ્પિયન બનાવ્યું છે.
