અમેરિકાના રાષ્ટ્રપતિ ડોનાલ્ડ ટ્રમ્પે કાર્યભાર સંભાળ્યાના થોડા દિવસો પછી જ ગાઝા યોજનાનો પ્રસ્તાવ મૂક્યો હતો. આ અંતર્ગત, ગાઝા ખાલી કરીને તેને રિવેરામાં રૂપાંતરિત કરવાની જાહેરાત કરવામાં આવી હતી. ગાઝાના સશસ્ત્ર આતંકવાદી સંગઠન હમાસે વિશ્વભરના તેના સમર્થકોની હાકલપટ્ટી કરી હતી અને તેમને યુએસ રાષ્ટ્રપતિ ડોનાલ્ડ ટ્રમ્પની ગાઝા યોજના સામે શસ્ત્રો ઉપાડવા અપીલ કરી હતી.
હમાસના અધિકારીની સમર્થકોને અપીલ
હમાસના એક વરિષ્ઠ અધિકારી સામી અબુ ઝુહરીએ એક નિવેદન બહાર પાડ્યું છે. પોતાના નિવેદનમાં ઝુહરીએ કહ્યું, “અમેરિકન રાષ્ટ્રપતિ ડોનાલ્ડ ટ્રમ્પની આ યોજના ભૂખમરા અને નરસંહારથી ભરેલી છે. જો વિશ્વના કોઈપણ ભાગમાં કોઈ આની વિરુદ્ધ શસ્ત્રો ઉપાડી શકે છે, તો તેણે તેમ કરવું જોઈએ અને કાર્યવાહી કરવી જોઈએ.” ઝુહરીએ ઉમેર્યું, “કોઈ પણ વિસ્ફોટક, ગોળીઓ, છરી કે પથ્થર તમને રોકવા ન દો. દરેક વ્યક્તિએ પોતાનું મૌન તોડવું જોઈએ.” યુએસ પ્રમુખ ડોનાલ્ડ ટ્રમ્પની ગાઝા યોજના હેઠળ, ગાઝાના પુનર્નિર્માણ માટે 20 લાખથી વધુ પેલેસ્ટિનિયનોને પડોશી દેશ ઇજિપ્ત અને જોર્ડનમાં સ્થળાંતરિત કરવામાં આવશે.
નેતન્યાહૂની ઓફર બાદ હમાસે અપીલ કરી
ઇઝરાયલી વડા પ્રધાને ઓફર કર્યાના એક દિવસ પછી હમાસના વરિષ્ઠ અધિકારી અબુ ઝુહરીએ આ અપીલ કરી હતી. ઇઝરાયલી વડા પ્રધાન બેન્જામિન નેતન્યાહૂએ ગાઝા યુદ્ધના અંતિમ તબક્કાના ભાગ રૂપે હમાસ નેતાઓને ગાઝા છોડી દેવાની ઓફર કરી. આ ઉપરાંત, નેતન્યાહૂએ એવી પણ માંગણી કરી હતી કે ગાઝા યુદ્ધના અંતે હમાસે પોતાના શસ્ત્રો છોડી દેવા પડશે. વડા પ્રધાન નેતન્યાહૂએ કહ્યું, “ઇઝરાયલ અમેરિકી રાષ્ટ્રપતિ ડોનાલ્ડ ટ્રમ્પ દ્વારા પ્રસ્તાવિત યોજના પર કામ કરી રહ્યું છે. જેના હેઠળ ગાઝાના લોકોને અન્ય દેશોમાં ટ્રાન્સફર કરવામાં આવશે.”
ઇઝરાયલ ગાઝાની સંપૂર્ણ સુરક્ષાનું ધ્યાન રાખશેઃ નેતન્યાહૂ
નેતન્યાહૂએ વધુમાં કહ્યું, “આ યુદ્ધ પછી, ઇઝરાયલ ગાઝાની સંપૂર્ણ સુરક્ષાનું ધ્યાન રાખશે અને ડોનાલ્ડ ટ્રમ્પની ગાઝા યોજનાને સંપૂર્ણપણે અમલમાં મૂકશે. જે હેઠળ, ગાઝામાં રહેતા 2.4 મિલિયન લોકોના મોટા પાયે વિસ્થાપનની વાત કરવામાં આવી હતી. જો કે પાછળથી તેને સ્વૈચ્છિક સ્થળાંતર યોજના કહેવામાં આવી હતી.” 20 જાન્યુઆરીએ રાષ્ટ્રપતિ ડોનાલ્ડ ટ્રમ્પે પદ સંભાળ્યાના થોડા દિવસો પછી જ ગાઝા યોજનાનો પ્રસ્તાવ મૂક્યો હતો. જે હેઠળ સમગ્ર ગાઝાને ખાલી કરાવવાની અને તેને મધ્ય પૂર્વનો રિવેરા બનાવવાની જાહેરાત કરવામાં આવી હતી.
