ઇન્ડિયન પ્રીમિયર લીગ એટલે કે IPL ઘણા લોકો માટે પૈસા કમાવવાની એક મોટી તક બની છે. પરંતુ ઝડપથી ધનવાન બનવાના આ લોભમાં, યુવા ભારતીયો સટ્ટાબાજીના વ્યસનમાં એવા તે ફેલાય છે કે, તેઓને આ જાળમાંથી બહાર નિકળવું મુશ્કેલ બન્યુ છે. માનસિક સ્વાસ્થ્ય નિષ્ણાતો કહે છે કે IPL પર સટ્ટાબાજી ભારતીય યુવાનોમાં એક ગંભીર વ્યસન બની ગયુ છે. ગૂગલ સર્ચ ટ્રેન્ડ્સ દર્શાવે છે કે દરેક IPL સીઝન દરમિયાન, ‘IPL વ્યસન’ અને ‘ઓનલાઈન સટ્ટાબાજી’ જેવા શબ્દોનું સર્ચ વધુ જોવા મળે છે.
સોશિયલ મીડિયા પર શું થઇ રહ્યુ છે ટ્રેન્ડ ?
ગુગલ ટ્રેન્ડ્સ અનુસાર, ‘જુગાર વ્યસનના કારણો’, ‘શું જુગાર એક વ્યસન છે’, ‘ઓનલાઈન જુગાર વ્યસન’ અને ‘જુગાર વ્યસન ઉપચાર’ જેવા પ્રશ્નોની શોધમાં વધારો થયો છે. આ ઉપરાંત, જુગાર વ્યસનની સારવાર, જુગાર વ્યસનથી કેવી રીતે છુટકારો મેળવવો અને જુગાર વ્યસન માટે પુનર્વસન જેવી શોધમાં પણ ઝડપથી વધારો થયો છે. યુવાઓનું ભવિષ્ય જોખમમાં નાંખવા માટે દારુ અને ડ્રગ્સ સિવાય હવે IPL સટ્ટાબાજીનું વ્યસન સૌથી વધુવ ખતરનાક સાબિત થઇ રહ્યુ છે.
જુગારના વ્યસનને પ્રોત્સાહન
ઓન લાઇન એપ્લિકેશનો ખાસ કરીને યુવાનોમાં જુગાર વ્યસનને પ્રોત્સાહન આપી રહી છે. તાજેતરમાં, એક પીઆઈએલની સુનાવણી દરમિયાન, સુપ્રીમ કોર્ટે આઈપીએલ દરમિયાન સટ્ટાબાજી પર ચિંતા વ્યક્ત કરી હતી. સુપ્રીમ કોર્ટે કહ્યું હતું કે ઘણા લોકો આઈપીએલના નામે સટ્ટો અને જુગાર રમી રહ્યા છે. આ એક ગંભીર મુદ્દો છે. ભારતમાં જુગારના કાયદા દરેક રાજ્યમાં અલગ અલગ છે અને ઓનલાઈન સટ્ટાબાજી અંગે કોઈ સ્પષ્ટ કેન્દ્રીય કાયદો નથી.
ઓનલાઈન સટ્ટાબાજીનો ક્રેઝ
ઓનલાઈન સટ્ટાબાજીની અસર દિવસેને દિવસે વધી રહી છે. કિશોરો અને યુવાનો સટ્ટાબાજીને કારણે ભારે નુકસાન સહન કરી રહ્યા છે. માર્ચ 2025માં, બેંગ્લોર સ્થિત એક ટેક પ્રોફેશનલે સટ્ટાબાજીમાં 1.5 કરોડ રૂપિયા ગુમાવ્યા હતા. તેણે સટ્ટાબાજી માટે લોન લીધી હતી અને બાદમાં લોન વસૂલ કરવા માટે પરિવારને પરેશાન કરવામાં આવી રહ્યો હતો. જેના પછી તેની પત્નીએ આત્મહત્યા કરી હતી. આ કારણે, હવે વધુ લોકો મનોચિકિત્સકો અને કાઉન્સેલરોની મદદ લઈ રહ્યા છે.
