કેલિફોર્નિયાના સેન જોસમાં રહેતી યુવાન ભારતીય આરતી સિંહ 9 નવેમ્બરના રોજ એક વ્યાવસાયિક નેટવર્કિંગ ઈવેન્ટમાંથી ઘરે પરત ફરી રહી હતી. પોતાના ઘરની નજીક શેરી ક્રોસ કરતી વખતે એક કારએ તેને અચાનક ટક્કર મારી હતી. આ અકસ્માત એટલો ગંભીર હતો કે આરતીને તાત્કાલિક હોસ્પિટલ લઇ જવામાં આવી અને ત્યારથી તે કોમામાં છે.
ICUમાં સારવાર
હાલ તે સાન્ટા ક્લેરા વેલી મેડિકલ સેન્ટરના ICUમાં સારવાર લઈ રહી છે. ડોકટરોએ તેની ગળા અને પેટ પર મોટી સર્જરી કરી છે જેથી તે શ્વાસ લઈ શકે અને ખોરાક મેળવી શકે. છતાં, તેણે હજુ સુધી પોતાની આંખો ખોલી નથી. અકસ્માતની ખબર મળતાં જ તેના પિતા સુમીરન સિંહ ભારતથી તરત જ અમેરિકા આવ્યા. હોસ્પિટલના પલંગની બાજુએ બેઠા રહેતા તેઓ દરરોજ પોતાની દીકરી સાથે વાત કરે છે, આ આશા સાથે કે કદાચ તે સાંભળશે, કદાચ કોઈ દિવસ આંખો ખોલશે.
સ્થાનિક પોલીસે ખાતરી આપી
ત્યાના સ્થાનિક પોલીસે ખાતરી આપી છે કે આ હિટ-એન્ડ-રન કેસ નથી, પરંતુ ડ્રાઇવરની ઓળખ જાહેર કરવામાં આવી નથી. પિતાને માત્ર એટલું જણાવાયું છે કે ડ્રાઇવર લગભગ 50 વર્ષનો હતો અને અકસ્માત સમયે તેની પાસે વીમો નહોતો. આરતીની હાલત કે ડ્રાઇવર સામે શક્ય આરોપો અંગે પોલીસે કોઈ નવી માહિતી આપી નથી, જેના કારણે પરિવાર હેરાન અને વ્યથિત છે.
યુવતીના પિતા માટે ભાષા અવરોધ
વધુ મુશ્કેલીઓ એ છે કે યુવતીના પિતા માટે ભાષા અવરોધ, અજાણી કાનૂની પ્રક્રિયા અને જરૂરી દસ્તાવેજોની અછત જેવી પરિસ્થિતિઓ મોટી મુશ્કેલી બની રહી છે. આ વચ્ચે, ઉત્તરી કેલિફોર્નિયાની સમુદાય સંસ્થા ઓવરસીઝ ઓર્ગેનાઇઝેશન ફોર અ બેટર બિહાર (O2B2) પરિવારને સહારો આપવા માટે આગળ આવી છે. સંસ્થાએ રહેવા, ખોરાક, પરિવહન અને અન્ય તાત્કાલિક જરૂરિયાતો પૂરી કરવા માટે ભંડોળ એકત્ર કરવાની ઝુંબેશ શરૂ કરી છે.
