પાડોશની યુવતી બગીચે લઈ ગઈ, ત્યાં મિત્રએ અડપલાં કરી ફોટા પાડ્યા; લગ્ન માટે રાખેલી રોકડ ગાયબ થતા ભાંડો ફૂટ્યો, ભક્તિનગર પોલીસે બંને આરોપીઓને ઝડપી લીધા
રાજકોટ શહેરમાં માનવતા અને સંવેદનશીલતાને શરમાવે એવો એક ગંભીર બનાવ સામે આવ્યો છે. હરિધવા રોડના છેડે, કોઠારીયા રોડ વિસ્તારમાં રહેતી 17 વર્ષની મૂકબધિર સગીરાને પાડોશમાં રહેતી યુવતીએ વિશ્વાસમાં લઈ ઘર નજીક આવેલા બગીચે લઈ જઈ, ત્યાં તેના મિત્ર સાથે મળીને અડપલાં અને બ્લેકમેલિંગનો શિકાર બનાવ્યાનો ચોંકાવનારો ખુલાસો થયો છે. ફોટા વાયરલ કરવાની ધમકી આપી સગીરાના ઘરમાં લગ્ન પ્રસંગ માટે રાખેલી રૂ.7.70 લાખની રોકડ રકમ બળજબરીથી પડાવી લેવામાં આવી હતી. આખરે ભક્તિનગર પોલીસે પોક્સો એક્ટ સહિતની ગંભીર કલમો હેઠળ ગુનો નોંધી બંને આરોપીઓને સકંજામાં લીધા છે.
ફરિયાદ મુજબ, 49 વર્ષીય મહિલાએ પોતાના પરિવાર સાથે કોઠારીયા રોડ વિસ્તારમાં રહે છે. તેમને સંતાનમાં 23 વર્ષનો પુત્ર અને 17 વર્ષની પુત્રી છે. પુત્રી જન્મથી જ બોલી તથા સાંભળી શકતી નથી. તેણીએ કોઈ શાળામાં અભ્યાસ કર્યો નથી, પરંતુ માતા તેની સાંકેતિક ભાષા સારી રીતે સમજી શકે છે. પરિવાર સામાન્ય જીવન જીવતો હતો, પરંતુ લગ્ન પ્રસંગ દરમિયાન બનેલી આ ઘટના સમગ્ર પરિવાર માટે આઘાતરૂપ બની. ફરિયાદીએ જણાવ્યું હતું કે, તા. 4 થી 6 દરમિયાન તેમના પુત્ર અને જેઠની દીકરીના લગ્ન હતા. લગ્નના ખર્ચ માટે જેઠના પુત્રએ અગાઉ તા.27ના રોજ રૂ.7.70 લાખ રોકડા આપ્યા હતા, જે ઘરની સેટીમાં રાખવામાં આવ્યા હતા. આ સમગ્ર પ્રક્રિયા દરમિયાન મૂકબધિર પુત્રી પણ ઘરમાં હાજર હતી. લગ્નની તૈયારીમાં વ્યસ્તતાના કારણે પૈસાની ખાસ દેખરેખ રાખી શકાઈ નહોતી.
ગઈ તા.1ના રોજ સાંજના સમયે ભત્રીજાએ લગ્નસામગ્રી માટે સોનીની દુકાને જવાનું હોવાથી રોકડ પૈસા લેવા જણાવ્યું. જ્યારે ફરિયાદી સેટી ખોલવા ગયા ત્યારે તેમાં રાખેલી રોકડની થેલી ગાયબ હતી. ઘરમાં અફરાતફરી મચી ગઈ, તમામ સભ્યોએ શોધખોળ કરી પરંતુ પૈસા ક્યાંય મળ્યા ન હતા. તે સમયે લગ્ન પ્રસંગ ચાલુ હોવાથી સામાજિક સંકોચ અને વ્યસ્તતાના કારણે તરત પોલીસ ફરિયાદ કરવામાં આવી નહોતી. લગ્ન પ્રસંગ પૂર્ણ થયા બાદ તા.6ના રોજ, મૂકબધિર સગીરાએ પોતાની માતાને સાંકેતિક ભાષામાં સમગ્ર હકીકત જણાવી. સગીરાએ જણાવ્યું કે પાડોશમાં રહેતી શ્રદ્ધા નામની યુવતીએ તેને પોતાની સાથે બગીચે લઈ ગઈ હતી. ત્યાં શ્રદ્ધાનો મિત્ર ઋત્વિક હાજર હતો. બંનેએ મળીને સગીરાનો ફોટો પાડ્યો હતો. ત્યારબાદ ઋત્વિકે તેના શરીરના કમર અને છાતીના ભાગે અયોગ્ય રીતે સ્પર્શ કરી અડપલાં કર્યા હતા. આ પછી આરોપીઓએ સગીરાને ધમકી આપી હતી કે જો આ વાત કોઈને કહીશ તો ફોટા તારા માતા-પિતા તથા સગા સંબંધીઓને મોકલી દઈશું. ભયભીત અને મૂકબધિર હોવાના કારણે સગીરા કોઈને કંઈ કહી શકી નહોતી. આરોપીઓએ આ ડરનો ફાયદો ઉઠાવી, ઘરમાં સેટીમાં રાખેલી રોકડ રકમ અંગે જાણ મેળવી અને કટકે-કટકે સગીરાને ઘર પાસે બોલાવી બળજબરીથી કુલ રૂ.7.70 લાખ લઈ લીધા હતા.
સગીરાએ આખી ઘટના પોતાની માતાને જણાવતાં પરિવાર સ્તબ્ધ થઈ ગયો. વાતની ગંભીરતા સમજાતાં પરિવારજનોએ પરસ્પર ચર્ચા કરી અને અંતે કાયદાનો આશરો લેવાનો નિર્ણય કર્યો. ત્યારબાદ સગીરાની માતાએ ભક્તિનગર પોલીસ સ્ટેશનમાં ફરિયાદ નોંધાવી.
ફરિયાદના આધારે પોલીસે પાડોશમાં રહેતી શ્રદ્ધા અને તેના મિત્ર ઋત્વિક સામે ભારતીય ન્યાય સંહિતાની કલમ 308(2), 61(2) તેમજ પોક્સો એક્ટ હેઠળ ગુનો નોંધી કાર્યવાહી શરૂ કરી. પોલીસ તપાસમાં આ ગુનો ગંભીર હોવાનું જણાતા બંને આરોપીઓને ઝડપી લેવામાં આવ્યા છે.આ મામલે પીઆઇ એમ.એમ. સરવૈયાની દેખરેખ હેઠળ પીએસઆઇ જે.જે. ગોહિલ તથા તેમની ટીમે તપાસ હાથ ધરી છે. આરોપીઓ પાસેથી પડાવેલી રોકડ રકમ કબજે કરવા અને વધુ પુરાવા એકત્ર કરવા તજવીજ ચાલી રહી છે.
