નવ માસથી પગાર નહીં મળતા આર્થિક સંકડામણ વધી
ઉપલેટા તાલુકાના મોટી પાનેલી ગામમાં ગ્રામ પંચાયત હસ્તક કામ કરતા સફાઈ કામદારો છેલ્લા નવ મહિનાથી વેતનથી વંચિત રહેતા તેમની સ્થિતિ અત્યંત દયાજનક બની છે. એક તરફ ‘સ્વચ્છ ભારત’ ના નારા લગાવવામાં આવે છે, ત્યારે બીજી તરફ ગામને સ્વચ્છ રાખતા ૨૧ જેટલા સફાઈ કામદારો આજે ભૂખમરાની કગાર પર આવી ગયા છે તો કે આમ અમને તેમના દ્વારા ગ્રામ પંચાયત સહિત તમામ ઉચ્ચ કચેરીઓમાં ફરિયાદ કરી છે પરંતુ તેમની ફરિયાદનું યોગ્ય નિકાલ કે નિરાકરણ નહીં આવતા તેઓ આર્થિક સંકળામણમાં હોવાનું જણાવી રહ્યા છે.
સફાઈ કામદારોના જણાવ્યા અનુસાર, છેલ્લા નવ મહિનાથી તેમને એક પણ રૂપિયો પગાર પેટે મળ્યો નથી. લાંબા સમયથી પગાર ન મળવાને કારણે તેમના ઘરનું ગુજરાન ચલાવવું મુશ્કેલ બન્યું છે. કરિયાણાના વેપારીઓએ હવે ઉધાર આપવાનું પણ બંધ કરી દીધું છે, જેના કારણે કામદારોના પરિવારો આર્થિક સંકડામણમાં ઘેરાયા છે.
માત્ર પગાર જ નથી અટક્યો, પરંતુ કામદારોએ એવો પણ આક્ષેપ કર્યો છે કે તાજેતરમાં ઉપસરપંચ સહિતના જેટલા વ્યક્તિઓ દ્વારા રાજીનામું આપવામાં આવ્યું છે તેમના દ્વારા આ સફાઈ કામદારોને ખોટી રીતે બદનામ કરવામાં આવી રહ્યા છે. ગામમાં એવી વાતો વહેતી કરવામાં આવી છે કે કામદારો પૂરતું કામ કરતા નથી, જેના કારણે તેમનો પગાર અટકાવવામાં આવ્યો છે. કામદારોએ આ બાબતે ભારે રોષ વ્યક્ત કરતા જણાવ્યું હતું કે તેઓ નિયમિત સેવા આપે છે છતાં તેમને અન્યાય થઈ રહ્યો છે.
ધોરાજી-ઉપલેટા વિધાનસભાના ભાજપના ધારાસભ્ય ડો. મહેન્દ્ર પાડલીયાના ગામ વતન એવા મોટી પાનેલીમાં પગારથી વંચિત રહેલા સફાઈ કામદારો દ્વારા જણાવવામાં આવી રહ્યું છે કે, આ મામલે સફાઈ કામદારો દ્વારા મોટી પાનેલી ગ્રામ પંચાયત કચેરી, ઉપલેટા તાલુકા વિકાસ અધિકારી , ઉપલેટા મામલતદાર કચેરી, રાજકોટ જીલ્લા કલેક્ટર કચેરી સહિતની કચેરીઓમાં ફરિયાદ અને રજૂઆત કરાય છે પરંતુ કોઈ પણ પ્રકારના અધિકારીઓ આ મામલાને ધ્યાને લેતા નથી જેના પરિણામે કર્મચારીઓની સ્થિતિ દિવસે ને દિવસે આર્થિક રીતે નબળી પડી રહી છે. આટલી રજૂઆતો છતાં સરકારી અધિકારીઓ દ્વારા હજુ સુધી કોઈ નક્કર પગલાં લેવામાં આવ્યા નથી કે નથી તેમની સમસ્યાનું નિરાકરણ આવ્યું.
પૂરતું ભંડોળ ન હોવાથી પગાર ચૂકવવામાં વિલંબ
ગામના મહિલા સરપંચના પ્રતિનિધિ (પતિ) અને સ્થાનિક જાગૃત નાગરિકોના જણાવ્યા મુજબ, સરકારમાંથી મળતી ‘ઓક્ટ્રોય’ (જકાત) ગ્રાન્ટ અને એરિયર્સ છેલ્લા ઘણા સમયથી જમા થયા નથી. પંચાયત પાસે પૂરતું ભંડોળ ન હોવાને કારણે સફાઈ કામદારોના પગારમાં વિલંબ થઈ રહ્યો હોવાનું પ્રાથમિક અનુમાન લગાવવામાં આવી રહ્યું છે જોકે થોડા દિવસો પહેલા જ મોટી પાનેલી ગ્રામ પંચાયતના ઉપસરપંચ જતીન ભાલોડીયા સહિતના સભ્યો દ્વારા રાજીનામાં આપવામાં આવ્યા છે.
