સુરક્ષિત ડિજિટલ પેમેન્ટ માટે NPCI દ્વારા 5 મહત્ત્વપૂર્ણ ટિપ્સ
અગ્ર ગુજરાત, રાજકોટ
તહેવારોનો સમયગાળો એટલે ઉજવણી, ભેટસોગાદોની આપ-લે અને ખરીદીની પ્રવૃત્તિઓમાં વધારો થવાનો સમય. ઓનલાઈન અને ઓફલાઈન એમ બંને માધ્યમો પર ગ્રાહકોને આકર્ષવા માટે વિવિધ આકર્ષક ડિસ્કાઉન્ટ, મર્યાદિત સમય માટેની ખાસ ઓફર્સ અને કેશબેકની સુવિધાઓ આપવામાં આવે છે. આવી આકર્ષક ઓફર્સ ગ્રાહકોને ઝડપથી ખરીદીના નિર્ણયો લેવા માટે પ્રેરિત કરે છે. તહેવારોની આ ભાગદોડ અને ખરીદીની ઉતાવળમાં, અતિશય આકર્ષક લાગતી ઓફર્સ મેળવવાની લાલચમાં ઘણા લોકો પૂરતી તપાસ કર્યા વિના ઉતાવળે નિર્ણયો લઈ શકે છે. સાયબર ઠગો ગ્રાહકોની આવી માનસિકતા અને વર્તણૂકથી સારી રીતે વાકેફ હોય છે અને સોશિયલ એન્જિનિયરિંગ (Social Engineering) જેવી યુક્તિઓનો ઉપયોગ કરીને તેમને છેતરવાનો પ્રયાસ કરે છે. ટેક્નોલોજીના વિકાસની સાથે સાયબર છેતરપિંડીના કિસ્સાઓ પણ નવાં સ્વરૂપો ધારણ કરી રહ્યા છે. આવી પરિસ્થિતિમાં પૂરતી જાગૃતિ રાખવી અને કેટલીક જરૂરી સાવચેતીનાં પગલાં અપનાવવાં અત્યંત મહત્ત્વપૂર્ણ છે. તેનાથી ગ્રાહકો સુરક્ષિત રીતે ડિજિટલ વ્યવહારો કરી શકે છે અને કોઈપણ અડચણ વિના તહેવારોની ઉજવણીનો આનંદ માણી શકે છે.
માત્ર અધિકૃત એપ્સ અને વેબસાઇટ્સ પર જ ખરીદી કરો:
હંમેશાં વેબસાઇટનું સરનામું જાતે ટાઇપ કરીને જ ખોલો અથવા સંબંધિત કંપનીની અધિકૃત એપનો ઉપયોગ કરો. તહેવારોની ખાસ ઓફર્સ અથવા શુભેચ્છા કાર્ડ્સ મોકલવાના બહાને અજાણ્યા સ્રોતોમાંથી મળતી લિંક્સ પર ક્લિક કરવાનું કે ફાઇલો ડાઉનલોડ કરવાનું ટાળો.
ચુકવણી માત્ર અધિકૃત પ્લેટફોર્મ પર જ પૂર્ણ કરો:
તમામ નાણાકીય વ્યવહારો સંબંધિત શોપિંગ એપ અથવા વેબસાઇટના અધિકૃત ચેકઆઉટ પેજ (Checkout Page) દ્વારા જ પૂર્ણ કરો. આ ઉપરાંત, ચુકવણી કરતાં પહેલાં વેચાણકર્તાની વિગતોની યોગ્ય રીતે તપાસ કરી તેની વિશ્વસનીયતાની ખાતરી કરો.
મફત વાઉચર્સ અને કેશબેકની લાલચ આપતી ઑફર્સથી સાવચેત રહો:
તમારી જાણ કે વિનંતી વિના આવતા આવા સંદેશાઓના આધારે તમારી વ્યક્તિગત કે નાણાકીય વિગતો કોઈની સાથે શેર કરશો નહીં અને કોઈપણ પ્રકારની ફી ચૂકવશો નહીં. તેના બદલે, સંબંધિત ઑફરની સત્યતા અને વિશ્વસનીયતા ચકાસવા માટે કંપનીની અધિકૃત એપ અથવા વેબસાઇટની સીધી મુલાકાત લઈને વિગતો તપાસો.
અણધારી OTPની માંગણીને જોખમની ચેતવણી સમજો:
બેંકો કે ડિજિટલ પેમેન્ટ એપ્સ ક્યારેય ફોન કૉલ અથવા મેસેજ દ્વારા ગ્રાહકો પાસેથી OTP માંગતી નથી. તેથી, કોઈ વ્યક્તિ પોતાને બેંકનો અધિકારી કે પેમેન્ટ એપનો પ્રતિનિધિ ગણાવીને તમારો સંપર્ક કરે તો પણ તેની સાથે OTP શેર કરશો નહીં. તમારી OTPની ગુપ્તતા જાળવવી એ નાણાકીય છેતરપિંડીથી બચવા માટેનું એક મહત્ત્વપૂર્ણ સુરક્ષા પગલું છે.
દબાણ હેઠળ ઉતાવળમાં કોઈ નિર્ણય ન લો:
સાયબર ઠગો કોઈ ઑફર ટૂંક સમયમાં સમાપ્ત થઈ જશે અથવા તાત્કાલિક પગલાં નહીં ભરો તો તમારું એકાઉન્ટ બ્લૉક થઈ જશે તેવી ધમકી આપીને ગ્રાહકોમાં ઉતાવળ અને ભયનું વાતાવરણ ઊભું કરે છે. જોકે, વિશ્વસનીય પ્લેટફોર્મ ક્યારેય ગ્રાહકોને ડરાવીને કે ઉતાવળમાં નિર્ણય લેવા દબાણ કરીને કામ કરતું નથી. તેથી, આવા સંદેશાઓ કે સૂચનાઓ મળે ત્યારે તરત જ પ્રતિક્રિયા આપવાને બદલે થોડી ક્ષણો રોકાઈને તેની સત્યતા ચકાસો. સંબંધિત સંસ્થાની અધિકૃત એપ, વેબસાઇટ અથવા કસ્ટમર સપોર્ટ ચેનલ દ્વારા આવી માહિતીની ખરાઈ કર્યા પછી જ આગળની કાર્યવાહી કરો.
