સોની વેપારીની ક્ષણિક બેદરકારી મોંઘી પડી: તિજોરીની ચાવી અંદર રહી જતાં 36.51 લાખના સોનાની ચોરી
રાજકોટ સોની બજારમાં માણેક ગોલ્ડ કાસ્ટિંગ કારખાનામાં ચોરી: નાસ્તા સમયે બંગાળી કારીગર ફાઈન સોનુ અને સોનાનો ભૂકો લઈને ફરાર
અગ્ર ગુજરાત, રાજકોટ
રાજકોટની સોની બજારમાં ફરી એકવાર વિશ્વાસઘાતની ચોરીનો બનાવ સામે આવ્યો છે. સોની વેપારીની એક નાની બેદરકારીને કારણે રૂ.36.51 લાખની કિંમતનું સોનુ ચોરી જતા વેપારીઓમાં ચિંતા ફેલાઈ છે. બનાવ અંગે એ. ડિવિઝન પોલીસ મથક, રાજકોટમાં ગુનો નોંધાઈ પોલીસે બંગાળી કારીગરની શોધખોળ શરૂ કરી છે.
સોની બજારના દરબારગઢ ચોક, રામજી શેરી વિસ્તારમાં રહેતા અને માણેક ગોલ્ડ કાસ્ટિંગ નામે કારખાનું ચલાવતા કલ્પેશભાઈ મથુરભાઈ કાતરીયાએ નોંધાવેલી ફરિયાદ મુજબ, તેમના કારખાનામાં સોનાના દાગીના બનાવવાનું કામ ચાલે છે. કારખાનામાં ત્રણ મજૂરો કામ કરતા હતા. અગાઉ સુરતમાં નોકરી દરમિયાન ઓળખાયેલા બંગાળી કારીગર અક્ષય બાઉળી ફરી કામ માગવા આવ્યો હોવાથી તાજેતરમાં તેને કામે રાખવામાં આવ્યો હતો.
ગત તારીખ 4ના રોજ સવારે કારખાનું ખોલ્યા બાદ વેપારી નાસ્તા માટે ઉપરના માળે ગયા હતા. આ દરમિયાન તિજોરી ખુલ્લી રહી ગઈ હતી અને તેની ચાવી પણ તિજોરીમાં જ રહી ગઈ હતી. આ તકનો લાભ લઈ બંગાળી કારીગર અક્ષય બાઉળી તિજોરીમાંથી સોનુ લઈને ફરાર થઈ ગયો હતો.
થોડીવાર બાદ તિજોરી તપાસતા દાગીના બનાવવા માટે રાખેલું 270.280 ગ્રામ ફાઈન સોનુ તથા અંદાજે 38.740 ગ્રામ અઢાર કેરેટ સોનાનો ભૂકો ગાયબ હોવાનું સામે આવ્યું. આસપાસ અને તેના રહેણાંક સ્થળે શોધખોળ કરવા છતાં આરોપી મળ્યો ન હતો અને તેનો મોબાઇલ નંબર પણ બંધ આવતો હતો.
ફરિયાદ મુજબ ચોરાયેલ સોનાની કુલ કિંમત રૂ.36.51 લાખ જેટલી થાય છે. આ બનાવને પગલે એ. ડિવિઝન પોલીસ મથકની ટીમે ગુનો નોંધી બંગાળી કારીગર અક્ષય બાઉળીની ધરપકડ માટે કાર્યવાહી તેજ કરી છે. સતત વધતા આવા બનાવોને કારણે સોની બજારમાં ફરી સુરક્ષા અને વિશ્વાસના મુદ્દે ચર્ચા શરૂ થઈ છે.
