ક્રિસ્ટલ સ્કૂલમાં દીકરીઓનું વૈદિક પૂજન અને શ્રમજીવી બહેનોનું સન્માન કરી દિવાળીની અનોખી ઉજવણી કરાઇ

 ક્રિસ્ટલ સ્કૂલમાં દીકરીઓનું વૈદિક પૂજન અને શ્રમજીવી બહેનોનું સન્માન કરી દિવાળીની અનોખી ઉજવણી કરાઇ

સંગીત સંધ્યા અને ફટાકડાની આતિશબાજીથી માહોલ બન્યો ઉત્સવમય : ડી.ઈ.ઓ. અને શાળાના ટ્રસ્ટીઓ રહ્યા ઉપસ્થિત

અગ્ર ગુજરાત, રાજકોટ

દિવાળીના પાવન પર્વ નિમિત્તે રાજકોટની ક્રિસ્ટલ સ્કૂલ પરિવાર દ્વારા લક્ષ્મીપૂજનની ઉજવણી એકદમ અનોખા, આધ્યાત્મિક અને સંસ્કારસભર અભિગમ સાથે કરવામાં આવી હતી. આ કાર્યક્રમનો મુખ્ય ઉદ્દેશ દીકરીઓનું સન્માન, નારીશક્તિનું ગૌરવ અને સમાજમાં શ્રમજીવી બહેનો પ્રત્યે કૃતજ્ઞતા વ્યક્ત કરવાનો હતો.

કાર્યક્રમની સૌથી મોટી વિશેષતા એ રહી કે શાળામાં દીકરીઓનું પૂજન પરંપરાગત વિધિ અનુસાર વૈદિક મંત્રોચ્ચાર સાથે કરવામાં આવ્યું હતું. મંત્રોના પવિત્ર નાદ વચ્ચે કુમકુમ તિલક લગાવીને દીકરીઓનું પૂજન કરાયું હતું. આના દ્વારા સમાજને એવો પ્રેરણાદાયી સંદેશ આપવામાં આવ્યો કે દીકરી એ માત્ર પરિવારનું ગૌરવ જ નહીં, પરંતુ સાક્ષાત્ શક્તિ અને સમૃદ્ધિનું સ્વરૂપ છે.

આ પ્રસંગે રાજકોટના જિલ્લા શિક્ષણાધિકારી (ડી.ઈ.ઓ.) પોતાના પત્ની સાથે વિશેષ ઉપસ્થિતિ રહીને કાર્યક્રમની શોભા વધારી હતી. તેમણે પણ પોતાની દીકરીનું વૈદિક મંત્રોચ્ચાર સાથે પૂજન કરી દીકરીના સન્માનનો ઉત્તમ દાખલો બેસાડ્યો હતો. તેમની સાથે શાળાના ટ્રસ્ટીઓએ પણ પોતાની દીકરીઓનું પૂજન કરી આ સુંદર પરંપરામાં ઉત્સાહભેર સહભાગીદારી નોંધાવી હતી.

શાળાની સ્વચ્છતા અને સુંદરતા જાળવવામાં અહમ યોગદાન આપતી સફાઈ કર્મચારી બહેનો, જેને સૌ પ્રેમથી ‘માસી’ તરીકે સંબોધે છે, તેમનું વિશેષ પૂજન અને સન્માન કરવામાં આવ્યું હતું. આ સાથે શાળાની તમામ શિક્ષિકા બહેનો તેમજ અન્ય કર્મચારીઓને ભેટ અર્પણ કરી તેમના અમૂલ્ય યોગદાન બદલ આદર અને આભાર વ્યક્ત કરવામાં આવ્યો હતો. આ પ્રસંગે શાળા પરિવારના સભ્યો પોતાના પરિવાર સાથે ઉપસ્થિત રહેતા સમગ્ર પરિસરમાં પારિવારિક આત્મીયતા અને એકતાનો અદ્ભુત માહોલ સર્જાયો હતો.

ઉજવણીને વધુ યાદગાર બનાવવા માટે સમગ્ર શાળા પરિવાર અને ઉપસ્થિત મહેમાનો માટે ભવ્ય સંગીત સંધ્યાનું આયોજન કરવામાં આવ્યું હતું. સંગીતના સુમધુર સૂરોએ સૌને મંત્રમુગ્ધ કરી દીધા હતા, અને બાળકોએ ફટાકડા ફોડીને દિવાળીના પર્વને હર્ષોલ્લાસભેર વધાવ્યું હતું.

આ સમગ્ર આયોજન દ્વારા ક્રિસ્ટલ સ્કૂલ પરિવારે સમાજને એક સુંદર અને સાચો સંદેશ આપ્યો છે કે, ‘સાચું લક્ષ્મીપૂજન માત્ર ધનની આરાધના નથી, પરંતુ દીકરીનું સન્માન, નારીશક્તિનું ગૌરવ, શ્રમનું સન્માન અને માનવતાના મૂલ્યોની આરાધના છે.’