જેતપુરના ભોજાધાર વિસ્તારમાં ઘરકંકાસમાં પત્નીની હત્યા કરનાર પતિની અટકાયત
પત્નીના પુત્રી સાથેના સંબંધો ન ગમતા પિતાએ કાતર વડે આચર્યો હતો ખૂની ખેલ
અગ્ર ગુજરાત, જેતપુર
જેતપુરના ભોજાધાર વિસ્તારમાં ઘરકંકાસમાં પત્નીની કાતરના ઘા ઝીંકી નિર્મમ હત્યા કરનાર શખ્સને જેતપુર સીટી પોલીસે ગણતરીના કલાકોમાં દબોચી લીધો છે. પોલીસે આરોપીની ધરપકડ કરી હત્યામાં વપરાયેલું હથિયાર પણ કબજે કર્યું છે.
બનાવની વિગત મુજબ, ફરિયાદી રીતુસિંગ અમિત તિવારીએ પોલીસમાં ફરિયાદ નોંધાવી હતી કે તેના સાવકા પિતા રાકેશસીંહ ઉર્ફે દિલીપ ફતેબાહદુરસિંહને તેની માતા રેખાબેન સાથેના તેના સંબંધો ગમતા નહોતા. આ બાબતનો ખાર રાખીને આરોપીએ શનિવારે પત્ની રેખાબેન સાથે ઝઘડો કરી, પોતાની પાસે રહેલી કાતર વડે તેમના પેટ અને સાથળના ભાગે જીવલેણ ઘા ઝીંકી મોતને ઘાટ ઉતાર્યા હતા. આ હુમલામાં વચ્ચે પડેલી પુત્રી રીતુસિંગને પણ આરોપીએ ઇજા પહોંચાડી હતી.
મર્ડરના આ ગંભીર ગુનાની જાણ થતા જ ઉચ્ચ પોલીસ અધિકારીઓ દ્વારા આરોપીને ત્વરિત ઝડપી પાડવા આદેશો આપવામાં આવ્યા હતા. જેતપુર સીટી પોલીસની અલગ-અલગ ટીમો દ્વારા ખાનગી રાહે તપાસ હાથ ધરી ટેકનિકલ સોર્સની મદદથી આરોપી રાકેશસીંહ ઉર્ફે દિલીપ ફતેબાહદુરસિંહ (રહે. ભોજાધાર, જેતપુર; મૂળ રહે. ઉત્તર પ્રદેશ) ને ભોજાધાર હનુમાન મંદિર પાસેથી ઝડપી પાડ્યો છે. પોલીસે આરોપી પાસેથી ગુનામાં વપરાયેલી સ્ટીલની ચળકાટ ધરાવતી દૂધિયા હાથાવાળી કાતર પણ કબજે કરી છે.
આ ગુનાની તપાસમાં જેતપુર સીટી પોલીસ દ્વારા સરકારશ્રી દ્વારા ફાળવવામાં આવેલી મોબાઈલ ફોરેન્સિક વાનનો ઉપયોગ કરવામાં આવ્યો છે. ફોરેન્સિક સાયન્સ ઓફિસરના માર્ગદર્શન હેઠળ ઘટનાસ્થળેથી જીણવટભરી રીતે પુરાવાઓ એકત્રિત કરી તપાસનો ધમધમાટ શરૂ કરવામાં આવ્યો છે. પોલીસે આરોપી વિરુદ્ધ ભારતીય ન્યાય સંહિતાની કલમ ૧૦૩(૧), ૧૧૮(૨) અને જી.પી. એક્ટ ૧૩૫ મુજબ ગુનો નોંધી કાયદેસરની આગળની કાર્યવાહી હાથ ધરી હતી.
