અમદાવાદમાં સેન્ટેરિયલ વિસ્ટા બિલ્ડીંગના ધામે હાઇપ્રોફાઇલ પાર્ટીમાં પોલીસનો વિક્ષેપ
શરાબ, શબાબ, હુક્કાના કસ, બાઇટીંગ લેતી ચાર યુવતી સહિત ૨૧ ઝડપાયા : પોલીસે સેમ્પલ લઇ મેડિકલ ટેસ્ટ માટે સિવિલ મોકલ્યા
અગ્ર ગુજરાત, અમદાવાદ
અમદાવાદના પંચવટી વિસ્તારમાં આવેલા ‘સેન્ટેરિયલ વિસ્ટા’ના ધાબા પર વાસી ઉત્તરાયણના દિવસે ચાલી રહેલી શરાબ, શબાબ અને હુક્કાની પાર્ટીમાં પોલીસે દરોડો પાડતા દોડધામ મચી હતી. ડીજે સાથે ચાલી રહેલી પાર્ટીના રંગમાં ભંગ પાડતા પોલીસને ઘટનાસ્થળેથી 4 યુવતીઓ અને 17 યુવકો સહિત 21 લોકો મળી આવ્યા છે. આ ઉપરાંત ધાબા પર શરાબ, શબાબ અને હુક્કાની પાર્ટી માટે રખાયેલી દારૂની બોટલ, બાઈટીંગ અને વિવિધ ફ્લેવરના હુક્કા મળી આવ્યા હતા. કુશલ શાહ નામના વ્યકિતએ પાર્ટી આયોજીત કરી હોવાની વિગતો મળી આવી છે.
હાઈપ્રોફાઈલ પાર્ટી પર થયેલા દરોડા અંગે મળતી માહિતી અનુસાર, વાસી ઉત્તરાયણની ઉજવણી દરમિયાન સેન્ટેનિયલ વિસ્ટા એપાર્ટમેન્ટના ટેરેસ પર DJ પાર્ટી ચાલી રહી હતી. પાર્ટીમાં હાજર કેટલાક મિત્રો દારૂના નશામાં બૂમાબૂમ અને ઉછાળકૂદ કરતા હોવાથી આસપાસના રહેવાસીઓ પરેશાન બન્યા હતા.
કંટ્રોલ રૂમમાં મળેલી ફરિયાદ બાદ પોલીસ જયારે ટેરેસ પર પહોંચી ત્યારે ત્યાં બિયર બાર તૈયાર હતો, જેમાં મોંઘી વિદેશી દારૂની બોટલો જોવા મળી હતી. સાથે લીચી, કાચી કેરી, ઈલાયચી સહિતના ફળો અને અન્ય ખાણીપીણી પણ રાખવામાં આવી હતી. હુક્કાબાર જેવી વ્યવસ્થા પણ કરવામાં આવી હોવાનું સામે આવ્યું છે. પોલીસે દારૂની બોટલો અને અન્ય સામગ્રી જપ્ત કરી વધુ તપાસ હાથ ધરી છે.
ધાબા પર ચાલી રહેલી પાર્ટીમાં દારૂની સાથે ખાણીપીણીની અને હુક્કાની પણ વ્યવસ્થા કરવામાં આવી હતી. ખારેક,લીચી, એલચી,કાચી કેરી,બિસ્કિટ સહિતની અલગ અલગ વાનગીઓના કાઉન્ટર હતા. મોંઘા ભાવની દારૂની બોટલો ઉપરાંત વિવિધ ફ્લેવરના હુક્કા મળી આવ્યા છે. પોલીસ પાર્ટી પર ત્રાટકે તે પહેલાં એક બિલ્ડરનો પુત્ર ફરાર થઈ ગયો હોવાની ચર્ચા ચાલી રહી છે. તેને બચાવવા માટે સિનિયર અધિકારીઓ દ્વારા ભલામણો થતી હોવાની પણ ચર્ચા શરૂ થઈ છે, જોકે પોલીસ દ્વારા આ બાબતનો ઇનકાર કરવામાં આવ્યો છે. ધાબા પરથી શરૂઆતમાં 4 યુવતી અને 12 યુવકોને ઝડપી પાડવામાં આવ્યા હતા. જો કે, પોલીસને જોઈ નાસી ગયેલા 5 જેટલા યુવકો શંકાસ્પદ રીતે પોલીસ સમક્ષ રજૂ થતા પોલીસ તમામને ઘટનાસ્થળે લાવી હતી.
