મોંઘવારીમાં સતત વધારો થતાં મહિલા નેતાઓ દ્વારા વિરોધ
ભાવમાં વધારો થતા કોંગ્રેસે ગેસના બાટલાની નનામી કાઢી
ત્રિકોણ બાગ ખાતે શહેર મહિલા કોંગ્રેસ દ્વારા ‘હાય રે મોંઘવારી’ સહિત સરકાર વિરોધ સૂત્રોચ્ચાર
કાળા બજારી કરનાર સામે કડક કાર્યવાહી કરવા માંગ, ઉગ્ર આંદોલનની ચીમકી
અગ્ર ગુજરાત, રાજકોટ
રાજકોટ શહેરમાં આજે મોંઘવારી અને રાંધણ ગેસની અછત મુદ્દે રાજકીય ગરમાવો જોવા મળ્યો હતો. દેશભરમાં સતત વધી રહેલા ભાવવધારા અને એલપીજી ગેસના સિલિન્ડર મેળવવામાં પડી રહેલી મુશ્કેલીઓના વિરોધમાં આજે રાજકોટ શહેર મહિલા કોંગ્રેસ દ્વારા સરકાર વિરુદ્ધ મોરચો માંડવામાં આવ્યો હતો. શહેરના મધ્યમાં આવેલા ત્રિકોણ બાગ ખાતે મહિલા કાર્યકરોએ એકઠા થઈને અનોખી રીતે પોતાનો રોષ ઠાલવ્યો હતો.
આ વિરોધ પ્રદર્શનમાં સૌથી આકર્ષણનું કેન્દ્ર ગેસ સિલિન્ડરની કાઢવામાં આવેલી ‘ઠાઠડી’ હતી. મહિલા કોંગ્રેસના પ્રમુખ દીપ્તિબેન સોલંકીની આગેવાનીમાં મોટી સંખ્યામાં મહિલાઓએ ગેસ સિલિન્ડરને પ્રતિકાત્મક રીતે ઠાઠડી પર મૂકીને સરકારની નીતિઓનો વિરોધ કર્યો હતો. કાર્યકરોએ “હાય રે મોંઘવારી” અને સરકાર વિરોધી સૂત્રોચ્ચાર કરીને વાતાવરણ ગજવી દીધું હતું.
વિરોધ પ્રદર્શન દરમિયાન મહિલા આગેવાનોએ સરકાર પર આકરા પ્રહારો કર્યા હતા. તેમણે આક્ષેપ કર્યો હતો કે આજે ગૃહિણીઓને ઘરગથ્થુ ગેસ સિલિન્ડર મેળવવા માટે કલાકો સુધી લાંબી લાઈનોમાં ઊભા રહેવું પડે છે, જે સરકારની વહીવટી નિષ્ફળતા છે. આંતરરાષ્ટ્રીય સ્તરે ભાવ ઘટવા છતાં સ્થાનિક સ્તરે જનતાને તેનો લાભ મળતો નથી.
મહિલા કોંગ્રેસ દ્વારા સરકાર પાસે સ્પષ્ટ માગ કરવામાં આવી છે કે ગેસનો પૂરતો પુરવઠો તાત્કાલિક સુનિશ્ચિત કરવામાં આવે અને ભાવમાં જનતાને મોટી રાહત આપવામાં આવે. આ ઉપરાંત, ગેસના વિતરણમાં થતી ગેરરીતિ અને કાળાબજારી કરનારાઓ સામે કડક પગલાં લેવાની પણ માગણી કરાઈ છે.
આ કાર્યક્રમમાં જયાબેન ચૌહાણ, દીપુ રવિયા સહિતના અનેક હોદ્દેદારો અને મહિલા કાર્યકરો મોટી સંખ્યામાં જોડાયા હતા. મહિલા પ્રમુખે ચીમકી ઉચ્ચારી હતી કે જો આગામી દિવસોમાં ગેસની અછત દૂર નહીં થાય અને ભાવમાં ઘટાડો નહીં કરવામાં આવે, તો કોંગ્રેસ દ્વારા વધુ ઉગ્ર આંદોલન છેડવામાં આવશે.
