ગાંધીનગર ગિફ્ટ સિટી બનશે વર્લ્ડ ક્લાસ લાઈફસ્ટાઈલ ડેસ્ટિનેશન
એક વર્ષમાં 20થી વધુ આંતરરાષ્ટ્રીય રેસ્ટોરન્ટ્સ શરૂ થશે, યુવાનો માટે વર્ક-લાઈફ મોડેલ પર ભાર
અગ્ર ગુજરાત, ગાંધીનગર
ગાંધીનગર ગિફ્ટ સિટી હવે માત્ર નાણાકીય કેન્દ્ર પૂરતું સીમિત નહીં રહી, પરંતુ ગ્લોબલ લાઈફસ્ટાઈલ અને ફૂડ ડેસ્ટિનેશન તરીકે પણ વિકસવાની દિશામાં આગળ વધી રહ્યું છે. ગિફ્ટ સિટીમાં આગામી એક વર્ષમાં 20થી વધુ આંતરરાષ્ટ્રીય સ્તરની રેસ્ટોરન્ટ્સ શરૂ કરવાની મહત્વપૂર્ણ જાહેરાત કરવામાં આવી છે, જેનાથી અહીં કામ કરતા પ્રોફેશનલ્સ અને યુવાનો માટે વિશ્વસ્તરીય સુવિધાઓ ઉપલબ્ધ બનશે.
આ જાહેરાત IFSCA Talent Vista Summit 2026ના ઉદ્ઘાટન સત્ર દરમિયાન કરવામાં આવી હતી, જેમાં ગુજરાતના નાયબ મુખ્યમંત્રી Harsh Sanghavi મુખ્ય ઉપસ્થિતિ રહ્યા હતા. આ પ્રસંગે વડાપ્રધાનના અગ્ર સચિવ પી.કે.મિશ્રા અને ગિફ્ટ સિટીના નવનિયુક્ત અધ્યક્ષ ઉદય કોટક સહિત અનેક મહાનુભાવો હાજર રહ્યા હતા.
હર્ષ સંઘવીએ પોતાના સંબોધનમાં ગિફ્ટ સિટીના વિકાસની સફર અને ભવિષ્યના વિઝન પર વિસ્તૃત પ્રકાશ પાડ્યો હતો. તેમણે જણાવ્યું હતું કે, આજથી લગભગ બે દાયકા પહેલા વડાપ્રધાન નરેન્દ્ર મોદીએ એક ઉજ્જડ જમીન પર ઉભા રહીને ગ્લોબલ ફિનટેક સિટીના સ્વપ્નનું બીજ વાવ્યું હતું. તે સમયે આ વિચારને ઘણા લોકોએ ‘ડે ડ્રીમ’ ગણાવ્યો હતો, પરંતુ આજે ગિફ્ટ સિટી વિશ્વના નકશા પર એક મજબૂત આંતરરાષ્ટ્રીય નાણાકીય કેન્દ્ર તરીકે ઉભરી આવ્યું છે.
તેમણે ઉમેર્યું હતું કે, ગિફ્ટ સિટી માત્ર એક ઈન્ફ્રાસ્ટ્રક્ચર પ્રોજેક્ટ નથી, પરંતુ દેશના લાખો યુવાનોના સપનાઓને સાકાર કરવાનું કેન્દ્ર છે. અહીં નાણાકીય સેવાઓ સાથે સાથે હવે જીવનશૈલી, મનોરંજન અને સામાજિક સુવિધાઓ પર પણ ભાર મૂકવામાં આવી રહ્યો છે, જેથી કામ સાથે જીવનની ગુણવત્તા પણ ઊંચી રહે.
હર્ષ સંઘવીએ જણાવ્યું હતું કે, ગિફ્ટ સિટી હવે સિંગાપોર, દુબઇ, લંડન અને ન્યૂ યોર્ક જેવા વિશ્વના અગ્રણી નાણાકીય કેન્દ્રો સાથે સીધી સ્પર્ધા કરી રહ્યું છે. આ સફળતાના પાયામાં આઇએફએસસીએનું યુનિફાઈડ રેગ્યુલેટરી માળખું, આકર્ષક ટેક્સ નીતિ અને ભારતની ડિજિટલ આર્થિક શક્તિનો મહત્વપૂર્ણ ફાળો રહ્યો છે.
આગામી સમયમાં ગિફ્ટ સિટીને વધુ મજબૂત બનાવવા માટે ‘વર્લ્ડ ક્લાસ ટેલેન્ટ’ વિકસાવવાનું મુખ્ય લક્ષ્ય રાખવામાં આવ્યું છે. ગાંધીનગર અને અમદાવાદમાં આવેલી પ્રતિષ્ઠિત સંસ્થાઓ જેમ કે IIM અમદાવાદ, MICA, નિરમા યુનિવર્સિટી અને નેશનલ લો યુનિવર્સિટી આ દિશામાં મહત્વપૂર્ણ ભૂમિકા ભજવી રહી છે. સાથે જ ગિફ્ટ સિટીમાં સ્થપાતી વિદેશી યુનિવર્સિટીઓ પણ વૈશ્વિક સ્તરના ટેલેન્ટનું નિર્માણ કરવામાં મદદરૂપ બની રહી છે.
સરકાર દ્વારા સ્ટ્રક્ચર્ડ ઈન્ટર્નશિપ અને પ્લેસમેન્ટ ફ્રેમવર્ક તૈયાર કરવામાં આવી રહ્યું છે, જેથી યુવાનોને વધુ તકો મળી શકે. હર્ષ સંઘવીએ વિશ્વાસ વ્યક્ત કર્યો હતો કે, ગિફ્ટ સિટીમાં કામ કરવાથી યુવાનોને વિદેશ જવાની જરૂર નહીં રહે, કારણ કે અહીં જ તેમને વૈશ્વિક અનુભવ અને ઉત્તમ વેતન મળશે.
આ સાથે જ તેમણે ગિફ્ટ સિટીમાં કામ કરતા યુવાનોની ‘ઈવનિંગ લાઈફ’ અને સામાજિક જરૂરિયાતોને ધ્યાનમાં રાખીને મહત્વપૂર્ણ જાહેરાત કરી હતી કે આગામી એક વર્ષમાં 20થી વધુ આંતરરાષ્ટ્રીય સ્તરની રેસ્ટોરન્ટ્સ શરૂ કરવામાં આવશે. આ રેસ્ટોરન્ટ્સમાં વિવિધ દેશોની રસોઈ, વિશ્વસ્તરીય ડાઈનિંગ અનુભવ અને આધુનિક સુવિધાઓ ઉપલબ્ધ રહેશે, જે ગિફ્ટ સિટીને એક ગ્લોબલ લાઈફસ્ટાઈલ હબ બનાવશે.
રાજ્ય સરકાર ‘વર્કિંગ એન્ડ લિવિંગ ઇન ગિફ્ટ સિટી’ મોડેલ પર પણ ગંભીરતાથી કામ કરી રહી છે, જેના અંતર્ગત કર્મચારીઓને ત્યાં જ રહેવાની, મનોરંજન અને દૈનિક જરૂરિયાતોની તમામ સુવિધાઓ એક જ સ્થળે ઉપલબ્ધ કરાવવામાં આવશે. આ મોડેલથી ગિફ્ટ સિટી એક સંપૂર્ણ ‘લાઈવ-વર્ક-પ્લે’ ઇકોસિસ્ટમ તરીકે વિકસશે.
ઉદ્યોગ સાહસિકોને પ્રોત્સાહિત કરતા હર્ષ સંઘવીએ જણાવ્યું હતું કે, ગુજરાતમાં રાજકીય અને નીતિગત સ્થિરતા સૌથી મોટી તાકાત છે. અન્ય રાજ્યોની સરખામણીએ પ્રોત્સાહનોમાં થોડો તફાવત હોઈ શકે, પરંતુ ગુજરાતમાં રોકાણ માટેનું સુરક્ષિત અને અનુકૂળ વાતાવરણ ઉપલબ્ધ છે. તેમણે Wipro જેવી મોટી કંપનીઓનું ગિફ્ટ સિટીમાં સ્વાગત કરતાં જણાવ્યું હતું કે, ગુજરાત તકોની ભૂમિ છે અને હાલમાં રોકાણ માટેનો શ્રેષ્ઠ સમય છે.
આ પ્રસંગે પી. કે. મિશ્રાએ જણાવ્યું હતું કે, ગિફ્ટ સિટી હવે માત્ર એક કલ્પના નથી રહી, પરંતુ વૈશ્વિક નાણાકીય માળખું બની ગયું છે. વર્ષો સુધી વિદેશમાં થતી નાણાકીય પ્રવૃત્તિઓ હવે ભારતની ધરતી પર પરત આવી રહી છે, જેના કારણે દેશની કેપિટલ માર્કેટ મજબૂત બની રહી છે અને ઉચ્ચ સ્તરની રોજગારીનું સર્જન થઈ રહ્યું છે.
તેમણે ઉમેર્યું હતું કે, વડાપ્રધાનના ‘વિકસિત ભારત 2047’ના વિઝનને સાકાર કરવામાં ગિફ્ટ સિટી મહત્વપૂર્ણ ભૂમિકા ભજવશે. ડિજિટલ ઇકોનોમી અને આર્ટિફિશિયલ ઇન્ટેલિજન્સના યુગમાં માનવ સંસાધન સૌથી મહત્વપૂર્ણ સંપત્તિ છે અને ગિફ્ટ સિટી આ ક્ષેત્રમાં નવી તકો ઊભી કરી રહ્યું છે.
ગિફ્ટ સિટીના અધ્યક્ષ ઉદય કોટકે પણ પોતાના સંબોધનમાં ગિફ્ટ સિટીને વૈશ્વિક નાણાકીય હબ બનાવવા માટેનો રોડમેપ રજૂ કર્યો હતો. તેમણે જણાવ્યું હતું કે, ભૌગોલિક-રાજકીય સ્થિરતા, વિશ્વસ્તરીય ઈન્ફ્રાસ્ટ્રક્ચર, ઈઝ ઑફ લિવિંગ અને મજબૂત નિયમનકારી માળખું ગિફ્ટ સિટીની સફળતાના મુખ્ય આધારસ્તંભો છે.
તેમણે ગિફ્ટ સિટીને પરિવર્તન અને નવીનતા માટેની પ્રયોગશાળા ગણાવી હતી અને જણાવ્યું હતું કે, ભારત સરકાર, ગુજરાત સરકાર અને રેગ્યુલેટર વચ્ચેના ‘વન ટીમ, વન ડ્રીમ’ના સમન્વયથી ગિફ્ટ સિટીને વિશ્વના શ્રેષ્ઠ નાણાકીય કેન્દ્રોની હરોળમાં લાવવામાં આવશે.
કાર્યક્રમ દરમિયાન ગિફ્ટ સિટીના મેનેજિંગ ડિરેક્ટર સંજય કૌલ, આઇએફએસસીએના ચેરપર્સન કે. રાજારામન તથા વિપ્રોના એક્ઝિક્યુટિવ ચેરમેન રિશદ પ્રેમજીએ પણ પોતાના વિચારો રજૂ કર્યા હતા. કાર્યક્રમની શરૂઆતમાં આઇએફએસસીએના એક્ઝિક્યુટિવ ડિરેક્ટર દીપેશ શાહે સૌનું સ્વાગત કર્યું હતું, જ્યારે એએનએસઆરના ફાઉન્ડર અને સીઈઓ લલિત આહુજાએ પ્રેઝન્ટેશન દ્વારા ગિફ્ટ સિટીના ભવિષ્યના માર્ગદર્શનો રજૂ કર્યા હતા.
આ રીતે ગિફ્ટ સિટી હવે ફક્ત નાણાકીય ક્ષેત્ર પૂરતું સીમિત ન રહી, પરંતુ ગ્લોબલ લાઈફસ્ટાઈલ, રોજગારી અને આધુનિક જીવનશૈલીનું કેન્દ્ર બનીને દેશના વિકાસમાં મહત્વપૂર્ણ યોગદાન આપી રહ્યું છે. આગામી સમયમાં આંતરરાષ્ટ્રીય રેસ્ટોરન્ટ્સ અને વર્લ્ડ ક્લાસ સુવિધાઓ સાથે ગિફ્ટ સિટી ભારતનું સૌથી આધુનિક અને આકર્ષક અર્બન ડેસ્ટિનેશન બનવાની દિશામાં ઝડપથી આગળ વધી રહ્યું છે.
