શિક્ષકોની ઘટ ઝડપથી દૂર કરવા સરકાર દ્વારા સમિતિની પુન: રચના
શિક્ષણ વિદો અને સંચાલક મંડળના પ્રતિનિધિને સ્થાન અપાયું
અગ્ર ગુજરાત, ગાંધીનગર
ગુજરાત રાજ્યમાં શિક્ષણના સ્તરને વધુ ઉંચુ લઈ જવા અને શાળાઓમાં શિક્ષકોની ઘટ ઝડપથી દૂર કરવા માટે રાજ્ય સરકારના શિક્ષણ વિભાગ દ્વારા એક અત્યંત મહત્વનો નિર્ણય લેવામાં આવ્યો છે. અનુદાનિત (ગ્રાન્ટેડ) માધ્યમિક અને ઉચ્ચત્તર માધ્યમિક શાળાઓ માટે શિક્ષક ભરતીની પ્રક્રિયાને વધુ સરળ અને પારદર્શક બનાવવા માટે શિક્ષક ભરતી પસંદગી સમિતિની પુનર્રચના કરવામાં આવી છે. આ નવી સમિતિમાં વિશેષજ્ઞોને સ્થાન આપીને ભરતી પ્રક્રિયાને વેગ આપવા માટેનું આયોજન કરવામાં આવ્યું છે.
નવા માળખા મુજબ રચાયેલી આ સમિતિમાં બે અનુભવી શિક્ષણવિદો તેમજ સંચાલક મંડળના પ્રતિનિધિને પણ સત્તાવાર સ્થાન આપવામાં આવ્યું છે. રાજ્યભરની ગ્રાન્ટેડ શાળાઓમાં હાલમાં શિક્ષકોની આશરે 2,000 જેટલી જગ્યાઓ ખાલી પડેલી છે, જેના કારણે વિદ્યાર્થીઓના અભ્યાસ પર વિપરીત અસર પડતી હતી. ખાસ કરીને અંગ્રેજી, ફિઝિક્સ (ભૌતિકશાસ્ત્ર) અને ગણિત જેવા મહત્વના અને અઘરા વિષયોના શિક્ષકોની સૌથી વધુ અછત વર્તાઈ રહી છે, જેને દૂર કરવી હવે આ સમિતિની પ્રાથમિકતા રહેશે.
સરકારના આ પગલાથી હવે લાંબા સમયથી અટવાયેલી કે વિલંબમાં પડતી શિક્ષક ભરતી પ્રક્રિયા ઝડપથી આગળ વધશે તેવી પૂરેપૂરી આશા વ્યક્ત કરવામાં આવી રહી છે. નવી સમિતિ દ્વારા નિયમોનુસાર અને સમયબદ્ધ આયોજન કરીને લાયકાત ધરાવતા ઉમેદવારોને ત્વરિત નિમણૂકો આપવામાં આવશે. આ નિર્ણયથી બેરોજગાર યુવાનોમાં ખુશીની લહેર ફેલાઈ છે અને શાળાઓમાં શિક્ષકોની ઘટ દૂર થવાથી શિક્ષણની ગુણવત્તામાં પણ મોટો સુધારો થશે.
