તંત્રની તપાસમાં બહાર આવતી અનેક વિગતો : ગેરકાયદે ઓરડીઓ અપાયા બાદ કનેકશનો પણ અપાયા
રાજકોટ મનપાની જમીનમાં ગેરકાયદે ઓરડીઓ ચડી લાખો રૂપિયાનો વેપલો કરનાર મનપાના કોર્પોરેટરના પતિ કવા ગોલતર સામે પગલા લેવાયા બાદ હવે તંત્રએ તપાસ અહેવાલમાં વધુ વિગતો બહાર લાવી છે. જે મુજબ કવાના ભાઇના નામે ગેરકાયદે ઓરડીઓની સૌથી વધુ સંખ્યા બોલે છે. આશ્ચર્યની વાત એ છે કે તંત્ર દ્વારા ગેરકાયદે જમીન પર ઉભી થયેલી ગેરકાયદે ઓરડીઓમાં કનેકશનો પણ આપી દેવાયા છે.
ટી.પી.શાખાની પ્રાથમિક તપાસ એ હતી કે હાલ જે લોકો રહે છે તેમાંથી કેટલા ભાડે અને કેટલા જૂના લાભાર્થી એટલે કે પોતાએ ઉભા કરેલા મકાનમાં રહે છે. જો કે જે માલિકીના મકાન છે તે તેમણે કોની પાસેથી લીધા તે તપાસ કરાઇ નથી. તપાસની ટીમોએ દરેક મકાને જઇને એટલી જ તપાસ કરી છે કે ત્યાં કોણ રહે છે અને લાઇટ કનેકશન કોના નામે છે. જો પરિવારના નામે હોય તો તેને માલિકીનું ગણી લેવાય છે. આમ છતાં ૧33 ઓરડીઓ એવી નીકળી છે જેમાં ભાડૂઆતો રહે છે. આ ઓરડીઓ અલગ-અલગ નામે છે અને એવા ૮ લોકો છે જેમની પાસે ૨થી વધુ ઓરડીઓ છે. જે પૈકી વિરમ ગોલતર કે જે કવાનો ભાઇ છે તેના નામે સૌથી વધુ ઓરડીઓ છે. આ ઉપરાંત કવાએ પોતાના અન્ય સગાસંબંધીના નામે પણ ઓરડીઓમાં લાઇટ કનેકશન લઇ લીધા છે.
મંછાનગરમાં દશકા પહેલા સર્વે થયો ત્યારે ૭૦૦ જેટલા મકાન હતા પણ હવેટ પી શાખાએ બે દિવસમાં સરર્વે કર્યો તેમાં ૧૦૦૪ મિલકત મળી છે. જે સાબિત કરે છે કે કવા જેવા જમીન કૌભાંડીઓ જ સ્લમ ઉભા કરે છે અને બાદમાં ગરીબોને આપે અને તેમાં લાભ લેવાનો હોય ત્યારે તે જ આગળ આવે છે. પૂરો રિપોર્ટ આવ્યા બાદ વધુ આકરા પગલાં લેવાશે.
