APK ફાઈલ બનાવતી ગેંગના અભણ ભેજાબાજો ઝડપાયા
ધો.૫ અને ૧૦ સુધી અભ્યાસ કરેલા શખ્સોએ યુ-ટ્યુબ અને ટેલિગ્રામના માઘ્યમથી ડેટા હેકીંગ કરતી ફાઈલો બનાવી: દેશભરના કોલ સેન્ટરમાં ફાઈલો વેચી મહિને રૂ.૫૦ લાખ કમાતા
અગ્ર ગુજરાત, અમદાવાદ
સામાન્ય નાગરિકોના મોબાઇલ ફોન હેક કરીને બેંક ખાતામાંથી મિનિટોમાં લાખો રૂપિયા સેરવી લેતી વિઘાતક એપીકે (APK) ફાઇલ બનાવનાર અને તેનું દેશવ્યાપી નેટવર્ક ચલાવનાર આંતરરાજ્ય ગેંગનો અમદાવાદ સાયબર ક્રાઇમે પર્દાફાશ કર્યો છે. પોલીસે ચાલુ ટ્રેને ફિલ્મી ઢબે ઓપરેશન પાર પાડીને મુખ્ય સૂત્રધાર સહિત કૂલ 3 આરોપીઓની ધરપકડ કરી છે.
પ્રાથમિક તપાસમાં બહાર આવ્યું છે કે આ આરોપીઓ માત્ર ધોરણ 5 થી 10 સુધી ભણેલા હોવા છતાં યુટ્યુબ અને ટેલિગ્રામના માધ્યમથી ડેટા હેકિંગ માટેની નકલી એપીકે ફાઇલો બનાવતા શીખ્યા હતા. તેઓ ટેલિગ્રામ પર વિશેષ બોટ તૈયાર કરીને સાયબર ફ્રોડ કરનારી ગેંગ અને કોલ સેન્ટરોને આ એપ્લિકેશનો વેચતા હતા. આ કાળા કારોબાર થકી આરોપીઓ દર મહિને 40થી 50 લાખ રૂપિયાની કમાણી કરતા હોવાનો સ્ફોટક ખુલાસો થયો છે. આરોપીનો ડેમો વીડિયો પણ સામે આવ્યો છે.
ગુનાની વિગત એવી છે કે, અમદાવાદના હાંસોલ વિસ્તારમાં રહેતા એક નાગરિકને થોડા સમય પહેલા તેમના મોબાઇલ પર અજાણ્યા નંબર પરથી સાબરમતી ગેસ લિમિટેડનું બિલ ભરવાની નોટિસ સાથે એક એપીકે ફાઇલ મોકલવામાં આવી હતી. ભોગ બનનારે આ અજાણી ફાઇલ ડાઉનલોડ કરીને જેવી તેમાં પોતાની અંગત વિગતો ભરી કે તુરંત જ તેમનો આખો મોબાઇલ ફોન રિમોટ એક્સેસ દ્વારા હેક થઈ ગયો હતો. સાયબર ઠગોએ તેના આધારે ફરિયાદીના બેંક એકાઉન્ટમાંથી કૂલ 6.68 લાખ રૂપિયા ટ્રાન્સફર કરી લીધા હતા. આ મામલે અમદાવાદ સાયબર ક્રાઇમ મથકમાં ગુનો દાખલ થતાં પોલીસે ટેકનિકલ સર્વેલન્સ અને ડિજિટલ ફૂટપ્રિન્ટ્સના આધારે તપાસ શરૂ કરી હતી, જેની કડીઓ છેક ઝારખંડની રીઢા સાયબર ગુનેગારોની ગેંગ સુધી લંબાઈ હતી.
સાયબર ક્રાઇમની ઊંડાણપૂર્વકની તપાસમાં જાણવા મળ્યું કે, આ ગેંગનો મુખ્ય માસ્ટરમાઇન્ડ પૂર્ણાનંદ તિવારી એપીકે ફાઇલો તેના સાગરીત વિકાસ દાસને મોકલી આપતો હતો. વિકાસ દાસ આ બોટ સોશિયલ મીડિયા પર સક્રિય સાયબર ઠગો અને ગેરકાયદે કોલ સેન્ટર ચલાવનારાઓને મોકલતો હતો. આ બોટની અંદર આરટીઓ ચલણ, ગેસ બિલ અપડેટ, કસ્ટમર સપોર્ટ અને દેશની વિવિધ પ્રતિષ્ઠિત બેંકોની નકલી સર્વિસ પ્રોવાઇડર એપ્લિકેશન જેવા અનેક વિકલ્પો ઉપલબ્ધ હતા. ફ્રોડ કરનારા તત્વો પોતાની જરૂરિયાત મુજબ 12થી 14 હજાર રૂપિયા ચૂકવીને 1 મહિનાની વેલિડિટી વાળી એપીકે ફાઇલ ખરીદતા હતા. આરોપીઓએ 2025થી અત્યાર સુધીમાં 300થી 400 જેટલી નકલી એપ્લિકેશનો વેચી હોવાનું ખુલ્યું છે.
નાણાકીય ટ્રાન્ઝેક્શન માટે આરોપીઓ અત્યંત ચાલાકીપૂર્વક SBIની YONO કેશ એપ્લિકેશનનો ઉપયોગ કરતા હતા. એપીકે ખરીદનાર સાયબર ઠગો યોનો કેશનો પીન અને OTP વિકાસ દાસને મોકલતા હતા, જે કાર્ડ વગર જ સીધો ATMમાં જઈને રોકડા રૂપિયા ઉપાડી લેતો હતો. વિકાસ આ કામ પેટે 3000 રૂપિયા કમિશન રાખી બાકીની રકમ પૂર્ણાનંદ સુધી પહોંચાડતો હતો, જ્યારે ત્રીજો આરોપી સીતારામ મંડલ ક્રેડિટ કાર્ડનો ડેટા ચોરીને ડાર્ક વેબ મારફતે ફ્રોડના નાણાં વહેંચવાનું કામ કરતો હતો. પકડાયેલી આ ટોળકી વિરૂદ્ધ એકલા અમદાવાદ શહેરમાં જ કૂલ 12 જેટલી સાયબર અરજીઓ અને 5 સત્તાવાર એફઆઈઆર નોંધાયેલી છે, જે અંતર્ગત આખા દેશમાં તેમની સામે થયેલા ગુનાઓનો આંકડો મોટો હોવાની આશંકા છે.
