અમદાવાદમાં બોગસ વોટીંગ મામલે કોંગ્રેસના ઉમેદવારે ભાજપના કાર્યકરોને માર માર્યો
આંખમાં ઇજા થતાં સારવારમાં ખસેડાયો : ચાર વિરૂધ્ધ ફરિયાદ દાખલ
અગ્ર ગુજરાત, અમદાવાદ
અમદાવાદ મહાનગરપાલિકાની ચૂંટણીના મતદાન દરમિયાન કુબેરનગર વોર્ડમાં વાતાવરણ તંગ બન્યું હતું. અહીંની વી.વી. તોમર સ્કૂલમાં બોગસ મતદાનના આક્ષેપો બાદ ભાજપ અને કોંગ્રેસના કાર્યકર્તાઓ આમને-સામને આવી ગયા હતા. ઉગ્ર બોલાચાલી બાદ થયેલી મારામારીમાં કોંગ્રેસના ઉમેદવાર નિકુલસિંહ તોમરે ભાજપના કાર્યકરને ‘હું તને જોઈ લઈશ’ તેવી ધમકી આપી હોવાનો આક્ષેપ થયો છે. મેઘાણીનગર પોલીસે આ મામલે કોંગ્રેસના ઉમેદવાર સહિત ચાર લોકો વિરુદ્ધ ગુનો નોંધી વધુ તપાસ હાથ ધરી છે.
રવિવારે મતદાન દરમિયાન બપોરે 12:30 વાગ્યાની આસપાસ કુબેરનગરના ભાજપ ઉમેદવાર ઉમેદસિંહ યાદવના ભાઈ સુરજસિંહને ફરિયાદ મળી હતી કે, તેમના વિસ્તારના કેટલાક લોકોનું મતદાન અગાઉથી જ કોઈએ કરી દીધું છે. બોગસ મતદાનની ખાતરી કરવા સુરજસિંહ વી.વી. તોમર સ્કૂલ ખાતે પહોંચ્યા હતા. ત્યાં કોંગ્રેસ ઉમેદવાર નિકુલસિંહ તોમર અને તેમના સમર્થકો હાજર હતા. પૂછપરછ દરમિયાન મામલો બિચક્યો હતો અને મારામારી શરૂ થઈ હતી.
ભાજપના ઉમેદવાર ઉમેદસિંહ યાદવના ભાઈ સુરજસિંહ યાદવએ ફરિયાદ નોંધાવી છે કે, તેમના કાકાના દીકરા ઉમેદસિંહ ચૂંટણીમાં ઉમેદવાર તરીકે ઉભા હતા, ત્યારે વોટ આપીને ઘરે જતા 12:30 વાગ્યાની આજુબાજુ તેમની ચાલીમાં રહેતો વિપુલ પટણી આવ્યો હતો અને કહ્યું હતું કે, હું મતદાન કરવા ગયો ત્યારે મારું વોટિંગ પહેલેથી થઈ ગયું છે. સાથે જ રાહુલ નામના વ્યક્તિએ પણ ફોન કરી બોગસ મતદાન થયું હોવા અંગેની ફરિયાદ કરી હતી, જેથી તેઓ વી. વી. તોમર સ્કૂલ ખાતે ખાતરી કરવા માટે ગયા ત્યારે કોંગ્રેસ પક્ષના કાર્યકર્તા અને ઉમેદવાર નિકુલસિંહ તોમર તથા બંટી સરદાર અને બાદલ કુમાર તેમજ યોગેશ તોમર હાજર હતા.
આ બાબતે પૂછપરછ કરતા યોગેશ તોમર તેમણે પકડીને મારામારી કરવા લાગ્યો હતો. નિકુલસિંહ તોમરે પણ ગાળો બોલી ગડદા-પાટુનો માર માર્યો હતો. આ મારામારીમાં નિકુલસિંહે આંખના ભાગે ગંભીર ઈજા થઈ હતી. ત્યારબાદ ભાજપના અન્ય માણસો આવી ગયા હતા. આ સમયે નિકુલસિંહે કહ્યું કે, હું તને જોઈ લઈશ અને ધમકી આપી હતી. આવી રીતે ફરિયાદીને માર મારી તેમના કાકાના દીકરા સાથે પણ બોલાચાલી કરીને લાફો માર્યો હતો, જેથી આ સમગ્ર મામલે મેઘાણીનગર પોલીસે કોંગ્રેસના ઉમેદવાર નિકુલસિંહ તોમર સહિત ચાર લોકો સામે ગુનો નોંધી કાર્યવાહી કરી છે.
મારામારીની ઘટના બાદ કોંગ્રેસના ઉમેદવાર નીકુલસિંહ તોમરે આક્ષેપ કર્યો હતો કે, વી. વી. તોમર સ્કૂલમાં મતદાન ચાલી રહ્યું હતું, ત્યારે ભાજપના ઉમેદવાર ગિરીવરસિંહ શેખાવત અને કલાબેનનો પુત્ર તેમજ અન્ય કેટલાક લોકો સ્કૂલમાં પહોંચીને બોગસ વોટિંગ કરાવતા હતાં. હું ત્યાં પહોંચ્યો ત્યારે મારી સાથે બોલાચાલી કરી હતી. કલાબેનના પુત્રએ મારૂ ગળું પકડી લીધુ હતું. આમાં ભાજપ અને પોલીસની મિલીભગત છે. અમારા તમામ લોકોને બહાર ભગાડ્યાં પછી એ લોકોએ મારા પર હુમલો કર્યો. હું PI અને ભાજપના લોકો સામે ફરિયાદ કરીશ. નોંધનીય છે કે, આ મામલે કોંગ્રેસ ઉમેદવાર નીકુલસિંહે કોઈ ફરિયાદ કરી નથી, પરંતુ તેમની સામે ભાજપના ઉમેદવારના ભાઈએ ગુનો નોંધાવ્યો છે.
