જામનગરમાં ‘કેર ફોર હ્યુમેનિટી’ દ્વારા ચોથા વર્ષે યોજાશે ‘મેગા મેડિકલ કેમ્પ’
ધીરજલાલ ત્રિભોવનદાસ જોબનપુત્રા પરિવારના સહયોગથી આયોજન : નિષ્ણાત તબીબો આપશે ફ્રી સેવા : દર્દીઓને એક અઠવાડિયાની દવાઓ મફત અપાશે
અગ્ર ગુજરાત, જામનગર
દર મહિને એક વિશિષ્ટ સેવાકીય કાર્ય કરવાની પવિત્ર નેમ સાથે સમાજમાં સતત સક્રિય એવી જામનગરની જાણીતી સંસ્થા ‘કેર ફોર હ્યુમેનિટી’ દ્વારા પ્રતિ વર્ષની પરંપરા મુજબ આ વર્ષે પણ સતત ચોથા વર્ષે એક વિશાળ ‘મેગા મેડિકલ કેમ્પ’નું આયોજન કરવામાં આવ્યું છે. આ કેમ્પ ધીરજલાલ ત્રિભોવનદાસ જોબનપુત્રા પરિવારના સહયોગથી તા.૧૨-૭ને, રવિવાર કુંવરબાઇ જૈન ધર્મશાળા, એ. સી. હોલ, જામનગર ખાતે યોજાશે.
આ મેગા કેમ્પમાં જામનગરના નામાંકિત પ્રાઇવેટ ડોક્ટર્સ, જી. જી. હોસ્પિટલના નિષ્ણાત તબીબો તેમજ રાજકોટના જાણીતા ડોક્ટર્સ પોતાની ફ્રી સેવાઓ આપવાના છે. કેમ્પમાં હાડકા અને સાંધાના રોગો, ચામડી (સ્કીન) ના દર્દો, દાંતની તકલીફો, આંખના રોગો, સાંભળવા તેમજ બોલવાની તકલીફ, ડાયાબિટીસ અને બ્લડ પ્રેશર (બી.પી.), હૃદય રોગના દર્દોની સારવાર કરવામાં આવશે.
કેમ્પમાં આવતા દર્દીઓએ પોતાના રોગની જૂની ફાઈલ, રિપોર્ટ અથવા એક્સ-રે સાથે લાવવાના રહેશે. કેમ્પમાં નિદાન કરાવનાર તમામ દર્દીઓને એક અઠવાડિયાની દવાઓ તદ્દન મફત (ફ્રી) આપવામાં આવશે.
કેમ્પની વ્યવસ્થાના ભાગરૂપે નામ નોંધાવવું (રજીસ્ટ્રેશન કરાવવું) ફરજીયાત છે. રજીસ્ટ્રેશન માટે અતુલભાઈ ઠક્કર – 98986 72597, પારસભાઈ વોરા – 82001 54576, હાર્દિકભાઈ ઠક્કર – 73835 71916, ઋષભ ભાઈ ઠક્કર – 99138 81033, સપના શાહ – 74052 08797, નંદિની રાચ્છ – 93130 78957નો સંપર્ક કરવા યાદીમાં જણાવ્યું છે.
