વન્યજીવો પર ખતરો! દિપડાની ચામડાની તસ્કરીનું રેકેટ
સુરતની હોટલમાંથી શખ્સ એક કરોડની ખાલ સાથે ઝડપાયો અન્યનું નામ ખૂલતા ધરપકડ
સોશ્યલ મીડિયામાં ફોટો મૂકતા DRIની કાર્યવાહી : દક્ષિણ ગુજરાતનું જંગલ તસ્કરીનું હબ બન્યું
અગ્ર ગુજરાત, સુરત
સુરતમાં DRI (ડાયરોક્ટરેટ રેવન્યૂ ઈન્ટેલિજન્સ)ની ટીમે દીપડાના ચામડાના ગેરકાયદે વેપારનો પર્દાફાશ કર્યો છે. સોશિયલ મીડિયા પર 1 કરોડ રૂપિયામાં દીપડાનું ચામડું વેચાતું હોવાની વિગતો મળ્યા બાદ DRIએ હોટલમાં ટ્રેપ ગોઠવી એક શખસને દબોચી લીધો હતો. ત્યારબાદ તપાસમાં અન્ય એકનું નામ ખૂલતા તેને પણ પકડી પાડ્યો છે. વનવિભાગની ટીમે દીપડાનું જે ચામડુ કબજે કર્યું છે તેના પર બુલેટ (ગોળી)નું નિશાન પર જોવા મળ્યું છે. ચામડું અંદાજિત બે મહિના જૂનું હોવાની શક્યતા છે. જેથી બે મહિના પહેલા દીપડાનો શિકાર કરાયો હોવાની આશંકા છે. ત્યારે હવે વનવિભાગે આ સમગ્ર રેકેટના મૂળ સુધી પહોંચવા અલગ અલગ દિશામાં તપાસ શરૂ કરી છે.
આ ગુનાની મોડસ ઓપરેન્ડી અત્યંત આધુનિક અને ડિજિટલ હતી. આરોપી બદ્રી અબ્બાસ નામના વ્યક્તિએ પ્રતિબંધિત કાળા બજારના એક વોટ્સએપ ગ્રુપમાં દીપડાના ફ્રેશ ચામડાના ફોટા અપલોડ કર્યા હતા અને આ ચામડું વેચવાની હોવાની જાહેરાત કરી હતી. ઇન્ટરનેટ અને સોશિયલ મીડિયા પર બાજ નજર રાખતી DRIની ટીમ તુરંત જ એક્ટિવ થઈ ગઈ હતી. અધિકારીઓએ કોઈ પણ પ્રકારની શંકા ગયા વિના બદ્રી અબ્બાસનો સંપર્ક કર્યો અને આ કિંમતી લેપર્ડ સ્કીન ખરીદવા માટે ભારે રસ દાખવ્યો હતો. લાંબી કટોકટી અને સોદાબાજી બાદ આ દીપડાની ચામડીની કિંમત અધધ રૂ. 1 કરોડ નક્કી કરવામાં આવી હતી.
રૂપિયા એક કરોડની આ મોટી ડીલ પૂરી કરવા માટે આરોપી બદ્રી અબ્બાસે સુરત સ્ટેશન રોડ પર આવેલી હોટલ અલંકારને પસંદ કરી હતી. તે હોટલના રૂમ નંબર 203માં એક ટ્રોલી બેગ અને લાલચુ ઈરાદાઓ સાથે ટ્રોલી બેગમાં દીપડાનું ચામડું સંતાડીને પહોંચી ગયો હતો. તેને અંદાજો પણ નહોતો કે જે ગ્રાહક તેની રાહ જોઈ રહ્યો છે તે વાસ્તવમાં DRIના અધિકારીઓ છે. બદ્રી જેવો જ રૂમમાં પ્રવેશ્યો અને સોદો પાકો કરવા ગયો, તે જ સમયે પંચોની હાજરીમાં રેડ પાડીને તેને રંગેહાથ ઝડપી પાડવામાં આવ્યો હતો. તેની ટ્રોલી બેગમાંથી કાયદાકીય પુરાવા વિનાની પ્રતિબંધિત લેપર્ડ સ્કીન જપ્ત કરવામાં આવી હતી.
આ કેસની તપાસ હાલ વન વિભાગ દ્વારા કરવામાં આવી રહ્યું છે, અધિકારીઓએ એક ચિંતાજનક ટ્રેન્ડ તરફ ઈશારો કર્યો છે. છેલ્લા કેટલાક સમયથી દક્ષિણ ગુજરાતના વન વિસ્તારો અને ગ્રામ્ય વિસ્તારોમાં દીપડાની સંખ્યામાં નોંધપાત્ર વધારો જોવા મળ્યો છે. દીપડાની આ વધતી વસ્તીના કારણે હવે શિકારીઓ અને વન્યજીવ તસ્કરોની નજર દક્ષિણ ગુજરાત તરફ બગડી છે. દીપડાઓની સરળ ઉપલબ્ધતાનો ફાયદો ઉઠાવીને આ સિન્ડિકેટ કાળી કમાણી કરવા માટે જંગલોમાં સક્રિય થઈ છે, જે પર્યાવરણ અને વન્યજીવ સંરક્ષણ માટે મોટો પડકાર બની ગયો છે.
કાયદાકીય પ્રોટોકોલ હેઠળ જ્યારે વન વિભાગને આ કેસ સોંપવામાં આવ્યો, ત્યારે ડેપ્યુટી કન્ઝર્વેટર ઓફ ફોરેસ્ટ્સ (DCF) ધીરજ કુમારના માર્ગદર્શન હેઠળ સુરત વન વિભાગે ઊંડાણપૂર્વકની સઘન પૂછપરછ શરૂ કરી હતી. હોટલમાંથી પકડાયેલા બદ્રી અબ્બાસે વન વિભાગ સમક્ષ કબૂલાત કરી હતી કે તે માત્ર એક મિડલમેન (એજન્ટ) તરીકે કામ કરતો હતો. આ કિંમતી દીપડાની ચામડું તેને મોઈન હુસેન નામના વ્યક્તિએ વેચવા માટે આપ્યું હતું.આ કડી મળતા જ વન વિભાગે પોલીસ પ્રશાસનની મદદ લઈને ગણતરીના કલાકોમાં મોઈન હુસેનને પણ દબોચી લીધો હતો.
