હાઇપ્રોફાઇલ હેરાફેરી : અમદાવાદમાં મસિર્ડીઝ કારમાંથી ૬૯ લાખનો હાઇબ્રિડ ગાંજો ઝડપાયો
રાજસ્થાનથી ગુજરાતમાં ઘૂસાડવામાં આવતા નશીલા કારોબારનો પર્દાફાશ, પેડલરની ધરપકડ
અગ્ર ગુજરાત, અમદાવાદ
અમદાવાદમાં ડ્રગ્સ, હેરોઈન અને અન્ય નશીલા પદાર્થોની સાથે હાઇબ્રિડ ગાંજાનું ચલણ આશ્ચર્યજનક રીતે વધી રહ્યું છે.જેના કારણે દરરોજ હાઇબ્રિડ ગાંજાના પેડલરો ઝડપાઈ રહ્યા છે.ત્યારે અમદાવાદ SOG ક્રાઈમની ટીમે વિજય ચાર રસ્તા નજીકથી મર્સીડીસ કારમાં ગાંજો લઈને આવેલા પેડલરને ઝડપી લીધો છે. મૂળ રાજસ્થાનનો પરંતુ હાલ નારણપુરામાં રહેતો હાર્દિક કલાલ આ ગાંજો કોને આપવા માટે નીકળ્યો હતો અને તે ગાંજો ક્યાંથી લાવ્યો હતો તેની તપાસ ચાલી રહી છે.
બોપલનો અર્ચિત અગ્રવાલ અને તેનો મિત્ર લાલો સોની પણ હંમેશા મર્સીડીસ કારમાં જ હાઇબ્રિડ ગાંજાની ડિલિવરી કરવા નીકળતા હતા. હવે હાઇબ્રિડ ગાંજાના પેડલરો પોલીસની નજરથી બચવા માટે લક્ઝરી કારમાં જ ડિલિવરી કરતા હોય તેમ લાગી રહ્યું છે.SOGના પોલીસ ઈન્સ્પેક્ટર ગોહિલ અને ભટ્ટને માહિતી મળી હતી કે રાજસ્થાનથી આવેલો હાઇબ્રિડ ગાંજો અમદાવાદમાં વેચવા માટે લાવવામાં આવ્યો છે જેથી પોલીસે વિજય ચાર રસ્તા પાસે હાર્દિક કલાલની અટકાયત કરી હતી.
હાર્દિકની પૂછરપછ દરમિયાન તેની પાસે રહેલી મર્સિડિઝ કારમાંથી ગાંજો મળી આવ્યો હતો.પોલીસે કુલ 2 કિલો જેટલો ગાંજો ઝડપી પાડ્યો હતો. જેની કીમત 69 લાખથી પણ વધુ છે.પોલીસ તપાસમાં જાણવા મળ્યું કે મર્સિડિઝ કાર ભુપેન્દ્ર પરમાર નામના વ્યક્તિની છે.જેમની પાસેથી હાર્દિકને પૈસા લેવાના હોવાથી ભૂપેન્દ્ર પાસેથી કાર લીધી હતી.
હાર્દિકે આ ગાંજો તેના સંબંધી પ્રદીપ કલાલના કહેવાથી એરપોર્ટ પાસેથી મેળવ્યો હતો.એરપોર્ટથી ટ્રોલી બેગમાં ગાંજો હાર્દિકને આપવામાં આવ્યો હતો. એરપોર્ટથી ગાંજાના કુલ નવ પેકેટ આવ્યા હતા જેમાંથી સાત પેકેટ જે વ્યક્તિ ગાંજો આપ્યો હતો તે જ લઈ ગયો હતો l,જ્યારે બે પેકેટ ગાડીમાં પડ્યા હતા. આ ગાંજો ક્યાંથી આવ્યો કોણે મોકલ્યો અને કોને આપવાનો હતો તે મામલે પોલીસ દ્વારા તપાસ કરવામાં આવી રહી છે.
