ધોરાજી હાઉસિંગ બોર્ડમાં જળબંબાકાર : પાલિકાની બેદરકારીથી ઘરોમાં ઘૂસ્યા પાણી

ધોરાજી હાઉસિંગ બોર્ડમાં જળબંબાકાર : પાલિકાની બેદરકારીથી ઘરોમાં ઘૂસ્યા પાણી

ગોઠણડૂબ પાણી ભરાતા જનજીવન પ્રભાવિત; અનાજ, કરિયાણા અને ઘરવખરીને નુકસાન : લોકોમાં રોષ

અગ્ર ગુજરાત, ધોરાજી

રાજકોટ જિલ્લાના ધોરાજી શહેરમાં ગઈકાલે પડેલા ભારે વરસાદ બાદ વોર્ડ નં. 7 સ્થિત હાઉસિંગ બોર્ડ સોસાયટીમાં જળબંબાકાર જેવી સ્થિતિ સર્જાઈ હતી. વિસ્તારમાં ગોઠણ સમા વરસાદી પાણી ભરાઈ જતા સ્થાનિકોને ભારે હાલાકીનો સામનો કરવો પડ્યો હતો. અનેક રહેણાંક મકાનોમાં વરસાદી પાણી ઘૂસી જતાં ઘરવખરી, અનાજ, કરિયાણા સહિત જીવનજરૂરિયાતની વસ્તુઓને નુકસાન પહોંચ્યાનો સ્થાનિકોએ આક્ષેપ કર્યો છે.

સ્થાનિક રહેવાસીઓએ નગરપાલિકા તંત્ર સામે ગંભીર આક્ષેપો કરતા જણાવ્યું હતું કે નગરપાલિકા દ્વારા ભૂગર્ભ ગટરની કામગીરી હાથ ધરાયા બાદ વરસાદી પાણીના નિકાલ માટે યોગ્ય વ્યવસ્થા કરવામાં આવી નથી. પરિણામે ભારે વરસાદ પડતાં જ વરસાદી પાણીનો નિકાલ ન થતા સમગ્ર વિસ્તાર પાણીમાં ગરકાવ થઈ જાય છે અને પાણી સીધું ઘરોમાં પ્રવેશી જાય છે.

સ્થાનિકોના જણાવ્યા મુજબ વોર્ડ નં. 7માં વરસાદી પાણી ભરાવાની સમસ્યા નવી નથી, પરંતુ છેલ્લા ઘણા સમયથી આ સમસ્યા યથાવત રહી છે. અનેક રજૂઆતો છતાં તંત્ર દ્વારા કાયમી ઉકેલ લાવવામાં નિષ્ફળતા મળી હોવાનું સ્થાનિકોએ જણાવ્યું હતું. પાલિકાની બેદરકારી અને આયોજનના અભાવે સામાન્ય નાગરિકોને ભારે મુશ્કેલીનો સામનો કરવો પડી રહ્યો હોવાનું પણ રહેવાસીઓએ જણાવ્યું હતું.

સમગ્ર મામલે સ્થાનિકોએ સોશિયલ મીડિયામાં વીડિયો વાયરલ કરીને નગરપાલિકા તંત્રનું ધ્યાન દોરવાનો પ્રયાસ કર્યો હતો. વાયરલ થયેલા વીડિયોમાં હાઉસિંગ બોર્ડ સોસાયટીના રસ્તાઓ પર ગોઠણડૂબ પાણી ભરાયેલા તેમજ રહેણાંક મકાનોમાં વરસાદી પાણી ઘૂસ્યાના દ્રશ્યો જોવા મળી રહ્યા છે.

સ્થાનિકોએ વરસાદી પાણીના યોગ્ય નિકાલ માટે તાત્કાલિક કામગીરી હાથ ધરવા અને વોર્ડ નં. 7ની લાંબા સમયથી ચાલી આવતી સમસ્યાનું કાયમી નિરાકરણ લાવવા માંગણી કરી છે. ભારે વરસાદ બાદ સર્જાયેલી પરિસ્થિતિને પગલે વિસ્તારમાં રહેવાસીઓમાં રોષનો માહોલ જોવા મળી રહ્યો છે.

સ્થાનિકોએ તાત્કાલિક ધોરણે વરસાદી પાણીના નિકાલ માટે વૈકલ્પિક વ્યવસ્થા ઉભી કરવા તેમજ કાયમી ડ્રેનેજ સિસ્ટમ વિકસાવવા નગરપાલિકા તંત્ર સમક્ષ માંગ ઉઠાવી છે.

સ્થાનિકોના મુખ્ય આક્ષેપ

• ભૂગર્ભ ગટરની કામગીરી બાદ વરસાદી પાણીના નિકાલની વ્યવસ્થા ન કરાઈ.
• થોડા જ વરસાદમાં હાઉસિંગ બોર્ડ વિસ્તારમાં ગોઠણ સમા પાણી ભરાઈ જાય છે.
• વરસાદી પાણી ઘરોમાં ઘૂસતા ઘરવખરી અને અનાજને નુકસાન.
• અનેક રજૂઆતો છતાં સમસ્યાનો કાયમી ઉકેલ આવ્યો નથી.
• સોશિયલ મીડિયામાં વીડિયો વાયરલ કરી તંત્રને જગાડવાનો પ્રયાસ કરાયો.