રાજકોટ સહિત સૌરાષ્ટ્રમાં ૨૬મી જાન્યુઆરી પ્રજાસત્તાક પર્વ ઉજવાશે

આન, બાન, શાન સાથે તિરંગો લહેરાવાશે

રાજકોટ સહિત સૌરાષ્ટ્રમાં ૨૬મી જાન્યુઆરી પ્રજાસત્તાક પર્વ ઉજવાશે

રાજકોટ જિલ્લાકક્ષાનું ધ્વજવંદન જેતપુરમાં થશે : ધ્વજવંદન, માર્ચ પાસ્ટ, સાંસ્કૃતિક કાર્યક્રમોનું આયોજન

અગ્ર ગુજરાત, રાજકોટ

રાજકોટ સહિત સૌરાષ્ટ્રમાં સોમવારે પ્રજાસત્તાક પર્વની ઉજવણી કરવામાં આવશે. ધ્વજવંદન, પરેડ, સાંસ્કૃતિક કાર્યક્રમોનું આયોજન કરવામાં આવ્યું છે. રાજકોટ, જેતપુર, અમરેલી સહિત શહેરોમાં ઉજવણીની તૈયારીઓને આખરી ઓપ આપ્યો છે.

જેતપુરમાં હેલીપેડ ગ્રાઉન્ડ ખાતે જિલ્લા વહીવટી તંત્ર દ્વારા ભારતના ૭૭મા પ્રજાસત્તાક દિવસની ઉજવણી નિમિત્તે જિલ્લાકક્ષાનો ધ્વજવંદન સમારોહ તા. ૨૬મી જાન્યુઆરી, ૨૦૨૬ને સોમવારના રોજ સવારે ૯ કલાકે યોજાશે. જેમાં ગુજરાત સરકારના કૃષિ અને ખેડૂત કલ્યાણ, સહકાર, પશુપાલન, ગૌસંવર્ધન, મત્સ્યોઘોગ અને પ્રોટોકોલ તેમજ રાજકોટ જિલ્લા પ્રભારી મંત્રી જીતુભાઈ વાઘાણીના હસ્તે ધ્વજવંદન કરવામાં આવશે. આ તકે પરેડ નિરીક્ષણ, માર્ચ પાસ્ટ, સ્વતંત્રતા સેનાનીઓ અને વિશિષ્ટ કામગીરી કરનારા વ્યક્તિઓનું સન્માન કરાશે. તેમજ સાંસ્કૃતિક કૃતિઓ અને ટેબ્લો પ્રદર્શિત કરાશે.

૭૭મા પ્રજાસત્તાક પર્વની રાજકોટ જિલ્લા કક્ષાની ઉજવણી જેતપુરની મામલતદાર કચેરીના હેલીપેડ ગ્રાઉન્ડ ખાતે થનારી છે, જેનું રિહર્સલ યોજાયું હતું. આ તકે જિલ્લા વિકાસ અધિકારી અનંદુ સુરેશ ગોવિંદે પ્રજાસત્તાક પર્વની ઉજવણી દેશભક્તિસભર માહોલમાં યોજાય તે માટે વિવિધ વિભાગો-ટીમને જરૂરી સૂચનાઓ આપી હતી.

રાજકોટ શહેર-જિલ્લામાં ૭૭મા પ્રજાસત્તાક પર્વની દેશભક્તિપૂર્ણ માહોલમાં ઉજવણી કરવા જિલ્લા કલેક્ટર ડૉ. ઓમ પ્રકાશના નિર્દેશમાં વહીવટી તંત્ર દ્વારા તડામાર તૈયારીઓ ચાલી રહી છે. રાજકોટ શહેરકક્ષાના પ્રજાસત્તાક પર્વની ચૌધરી હાઈસ્કૂલ ખાતે ઉજવણી થશે.

મહત્ત્વનું છે કે, ચૌધરી હાઈસ્કૂલના પ્રાંગણમાં ૨૬મીએ શહેરકક્ષાના પ્રજાસત્તાક દિવસની ઉજવણી નિવાસી અધિક કલેક્ટર એન.કે. મુછારની અધ્યક્ષતામાં કરવામાં આવશે.

અમરેલી જિલ્લાકક્ષાના પ્રજાસત્તાક પર્વની ઉજવણી ખાંભામાં કરવામાં આવશે. ઉજવણી નિમિતે જિલ્લાની વિવિધ કચેરીઓ દ્વારા આરોગ્ય, પ્રાકૃતિક કૃષિ સહિતના વિષયોની ઝાંખી પ્રસ્તુત કરવામાં આવશે.

સોમનાથ દરિયાઇ કોસ્ટલ, ફાર્મ હાઉસ, ધાર્મિક સ્થળોનું ચેકીંગ

ગીર સોમનાથ જિલ્લામાં ૨૬મી જાન્યુઆરી પર્વની ઉજવણી શાંતિપૂર્ણ થાય તે માટે પોલીસતંત્ર દ્વારા ચેકીંગ હાથ ધર્યુ હતું. દરિયા કિનારા પર સતત પેટ્રોલીંગ હોટલ, ધાબા, રિસોર્ટ, લોજીંગ હાઉસ સહિતના સંવેદનશીલ સ્થળોએ તપાસ અને ચેકીંગ અભિયાન ચલાવવામાં આવી રહ્યું છે.