પંચમહાલ જિલ્લાની સરકારી ગ્રાન્ટમાં નાણાની ઉચાપત
સમગ્ર શિક્ષા અભિયાનમાં કાગળ પર સાધનોની ખરીદી કરી આચર્યું રૂ.2.79 કરોડનું કૌભાંડ
રાજકોટની ત્રણ સહિત છ એજન્સીના માલિકો સામે પોલીસમાં ફરિયાદ: નિયમોનું ઉલ્લંઘન કરી શાળાઓમાં સાધનો જમા નહીં કરાવી ખોટા બિલો બનાવ્યા
અગ્ર ગુજરાત, પંચમહાલ
પંચમહાલ જિલ્લાના સરકારી ગ્રાન્ટમાં મોટાપાયે ઉચાપતનું કૌભાંડ સામે આવ્યું છે. સમગ્ર શિક્ષા અભિયાન અંતર્ગત કાગળ પર સાધનોની ખરીદી કરીને સરકારી નાણાંનો દુરુપયોગ કરી અંદાજે 2.79 કરોડ રૂપિયાથી વધુની રકમની ઉચાપત કરતા બે કરાર આધારીત કર્મી અને ચાર એજન્સીઓ સામે ફરીયાદ ગોધરા ‘બી’ ડિવિઝન પોલીસ મથકે નોંધાઈ છે.
વર્ષ 2024થી 2026 દરમિયાન પંચમહાલ જિલ્લા પ્રોજેક્ટ કો-ઓર્ડિનેટરની કચેરી, સમગ્ર શિક્ષા, જિલ્લા પંચાયત ગોધરા ખાતે કૌભાંડ આચરવામાં આવ્યું હતું. કચેરીના હિસાબી અધિકારી (વર્ગ-2) રણજીતસિંહ રાઠોડ દ્વારા આ મામલે સત્તાવાર ફરિયાદ દાખલ કરવામાં આવી છે.
સર્વ શિક્ષા અંતગર્ત શાળાઓમાં એજન્સી દ્વારા સાધનો નહીં આપીને આર્થીક લાભ મેળવવા બદઇરાદાપુર્વક પડયંત્ર રચીને મેળાપણાપણાથી સરકારી નાણા કુલ 2,79,59,816 રૂપિયાની ઉચાપત કરી છે. સરકારી ખરીદી પ્રક્રિયાના નિયમોનું ઉલ્લંઘન કરી ખોટા અને બનાવટી બિલો બનાવી સરકારી ગ્રાન્ટમાંથી નાણાં એજન્સીઓના ખાતામાં જમા કરાવી હતી.આ એજન્સીઓએ કોઈપણ પ્રકારના સાધનો પૂરા પાડ્યા વગર માત્ર કાગળ પર વ્યવહારો બતાવી સરકાર સાથે છેતરપિંડી કરી હતી.ગોધરા શહેર બી ડીવિઝન પોલીસ મથકે ગુનો નોંધી વધુ તપાસ હાથ ધરી છે. આ કૌભાંડમાં હજુ પણ અન્ય મોટા માથાઓની સંડોવણી હોવાની શક્યતા નકારી શકાય તેમ નથી.
પોલીસે આ મામલે પૂજનકુમાર રમેશચંદ્ર જોષી (રહે. હિંમતનગર, સાબરકાંઠા), નિતિનકુમાર જયંતીભાઈ પટેલ (રહે. હિંમતનગર, સાબરકાંઠા), જે.એસ. કોમ્પ્યુટરના માલિક (ગોધરા), શ્રી રામ એન્ટરપ્રાઈઝના માલિક (રાજકોટ), વેદીકા એન્ટરપ્રાઈઝના માલિક (રાજકોટ), અક્ષર સેફ્ટી પ્રોડક્ટ્સના માલિક (રાજકોટ) સામે પોલીસ ફરિયાદ નોંધાવી છે.
અધિકારીની ખોટી સહીઓ કરી બિલ પાસ કર્યા
કરાર આધારિત કર્મચારીઓ એ ખાનગી એજન્સીઓ સાથે મળીને બનાવતી દસ્તાવેજો બનાવીને કરવામાં આવ્યા હતા. આ નાણાકીય કૌભાંડમાં કરાર આધારિત કર્મચારીઓએ જિલ્લા પ્રાથમિક શિક્ષણ અધિકારીની બનાવટી સહીઓ કરીને સરકારી ગ્રાન્ટો ખાનગી એજન્સીઓના ખાતામાં જમા કરાવીને કરોડો રૂપિયાની ઉચાપત કરી છે. બંને ભેજબાજો શિક્ષણ અધીકારીઓ વાઉચર અને બિલોની તપાસણી કરે તો ભાંડો ફુટવાની ભીકે ભેજાબાજો પ્રાથમિક શિક્ષણ અધિકારી રજા પર હોય ત્યારે, તેની બનાવટી સહીઓ કરીને ખોટા હુકમો બનાવી તેમજ બનાવટી બીલો બનાવી કરોડો રૂપિયાના નાણાંની ઉચાપત કરી હોવાનું સામે આવ્યું છે.
