આર્મી અને એરફોર્સમાં નોકરી આપવાની લાલચ આપી પ્રોફેસરની છાત્રો સાથે છેતરપિંડી
ગુજરાત કોલેજના અઘ્યાપકે ૩૦ વિદ્યાર્થીઓ પાસેથી લાખો રૂપિયા પડાવ્યા: કોલેજમાં હલ્લાબોલ-વિરોધ પ્રદર્શન: પ્રિન્સીપાલને ફરિયાદી બનવા માંગ
અગ્ર ગુજરાત, અમદાવાદ
ગુજરાત કોલેજ કરી એક વખત વિવાદમાં આવી છે. ગુજરાત કોલેજમાં અભ્યાસ કરતા વિદ્યાર્થીઓને એરફોર્સમાં અને આર્મીના સ્પોર્ટ્સ ક્વોટામાં નોકરી આપવાની લાલચ આપવામાં આવી હતી. આસિસ્ટન્ટ પ્રોફેસર તરીકે નોકરી કરતા ભરત પ્રજ્ઞેશ હનુભા દ્વારા વિદ્યાર્થીઓને નોકરી લાલચ આપીને 8 લાખથી પણ વધુ રૂપિયા પડાવવામાં આવ્યા હોવાનું સામે આવ્યું છે. જો કે નોકરી ન મળતા વિદ્યાર્થીઓએ જ્યારે સંપર્ક કરવાનો પ્રયાસ કર્યો ત્યારે ખબર પડી કે ભરત પ્રજ્ઞેશ હનુભા રૂપિયા લઈને ભાગી ગયો છે. જેથી તેને લઈને NSUI દ્વારા વિરોધ નોંધાવી પ્રિન્સિપાલ ખૂબ ફરિયાદી બની વિદ્યાર્થીઓને ન્યાય અપાવે તેવી માંગ કરવામાં આવી છે.
ગુજરાત યુનિવર્સિટી દ્વારા થોડા સમય પહેલા કોન્ટ્રાક્ટ પર ભરત પ્રજ્ઞેશ હનુભાની ભરતી કરવામાં આવી છે. જેને સ્પોર્ટ્સના આસિસ્ટન્ટ પ્રોફેસર તરીકે કામ સોંપવામાં આવ્યું છે. વિદ્યાર્થીઓને સ્પોર્ટ્સ લેવલ સારી તાલીમ મળી રહે તેવા આશય સાથે ભરતી કરવામાં આવી છે. પરંતુ આસિસ્ટન્ટ પ્રોફેસર દ્વારા એવો ખેલ કરવામાં આવ્યો છે કે જેના કારણે હવે બીજો કોઈ વિદ્યાર્થી પ્રોફેસર પર વિશ્વાસ કરતા 100 વખત વિચાર કરશે.
આસિસ્ટન્ટ પ્રોફેસર ભરત પ્રજ્ઞેશ હનુભા દ્વારા સ્પોર્ટ્સની તાલીમ આપવાના બદલે વિદ્યાર્થીઓને નોકરીની લાલચ આપવામાં આવી હતી. એરફોર્સ અને આર્મીમાં સ્પોર્ટ્સ ક્વોટામાં વિદ્યાર્થીઓને નોકરીની લાલચ આપવામાં આવી છે. સ્પોર્ટ્સના આસિસ્ટન્ટ પ્રોફેસર દ્વારા સ્પોર્ટ્સ ક્વોટામાં નોકરી આપવાનું વિદ્યાર્થીઓને કહેવામાં આવ્યું ત્યારે વિદ્યાર્થીઓ વિશ્વાસમાં આવી ગયા હતા. વિદ્યાર્થીઓ પાસેથી રૂપિયા પડાવવા ટ્રેનિંગ માટે પૈસાની માંગણી કરવામાં આવી હતી. જો કે ટ્રેનિંગ પૂર્ણ થયા બાદ જે પણ પૈસા લીધા હશે તે પરત આપવાનું પણ વચન આપવામાં આવ્યું હતું.
વિદ્યાર્થીઓએ નોકરી મળી જશે તેવી આશા સાથે સંબંધીઓ પાસેથી અને વ્યાજે પૈસા ભેગા કરીને આસિસ્ટન્ટ પ્રોફેસર ભરત પ્રજ્ઞેશ હનુભાને ઓનલાઈન મોકલી આપ્યા હતા. કુલ 30 જેટલા વિદ્યાર્થીઓ એક લાખ, 30 હજાર એમ કુલ 8 લાખથી પણ વધુ રૂપિયા આપ્યા હતા. જો કે થોડા સમય સુધી નોકરી ન મળતા વિદ્યાર્થીઓએ ભરત પ્રજ્ઞેશ હનુભાનો સંપર્ક કરવાનો પ્રયાસ કર્યો હતો. પરંતુ રૂપિયા મળ્યા બાદ ફોન સ્વીચ ઓફ કરીને ફરાર થઈ ગયો હતો. જેથી વિદ્યાર્થીઓને પોલીસ સ્ટેશનમાં અરજી પણ લખાવી છે. પરંતુ ગુજરાત કોલેજ દ્વારા કાર્યવાહી કરવામાં આવે તેવી આશા સાથે NSUI ના કાર્યકર્તાઓ અને વિદ્યાર્થીઓ પ્રિન્સિપાલને મળવા પહોંચ્યા હતા. ઉગ્ર નારા લગાવી પ્રિન્સિપાલ ખુદ ફરિયાદી બને તેવી માંગ કરવામાં આવી છે. જો કે પ્રિન્સિપાલ હાજર રજા પર હોવાથી વિદ્યાર્થીઓને મળી શક્યા નહોતા
