મનપાની બેદરકારી! ઇલેકટ્રીક સિટી બસમાં હેન્ડબ્રેક લગાવ્યા બાદ પણ ચાલતી જ રહી
મેન્ટેનન્સના અભાવે ૧૦૦ જેટલી સિટી બસમાં ખામી હોવાની રાવ : અટલ ડેપોમાં સબમર્શિબલ પંપ બંધ, સેન્સર ખરાબ, ૮ના બદલે ડ્રાઇવરોને ૧૬ કલાક કરાવાતુ કામ : ફરિયાદ કરવા છતાં તંત્રના આંખ આડા કાન
અગ્ર ગુજરાત, રાજકોટ
શહેરીજનોની સગવડતા માટે શરૂ કરવામાં આવેલી સિટી બસો લોકો માટે જીવલેણ સાબિત થઇ રહી છે. છાશવારે અકસ્માત સર્જાય રહ્યાં છે. ત્યારે વધુ એક બેદરકારી સામે આવી છે. જેમાં અટલ ડેપોની ઇ-૬૭ નંબરની ઇલેકટ્રીક બસમાં હેન્ડબ્રેક માર્યા બાદ પણ બસ ચાલતી હોવાનો વીડિયો સોશ્યલ મીડિયામાં વાયરલ થયો છે.
આ અંગે મહાનગરપાલિકાના જવાબદાર અધિકારીએ જૂનો વીડિયો હોવાનું કહીને વાત ઉડાવી દેવામાં આવી હતી. પરંતુ બસના ડ્રાઇવરે જણાવ્યું હતું કે 27 જાન્યુઆરીનો જ આ વીડિયો છે. આ ડેપોની 100 જેટલી બસનું મેન્ટેનન્સ કરવામાં આવતું નથી.
હેન્ડ બ્રેક લાગતી નથી, આગ બુઝાવવા માટેનો સબમર્સીબલ પંપ બંધ છે. સેન્સર ખરાબ છે તેમજ ડ્રાઇવરોને 8ને બદલે 16 કલાક કામ કરાવવામાં આવે છે. ડેપો મેનેજર વિક્રમ ડાંગર ભાજપનો માણસ હોવાથી ગંભીર ક્ષતિઓ હોવા છતાં કોઈ કાર્યવાહી ન થતી હોવાના આક્ષેપો થયા છે.
ડ્રાઈવરે જણાવ્યું હતું કે, અટલ ડેપોની E 67 નંબરની ઇલેક્ટ્રીક સિટી બસનો જ વિડિયો છે. જેમાં બસને હેન્ડબ્રેક મારવામાં આવી છે પરંતુ તેમ છતાં પણ બસ ચાલુ જ રહે છે. બસ ઊભી રાખવી હોય તો હેન્ડ બ્રેક મારી એટલે ઉભી રહી જાય પરંતુ આ બસ હેન્ડ બ્રેક માર્યા બાદ પણ ઉભી રહેતી નથી જેને લીધે ગંભીર અકસ્માત થવાની ભીતિ છે કોઈ પણ પ્રકારનું મેન્ટેનન્સ જાળવવામાં આવતું નથી. ઘણા બધા સેન્સર પણ કામ કરતા નથી. જેથી કોઈપણ પ્રકારનો અકસ્માત થાય તો ડ્રાઇવરની જવાબદારી બને છે તો આમાં બસમાં ફોલ્ટ હોય તો ડ્રાઇવર શું કરે.
તેમણે જણાવ્યું કે, અહીં અટલ ડેપોમાં મેન્ટેનન્સનો સ્ટાફ નથી. આગ બુઝાવવા માટેનો સબમર્સીબલ પંપ પણ બંધ છે. જેથી આગ લાગે તો મોટી દુર્ઘટના સર્જાઈ શકે તેમ છે. અહીં 100 જેટલી બસો ડેપોમાં હોય છે પરંતુ આગ લાગે તો તેને બુઝાવવા માટેની કોઈ વ્યવસ્થા નથી.બેટરી અને સેન્સરની સમસ્યા છે. જેને લીધે કોઈ મુસાફરનો હાથ કે પગ ફસાઈ જવાની પણ દુર્ઘટના સર્જાઇ શકે છે. રાજકોટ રાજપથ લિમિટેડ હેઠળ આવતી સિટી બસની વિશ્વમ એજન્સી છે. અટલ સરોવરના ડેપો મેનેજર વિક્રમ ડાંગર છે જેની હેઠળ આ બધુ આવે છે. આમ છતાં પણ બસોનું યોગ્ય મેન્ટેનન્સ જાળવવામાં ન આવતા મુસાફરો અને ડ્રાઇવર માટે ગંભીર ખતરો છે. આ ઉપરાંત અહીં ડ્રાઇવરોને 8ને બદલે 16 કલાકની ડ્યુટી આપવામાં આવે છે.
