પોલીસ તંત્રમાં મેગા ભરતી : ૧૨૪૭૨ જગ્યા ભરાશે

૪૭૨ પીએસઆઇ ઉપરાંત કોન્સ્ટેબલ અને જેલ સીપાઇ સહિતનાની થશે ભરતી : ઓનલાઇન પ્રક્રિયા ફરજિયાત

ગુજરાત પોલીસ ડિપાર્ટમેન્ટમાં મોટાપાયે ભરતી નીકળી છે. ૪૭૨ પીએસઆઇ અને અન્ય હથિયારી તથા બીનહથિયારી ૧૨૪૭૨ પોલીસમેનની ભરતી પ્રક્રિયા શરૂ થઇ છે. ભરતી માટેના ફોર્મ ભરવા તેમજ જરૂરી આધાર-પુરાવા ઓનલાઇન જ સબમીટ કરવાના રહેશે. ગુજરાત પોલીસ ભરતી બોર્ડે ભરતી અંગેની જાહેરાત પણ બહાર પાડી દીધી છે. https://ojas.gujrat.gov.in વેબસાઇટ પર ઓનલાઇન અરજી સ્વીકારવામા આવશે.

રાજ્ય પોલીસ વિભાગમાં ૨૧.3 ટકા જગ્યા ખાલી છે. ૨૭ હજારથી વધુ જગ્યા ખાલી હોવાનો રિપોર્ટ સરકારે હાઇકોર્ટને આપ્યો હતો. દરમિયાન ૨૦૨3માં યોજાયેલા પોલીસ એકેડેમીના એક કાર્યક્રમમાં ગૃહ મંત્રી હર્ષ સંઘવીએ ૨૦૨૪ના પ્રાંરભે પોલીસ ભરતી થશે તેવી જાહેરાત પણ કરી હતી. ૪૭૨ પીએસઆઇ ઉપરાંત અલગ અલગ કેટેગરીમાં બીજા ૧૨૪૭૨ પોલીસ કર્મચારીઓની ભરતીની જાહેરાત કરવામા આવી  છે.

આ સાથે ભરતી અંગેના નિયમોમાં પણ મોટાપાયે ફેરફાર કરવામા આવ્યા છે. ભરતીના નવા નિયમો પણ જાહેર કરવામા આવ્યા છે. શારીરિક અને લેખિત આ બન્ને ટેસ્ટ માટેના નવા નિયમો એટલા માટે વહેલા જાહેર કરી દેવામા આવ્યા છે કે ઉમેદવારોને અત્યારથી જ એ મુજબ તૈયાર કરવાની ખબર પડે.

દરમિયાન ગુજરાત પોલીસ ભરતી બોર્ડે આપેલી જાહેરાતમાં જણાવાયા મુજબ અલગ અલગ ૯ કેટેગરીમાં થનાર ૧૨૪૭૨ ભરતીની જગ્યાઓ પૈકી અનામત વર્ગોની જગ્યાઓની વિગત https://ojas.gujrat.gov.in પર મુકવામા આવી છે. આ જ વેબસાઇટ પર ફરજિયાતપણે ઓનલાઇન અરજી કરવાની રહેશે. અરજી સાથે ક્યા-ક્યા ડોક્યુમેન્ટ જરૂરી છે એ પણ સુચના વેબસાઇટ પર આપવામા આવી છે. ડોક્યુમેન્ટ પણ ઓનલાઇન જ સબમીટ કરવાની રહેશે. ઉમેદવારે ઓનલાઇન અરજી કરતા પહેલા જે તે સંવર્ગની જગ્યાઓ માટે ભરતીને લગત શૈક્ષણિક લાયકાત, વય મર્યાદા તેમજ અન્ય સૂચનાઓ ધ્યાનથી વાંચીને બાદમાં અરજી કરે. ઓનલાઇન અરજી કન્ફર્મ થયા પછી તેની પ્રિન્ટ કાઢી સાચવી રાખવી. ભરતી પ્રક્રિયા વખતે સાથે રાખવાની રહેશે.

472 PSI ઉપરાંત વર્ગ-3 અને જેલ ખાતાના વર્ગ-3માં આ મુજબ થશે ભરતી

કેટેગરી – ભરતીની જગ્યા

બિન હથિયારી પોલીસ સબ ઇન્સ્પેક્ટર(પુરુષ) – 3૧૬

બિન હથિયારી પોલીસ સબ ઇન્સ્પેક્ટર(મહિલા) – ૧૫૬

બિન હથિયારી પોલીસ કોન્સ્ટેબલ(પુરુષ) – ૪૪૨૨

બિન હથિયારી પોલીસ કોન્સ્ટેબલ(મહિલા) – ૨૧૭૮

હથિયારી પોલીસ કોન્સ્ટેબલ(પુરુષ) – ૨૨૧૨

હથિયારી પોલીસ કોન્સ્ટેબલ(મહિલા) – ૧૦૯૦

હથિયારી પોલીસ કોન્સ્ટેબલ(એ.આર.પી.એફ.)(પુરુષ) – ૧૦૦૦

જેલ સિપાઇ(પુરુષ) – ૧૦૧3

જેલ સિપાઇ(મહિલા) – ૮૫

કુલ – ૧૨૪૭૨